Joel
I. KENIJKI TOTEKO OKINCASTIGAROJ ON ISRAELITAS IPAMPA INTLAJTLAKOLUAN
(1.1 - 2.18)
Dios kincastigaros on israelitas ika on chapolimej {-niman oksekimej yolkatsisimej} yejuan kitlamiskej noc hi on tlatôktli
1
ToTEKO okinots Joel, ikoneu Petuel, niman Joel ijkin okinmijlij on israelitas: 2 "Kuajli xkakikan in tlinon nemechijlis nemejuamej uejueyitlayekankej, niman no, nochimej nemejuamej yejuan nenchantij ipan in país. ¿Kamantika yonenkitakaj yonochiu tlajtlamach ken yejua in, noso on nenmotajuan yokitakaj? 3 Xkintlajtlajtouilikan nemokoneuan, niman yejuamej no ma kintlajtlajtouilikan inkoneuan, inmixuiuan niman inuejkakoneuan. 4 On chapolimej nochi okitlamijkej on tlatôktli; on tlen sekimej xokuajkej, oksekimej ouajlajkej niman nochi okitlamijkej.5 '¡Xtlachakan, nemejuamej tlajtlauankej! ¡Xpeuakan xchokakan nemejuamej yejuan sanoyej nenkonij vino, pampa no ijki mechkuiliskej on vino! 6 On chapolimej yotemikoj ipan nopaís. Yejuamej kenon sanoyej tojlamej soldados yejuan kojtikej, niman kenon leones yejuan tlatekij intlanuan. 7 Okitlamijkej touvajtlatokuan niman okimpojpostekkej on higojkojtin yejuan toyaxkauan; nochi kuajli okinkakauayokuajkej, hasta okinmistalijkej inmakojyouan.
8 'Xchokakan ijkon ken choka on ichpochtli niman kitlalia iajmankatlaken pampa omik on telpochtli yejuan iuan nonamiktiskia. 9 Ijki chokaj on tiopixkej pampa ipan on ueyitiopan xok kipiyaj trigo nion cebada nion vino yejuan kiuentlaliliskej toTEKO. 10 Ipan on tlatoktin xokuitlaj onkaj; on tlaltin nesij kenon najmanaskiaj. On trigo xok otlak, yejua on uvastlatoktin youajuakkej niman on olivoskojtin yopijpilinkej.
11 'Nemejuamej yejuan nentekitij ipan on tlatôktin niman ipan on uvastlatôktin, xajmankachokakan pampa yoixpoliu on tlinon onenkitôkakej, niman no yoixpoliu itlakyo on trigo niman on cebada. 12 Youajuakkej on uvastlatôktin niman yopolijkej on higojkojtin. No ijki, ouajuakkej on granadajkojtin, on palmeras, on manzanajkojtin niman nochimej on kojtin yejuan onojkej ipan tepetl. ¡Ijki otlan ipakilis nochi tlakatl!
Dios kintekuitlani on israelitas para ma noyolpatlakan (1.13 - 19)
13 'Nemejuamej tiopixkej yejuan nenkitekichiuiliaj toTEKO Dios ipan itlaixpan, xmotlakentikan ika nenmoajmankatlaken, niman xajmankachokakan nochi tlayoua pampa ipan iueyitiopan nemoDios xokuitlaj trigo nion cebada, nion vino yejuan nouentlalis. 14 Xkintekuitlanikan nochimej on israelitas ipan iueyitiopan toTEKO Dios, niman xkinmijlikan ma nosauakan. Xkinsentlalikan ne ipan on ueyitiopan yejuamej on uejueyitlayekankej niman nochimej on chanejkej ipan in país, niman xkueyikatsajtsilikan toTEKO.
15 '¡Ye ajsitikaj on tonajli ijkuak toTEKO mechcastigaros! ¡Sanoyej temojtij yes on tonajli ijkuak yejkos on tlajyouilistli yejuan kuajtitlanis on toTEKO yejuan nochi ueli kichiua!
16 'Tixpan tejuamej otechkuilijkej on tlakuajli yejuan tikpiyayaj, niman no otechkuilijkej on paktli yejuan tikpiyayaj ipan iueyitiopan toDios. 17 On xinachtli opalan ipan kuentli, on trigo yopoliu niman ijtik on kueskontin yotlatlajtlan niman yoxoxotonkej. 18 ¡On yolkej sanoyej tsajtsij pampa apismikij! On uakaxtin sanenkaj kitejtemouaj sakatl; on borregos ye mijmiktokej.