2
Ipan on tonajli, on nenmochanejkauan israelitas yejuan tlakamej nenkinmijliskej: "Nemejuamej nenitlapejpeniluan Dios", niman on nenmochanejkauan israelitas yejuan siuamej nenkinmijliskej: "Nemejuamej nenteiknelilistin itech Dios".
On siuaauilnenketl Gomer sen ejemplo de on nación Israel yejuan yokitlalkauij toTEKO
2 ToTEKO no onechijlij: "Xteixpanui on nación Israel yejuan ken nenmonanaj yeskia. Yejua ken sen nosiuau katka, pero onechkau para okintato imekauan, niman aman xok niiueuentsin nion yejua xoc nosiuau. Niman nikijlia: '¡Maka sa xmouika ken yakaj auilsiuatl! ¡Maka sa xkimpakti on momekauan!' 3 Tla yejua xkichiua on tlinon nejua niknauatia, nejua nikauas tetsotsoltik ken ijkuak yejua otlakat. Nikchiuas para ma miki ikan amiktli, ken yakaj yejuan nokaua ipan sen xalpatlajkan kampa xitlaj onkaj atl niman on tlajli sanoyej teuatsaltik. 4 Nejua xnikinmiknelis ikoneuan, pampa okintlakatilij ipan iauilnemilis. 5 On nación Israel nouika ken sen siuatl yejuan xkipiya pinaualistli; okipoloj on tetlakaitalistli ijkuak okijtoj: 'Nejua nias nikomintejtemos nomekauan yejuan nechmakaj tlakuajli niman atl; nechmakaj tela de lana niman de lino, niman no nechmakaj aceite niman on tlinon nikoni.'
6 'Pero nejua niktlatsakuilis ipan iojui ikan uitstli, niman nikyeualtsakuas para makasa kinextis iojui. 7 Yejua kinekis kintojtokas imekauan yejuan kinemilia kitlajsojtlaj, pero xkominnajsis; komintejtemos, pero xkiminnextis. Kemaj ijkuakon yejua kijtos: 'Más kuajli tla ninokuepas itech noachtojueuentsin , pampa iuan yejua más kuajli ninemiya.'
8 'Pero yejua xkimati ika nejua nikmaka on trigo, on vino niman on aceite de oliva; nejua onikmakak on plata niman on oro yejuan ika okinnochijchiuilij iídolos. 9 Yejua ika tej, nejua nikuilis nochi on tlen onikmakak. Yejua xok pixkas, niman xok kipiyas on trigo niman on vino. Niman no, nikuilis on lana niman on lino yejuan ika notlakentiaya. 10 Inmixpan on imekauan nejua nikauas tetsotsoltik para ma pinaua. ¡Niman xakaj uelis nechteltis ijkuak nicastigaros! 11 Nejua xok nikauilis ma kichiua on iluimej yejuan kichiua cada semana, cada metstli niman cada xipan. ¡Nikchiuas ma tlami nochi ipakilis! 12 Nikixpolouilis nochi on iuvajtlatôkuan niman on ihigueras yejuan kinteneuaya ijkuak kijtouaya: 'In yejua tlaxtlauijli yejuan onechmakakej on nomekauan.' Nejua tej, nikchiuas para ompa yej ma onyakan uitskojtin niman ma tlakuajkuakan on tepeyolkej tekuanimej. 13 Nicastigaros ipampa nochi on tonaltin ijkuak yejua okintlapopochuilij iídolos; ijkuak nokualnextiaya ikan ianillos niman ikoskauan para komintaya on imekauan, niman nejua uej onechelkau. Ijki ipan nochiuas, pampa nejua akin niDios, ijki yonikijtoj ipan ma nochiua.
On itetlajsojtlalis toTEKO para on nación Israel
14 'Pero nejua nikchiuas para on nación Israel oksejpa ma nechmauistili. Nikuikas ipan xalpatlajkan, niman ompa kualtsin niknojnotsas para oksejpa ma nechneki. 15 Kemaj nejua oksejpa nikinkuepilis iuvajtlatôkuan, niman nochi on tlen xkuajli ipan onochiu, nikuepas tlatiochiualistli. Ijkuak nejua niknotsas, yejua oksejpa nechnankilis ken nechnankiliaya ijkuak ichpokatl katka, ken ijkuak onikixtij Egipto. 16 Ijkuakon xok nechijlis: 'Baal yejua nodios', yej nejua nechijlis: 'tinoueuentsin.' Ijki nochiuas, pampa nejua akin niDios, ijki yonikijtoj ma nochiua. 17 Nejua xokaman nikauilis ma kinnotsa on baales niman ma kintokayoti, yej nikchiuas ma kinmelkaua.
18 'Ipan on tonaltin, nejua nikchiuas sen pacto iminuan on tepeyolkej tekuanimej, iminuan on totomej niman iminuan on kouamej, para makasa ma kinchiuilikan daño on notlapejpeniluan israelitas. Ipan on país Israel, nikinkixtis nochi on armastin, on arcos, on espadas niman on nouijsokilistli, para ijki, on notlapejpeniluan chantiskej inyolika. 19 Israel, nejua nimitspiyas ken tinosiuau yeskia para nochipa. Nimitspiyas ikan yolmelajkilistli niman nimitsmakas nochi tlen kuajli, pampa nejua nimitstlajsojtla ikan nochi noyojlo. 20 Nejua xkaman nimitskauas, niman tejua melauak kuajli tinechixmtis nejua nimoTEKO Dios. 21 Nejua akin nimoTEKO, ijkin nikijtoua: 'Ipan on tonaltin, nejua nitlamoxtemas ipan on cielo para ma kiaui ipan motlal, 22 niman on motlal mitsmakas trigo, vino niman aceite de oliva. Nochi in, kiselis on ixtlauatl Jezreel. 23 Nejua kuajli nimitschantlalis ipan on tlajli, niman tejua san nejua tinoyaxka yes. Nejua nikinmiknelis on yejuan onikinteneu: 'Xteiknelilistin', niman notlapejpeniluan yeskej on yejuan onikinteneu: 'Xnotlapejpeniluan.' Niman yejuamej nechijliskej: 'Tejua titoDios'