Oseas
OSEAS, YEJUAN NOCHIPA NOUIKAYA IKAN YOLMELAJKILISTLI, NIMAN GOMER, ON SIUAAUILNENKETL YEJUAN ISIUAU
(1.1 – 3.5)
On tlakatl Oseashi
1
TOTEKO okinots Oseas, ikoneu Beerí, ipan on xiutin ijkuak Uzías, Jotam, Acaz niman Ezequías, opanotiajkej reyes ne Judá, niman Jeroboam, ikoneu Joás, yejua rey katka ne Israel.On inamiktilis Oseas iuan on siuatl itoka Gomer
2 ToTEKO ijkin opeu kiteijlia itlajtol itechkopa Oseas: "Tejua Oseas, xuiya niman iuan xmonamikti sen siuaauilnenketl, niman ijki, on nenmokoneuan iminnanaj yes sen siuatlakapapatlaketl. On yejua inmixnextilis yes on israelitas ika yonechtlalkauijkej, niman yej kinmauistiliaj on ìdolos."
3 Yejua ika, Oseas ononamiktij iuan sen siuatl yejuan itoka katka Gomer, yejuan ichpoch katka Diblaim. On siuatl okan ikonetsin, niman okitlakatilij sen tlakakonetl. 4 Kemaj toTEKO okijlij Oseas: "On tlakakonetl xtokayoti Jezreel. Ijkon xtokayoti, pampa xuejkajtika ika nejua nikinsesemanas iuejkakoneuan on rey Jehú, pampa sanoyej otemiktij ne Jezreel. Ijki tej, nejua nikpopolos on reino de Israel. 5 Ipan on tonajli, nejua nikimpopolos on soldados de Israel, ipan on ixtlauatl Jezreel."
6 Kemaj Gomer oksejpa onokonean, niman okitlakatilij sen siuakonetl. Niman toTEKO okijlij Oseas: "On siuakonetl xtokayoti Lo-ruhama, (yejuan kitosneki ''xkikneliaj'). Ijkon xtokayoti pampa nejua xok nikiknelis on reino de Israel. Nejua xnikintlapojpoluilis itlajtlakoluan. 7 Pero on reino de Judá, uej kemaj nikiknelis; on judíos nikinmanauis intech intlauelikiniuan. Pero xnikinmanauis ikan nouijsokilistli nion ikan arcojtlaminajli; xnikinmanauis ikan espada nion ikan caballos, nion ikan soldados yejuan caballojyetinemij. Yej nikinmanauis sano nejua akin niiminTEKO Dios."
8 Más sakin, ijkuak Gomer yokichichiualkajkaualtij Lo-ruhama, oksejpa onokonean, niman okitlakatilij sen tlakakonetl. 9 Kemaj toTEKO okijlij Oseas: "On tlakakonetl xtokayoti Lo-amí, (yejuan kitosneki 'xnotlapejpeniluan'). Ijkon xtokayoti pampa nemejuamej israelitas xok nennotlapejpeniluan, niman nejua xok ninemoDios."
On israelitas oksejpa yeskej itlapejpeniluan Dios
10 Pero se tonajli, on israelitas yejuan nemiskej ne Israel, sanoyej miyekej yeskej kenon xajli yejuan onkaj ipan mar, yejuan xakaj ueli kipoua. Niman yejuamej xok kinmijliskej: "Nemejuamej xok nenitlapejpeniluan Dios", yej kinmijliskej: "Nemejuamej nenitlapejpeniluan on Dios yejuan melauak nemi." 11 Ijkuakon, on chanejkej ipan on tlajli Judá niman Israel, nosentlaliskej san sekan, niman kitlaliskej san se tlayekanki para kinyekanas nochimej. Niman nochimej on yejuan okinuikakaj ken esclavos ipan oksekimej países, oksejpa uajlaskej ne Jerusalén. ¡On tonajli, sen ueyitonajli yes para on tlajli Jezreel! (Jezreel kijtosneki "Dios tlatôka"); niman nochiuas, ken Dios oksejpa tlatôkaskia ipan on nación de Israel.