Oseas oksejpa kiselia Gómer ken isiuau
3
ToTEKO oksejpa onechijlij: “Tejua Oseas, oksejpa xneki niman xtlajsojtla on mosiuau, maski yejua auilnemi iuan okse tlakatl. Nejua akin nimoTEKO, no ijki nikintlajsojtla on israelitas maski yejuamej kinmauistiliaj oksekimej dioses niman kikuaj uvajtetsojli yejuan yokinuentlalilijkaj on imindioses." 2 Kemaj nejua onikou on nosiuau yejuan nemiya esclava, niman ipampa oniktlaxtlau majtlaktli uan makuijli platajtomin niman 330 litros cebada. 3 Niman onikijlij: "Noneki panos miyek tonaltin antes mouan ninotekas. Ipan on tonaltin yejuan panos, maka tiauilnemis; maka timotemakas itech okse tlakatl, niman nejua no xmouan ninotekas."4 On kijtosneki, ika miyek xipan on israelitas xkipiyaskej iminrey nion intlayekankau; xok kitlauentlaliliskej toTEKO nion kimpiyaskej iminyekpilares, nion kimpiyaskej tiopixkatlakentin nion iminìdolos. 5 Pero más sakin, on israelitas oksejpa nokuepaskej niman kitejtemoskej iminTEKO Dios; niman kiseliskej se de iuejkakoneuan David para iminrey yes. Ipan on sa ika nochi tonaltin, on israelitas oksejpa nokuepaskej itech toTEKO ikan miyek tetlakaitalistli, niman kiseliskej on itlatiochiualis yejuan kitemaka.