Itemik on rey Nabucodonosor
2
Ijkuak Nabucodonosor kipiyaya ome xipan ika tlamandarouaya ken rey, okipix keski temiktli yejuan sanoyej okitlanemililtij, hasta xok ueliya kochiya. 2 Yejua ika, okintekuitlan on magos, on tetlatejtemouilijkej, on nanaualtin niman on tlamatkej, para ma kijlikan tlinon kijtosneki on itemikuan. Ijkuak yejuamej yonosentlalijkej ixpan on rey, 3 yejua ijkin okinmijlij:—Onikpix sen temiktli niman xnoyolika ninemi pampa sanoyej nikneki nikmatis tlinon kijtosneki.
4 Niman on tlamatkej okijlijkej on rey ika on tlajtojli arameo:
—¡Nochipa xueyixtia toueyirey! Xtechtlajtlajtouili motemik tejuamej motekitkauan, niman tejuamej timitsijliskej tlinon kijtosneki.
5 On rey ijkin okinnankilij:
— Nejua yoniksetlalij ipan noyojlo: Tla nemejuamej xnennechijliaj tlinon oniktemik niman tlinon kijtosneki on notemik, nitlanauatis para ma mechtsojtsontekikan niman nemokaluan ma kinxoxotonikan. 6 Pero tla nemejuamej nennechijliaj tlinon oniktemik niman tlinon kijtosneki on notemik, nenkiseliskej miyek tetlayokolijli*, sanoyej nemechpaleuis niman nenkiseliskej ueyi tetlakaitalistli. Yejua ika tej, xnechijlikan tlinon oniktemik, niman xnechijlikan tlinon kijtosneki on notekik.
7 Yejuamej ika okpa okijlijkej:
— Toueyirey, Xtechtlajtlajtouili motemik, niman tejuamej timitsijliskej tlinon kijtosneki.
8 Ijkin okinnankilij on rey: Nejua kuajli nikmatstikaj ika nemejuamej nenkinekij nemouejkauaskej, pampa nenkimatstokej ika nenmechcastigaros. 9 Yejua ika, tla xnennechijliaj on tlen oniktemik, nemochimej san se castigo nenkiseliskej, pampa ijki yonenmotlajtolmakakej para nennechijliskej tlen xmelauak niman nenkichixtokej ma ninotlajtolpatla. Xnechijlikan tej, on notemik, niman ijki nikmatis ika no uelis nennechijliskej tlinon kijtosneki.
10 Niman yejuamej okinankilijkej:
—Ipan in tlaltikpaktli xnemi yejuan uelis mitsijlis tejua toueyirey on tlen tikneki tikmatis. Pero no ijki, xkaman sen rey maski sanoyej ueyixtikaj, okintlajtlanilij on magos on tetlatejtemouilijkej noso on tlamatkej ijkon ken tejua titlajtlani. 11 On tlen titlajtlani toueyirey sanoyej ouijtikaj, niman xnemi yejuan uelis mitsijlis, ye san yejuamej on dioses, ¡pero yejuamej xchantij iminuan on tlaltikpaktlakamej!
12 Ijkuak on rey ijkin okak, sanoyej okualan niman otlanauatij para ma kinmiktikan nochimej on tlamatkej yejuan nemij Babilonia. 13 Ijkuak yokis on tlanauatijli, no okitejtemotoj Daniel niman icompañeros para kinmiktiskej.
Daniel kijlia on rey tlinon kijtosneki itemik
14 Kemaj Daniel, achtoj kuajli okinemilij ken kinotsas Arioc, on ueyitlayekanki soldado itech on rey, ijkuak yejua ye peuaskia kinmiktiskia on tlamatkej. 15 Niman ijkin okitlajtoltij:
—¿Tline* on rey san otetlauelnauatijtets para ma kinmiktikan on tlamatkej?
Niman Arioc okijlij nochi tlinon onochiu. 16 Kemaj Daniel oyaj okitato on rey niman okiknotlajtlanilij ma kicha achijtsin para kipannextilis tlinon kijtosneki itemik.
17 Kemaj Daniel oyaj ichan, niman nochi okintlajtlajtouilij icompañeros Ananías, Misael niman Azarías. 18 Yejua okinmijlij para ma kitlajtlanilikan Dios iluikakchanej, para ma kimpaleui niman ma kinmachisti tlinon kijtosneki on tlen iyantikaj niman ichtaka onkaj de on temiktli, para ijki maka kinmiktiskej imiuan on oksekimej tlamatkej yejuan nemij ne Babilonia. 19 Ipan on tlayoua, Dios okititij Daniel tlinon kijtosneki on tlen iyantikaj niman ichtaka onkaj de on temiktli, niman Daniel sanoyej okiueyiteneu on Dios iluikakchanej, 20 ika in tlajtoltin:
"Ma tikueyiteneuakan itokatsin Dios, para nochipa,
pampa yejua iyaxka* on tlamatkilistli niman poder.
21 Yejua kimpatlatiu on tiempos
niman on tlinon nochiua ipan in tlaltikpaktli;
yejua kinkixtia niman kintlalia on reyes.
Kinmaka tlamatkilistli on yejuan tlamatkej,
niman kinmaka kajsikamatilistli on yejuan tlakajsikamatij.
22 Yejua kipanextia on tlen iyantikaj
niman ichtaka onkaj;
yejua kixmati nochi tlen onkaj kampa tlayouatok,
pampa itech yejua, onkaj on tlauijli.
23 Tejua yejuan tiiminDios noachtojtajuan,
nimitsmaka tlaxtlauijli niman nimitsueyiteneua,
pampa tejua otikchiu para ma nitlamatki
niman ma nikojtik,
niman aman otikchiu ma nikmati on tlen otimitstlajtlanilijkej,
niman otitechititij on tlen okitemik on rey."
24 Kemaj, Daniel oyaj okitatoj Arioc, on yejuan on rey okinauatij ma kinmikti on tlamatkej yejuan nemiyaj Babilonia, niman okijlij:
— Maka xkinmikti on tlamatkej. Yej, xnechuika itech on rey niman nejua nikijlis tlinon kijtosneki itemik.
25 Kemaj Arioc nimantsin okuikak Daniel ixpan on rey Nabucodonosor, niman ijkin okijlij on rey:
—Intech on judíos yejuan otikinuajuikakej, oniknextij in tlakatl yejuan mitsijlis tejua noueyirey tlinon kijtosneki motemik.
26 Kemaj on rey okitlajtoltij Daniel, (yejuan no kitokayotiayaj Beltsasar):
—¿Tiuelis tinechijlis notemik niman tlinon kijtosneki?
27 Daniel okinankilij:
—Xnemi nion se tlamatki, noso se tetlatejtemouilijketl, noso mago, noso yakaj sitlaltlachixketl, yejuan uelis mitsijlis noueyirey on tlen kijtosneki motemik. 28 Pero nemi sen Dios ne iluikak yejuan kiteititia on tlen iyantikaj, niman yejua yomitsititij tejua noueyirey tlinon nochiuas más sankin. Yejua ika, nejua nimitsijlis tejua noueyirey, on tlen otikitak ipan motemik chika tikochiya.
29 'Noueyirey, chika tikochiya, opeu titlanemilia de on tlen nochiuas más sankin, niman on akin kiteititia on tlen iyantikaj yejua omitsititij. 30 Nejua no ijki onechititijkej yejua on motemik, pero xpampa tla nejua más nitlamatki xken nochimej on tlakamej, yej para timitsijlis tejua noueyirey tlinon kijtosneki motemik, niman ijki, tejua noueyirey tiuelis tikajsikamatis on tlen tiknemiliaya ipan motlamachilis.
31 'Ipan on temiktli, tejua noueyirey, otikitak sen ueyi ixneskayotl ken tlakatl. Yejua petlaniya, niman temojmojtij ken tlajtlachaya. 32 Itsontekon katka de oro yejuan sanoyej chipauak; iyelpan niman imauan tlachijchijtli katka de plata; ijti hasta imetskojyouan tlachijchjtli katka ikan bronce; 33 niman ikxiuan desde imetskojyouan hasta ikxikajkayoluan tlachijchijtli katka ikan on tepostli hierro, niman de ikxikajkayoluan hasta ikxipalko katka de sen tlanelojli de on tepostli hierro iuan tlalajmojli. 34 Chika tejua, noueyi rey tikitstikatka, otikitak ika yakaj inmauan okiyopeu sen ueyi tetl ipan sen tepetl, pero on yakaj inmauan xyejua kakta iminmauan yakaj tlakatl. Yejua on yeyi tetl okuajtlajkalkej niman okimpojpostekilij ikxiuan on ídolo yejuan tlachijchijtli katka ika tepostli niman on sokitl. 35 Niman kemaj xuejkajtika on hierro, on tlalajmojli, on bronce, on plata niman on oro nochi okuejkuechtiak. Nesiya ken ijkuak noteinia on trigo ijkuak tonalko, niman on ajakatl okuikak nochi ipolokayo. Pero on tetl yejuan okimak on ixneskayotl onochiu sen ueyi tepetl yejuan okitemiltij nochi in tlaltikpaktli.
36 'In yejua on tlen otiktemik. Niman aman, noueyirey, timitsijliskej tlinon kijtosneki on temiktli. 37 Tejua noueyirey, más tiueyixtikaj intech nochimej on reyes, pampa Dios yejuan nemi ne iluikak omitsmakak nochi in reino kampa titlamandaroua. Yejua omitsmakak on ueyilistli, on poder niman on tetlakaitalistli. 38 Niman omitsmaktilij nochi kampa chantij on tlakamej, on yolkej niman on totomej. Yejua yomitsmaktilij nochi, tejua noueyirey. ¡On tsontekomatl de oro, sano tejua noueyirey!
39 'Sakin de tejua noueyirey, uajlas okse rey yejuan xmás ueyixtias ken tejua, niman kemaj ika yeyi okse uajlas rey yejuan de bronce, yejuan kimandaros nochi in tlaltikpaktli. 40 Kemaj ika naui uajlas on rey yejuan sanoyej kojtik ken itlaj on tepostli; niman ijkon kenon hierro kipojposteki nochi niman kixoxotonia, ijki on rey kintlanis niman kinxoxotonis nochimej on oksekimej reyes.
41 'Tejua noueyirey, otikitak ika se parte de ikxiuan niman ikxipiluan on ixneskayotl tlachijchijtli katka ikan tlalajmojli iksik, niman okse parte ikan hierro. Yejua in kijtosneki ika on reino xelijtias pampa maski tla chikauak yes ken hierro, no xkojtik yes kenon tlalajmojli iksik ijkon ken otikitak on hierro nelijtikaj iuan on tlalajmojli. 42 On ikxipiluan seki tlachijchijtli katka ika hierro niman okseki ika tlalajmojli. Yejua in kijtosneki ika on reino kojtik yes pero no xkojtik yes. 43 Ijkon ken tejua noueyirey, otikitak ika on hierro nelijtikatka iuan tlalajmojli, ijki nochiuas inuan on reyes, pampa iminfamilias on reyes nonejneloskej ika on namiktilistin para ijki uelis nosentlaliskej on reinos, pero xkaman ueliskej kuajli nosentiliskej, no ijki kenon hierro xueli iuan noneloua on tlalajmojli.
44 'Ijkuak tlamandaroskej yejuamej in reyes, Dios yejuan nemi ne iluikak kipeualtis sen reino yejuan xkaman kixoxotoniskej nion yakaj nación kikuilis, yej kimpojpolos on oksekimej reinos, niman ireino nokauas para nochipa. 45 In on tlinon kijtosneki on tlatlachalistli ken ipan temiktli kampa okitakej on ueyi tetl yejuan inmauan on yejuan xyakaj tlakatl okiyopeu, on ueyi tetl yejuan oualeu kampa tlakpak de on tepetl niman okuejkuechtilij on ídolo yejuan tlachijchijtli katka ikan on tepostli hierro, bronce, on sokitl, on plata niman on oro."
46 Kemaj on rey Nabucodonosor onotlakuantelkets ixpan Daniel, onopachoj hasta ipan tlajli niman otlanauatij ma kuajkuilikan tetlayokoliltin* niman ma kipopochuilikan ikan kopajli ajuiyak. 47 Kemaj okijlij Daniel:
— Tlakaj melauak nemoDios yejua más ueyixtikaj intech oksekimej dioses. Yejua inTEKO on reyes niman yejua kiteititia on tlen iyantikaj, pampa tejua kemaj otiuel otikmat tlinon kijtosneki notemik.
48 Kemaj on rey okitlalij Daniel ipan sen ueyitekiuajyotl niman okimakak miyek niman kualtsitsimej tetlayokoliltin. No okitlalij ken Gobernador ipan on ueyitlalpan Babilonia niman ueyi tlayekanki intech on tlamatkej ipan on nación.
49 Niman Daniel okitlajtlanilij on rey para okitlalij Sadrac, Mesac niman Abed-nego ken uejueyitekiuajkej ipan on tlajtlamach tekitl ipan iueyitlalpan Babilonia. Niman Daniel uej onokau kampa tlamandarouaya on rey.