Jonás
ON ACHTOJ TLANAUATIJLI PARA ON TIOTLAJTOJKETL JONÁS MA TEMACHTITI NE NÍNIVE
(1.1 - 2.10)
On tiotlajtojketl Jonás kinekiya yejteuas itech toTEKO
1
ToTEKO okinots Jonás, ikoneu Amitai, niman okimakak sen tekitl yejuan sanoyej ueyi kijtosneki. Niman ijkin okijlij: 2 "Nimitsisijkatitlani xuiya ipan on ueyi kalpan Nínive yejuan ueyixtikaj, niman xkinchikajkaijliti ika nejua nikxoxotonis on ueyi kalpan pampa yonikitak sanoyej tlajtlakouaj nixpan." 3 Pero Jonás xokitlakamat toTEKO, yej oyaj ipan okse ojtli yejuan yau para Tarsis. Achtoj oyaj ipan on ueyikalpan Jope yejuan onkaj itenko mar kampa kisaj barcos. Niman ompa okitak sen barco yejuan ye yajtiaskia para on ueyi kalpan itoka Tarsis. Kemaj Jonás okitlaxtlau para otlejkok ipan on barco, para yas ipan on ueyi kalpan Tarsis pampa kinekiya cholojteuas itech toTEKO.
On temojtij ajakakiautli
(1.4 - 17)
On tlakamej yejuan yayaj ipan on barco sanoyej onomojtijkej
4 Pero toTEKO okichiu ma noketsteua sen temojtij ajakakiautli ipan mar chika on barco yaya itlajkotian. On ajakakiautli sanoyej chikauak tlauitekiya. Nesiya kixoxotonis on barco. 5 On tlakamej yejuan kuikayaj on barco semi sanoyej onomojtijkej, niman cada se opeu kitsajtsilia idios. Niman kemaj para maka polakis on barco, okonxinijkej nochi itlamamal ipan mar. Chika ijkon nochijtikatka, Jonás uej yolika nemiya, niman otemoto ijtik on barco kampa tlayejyeuayaj ika on tlajtlamach* niman ompa yejua sanoyej kochiya. 6 Kemaj on tlakatl yejuan tlayekana ipan on barco oyaj kampa nemiya Jonás niman okijlij:
—¿Tlinon tikchijtika nikan, tejua kochtetl? ¡Xmokuiteua niman xtsajtsili on Dios yejuan tejua tikneltoka! Manin kinekis techiknelis niman techmakixtis.
7 Niman on tlakamej yejuan tekitiyaj ipan on barco okinojlijkej:
—Ma tikchiuakan sen tlatejtemouilistli niman ijki tikmatiskej akinon kipiya tlajtlakojli ika in tlajtlamach* temojtij yejuan topan nochiua.
Kemaj okichijkej on tlatejtemouilistli, niman ones ika on tlajtlakojli kipiyaya Jonás. 8 Kemaj okijlijkej:
—Xtechijli tline* topan nochiua in tlajtlamach* temojtij. ¿Tlinon tekitl otikchiuako nanika? ¿Kanon tiualeua? ¿Katlejua mopaís? Niman ¿Akinomej mochanejkauan*?
Jonás noyolkuitia ika yejua ipampa onkaj on temojtij ajakakiautli
9 Jonás okinnankilij:
—Nejua nihebreo. Niman nikmauistilia on Dios iluikakchanej yejuan okichijchiu in mar niman okichijchiu in tlaltipaktli.
10-11 Jonás okintlajtlajtouilij on tlakamej ika yejua yejteuaya itech toTEKO. Niman ijkuak okakkej on tlen okijtoj niman okitakej ika on mar más sanoyej chikauak koxoniya, yejuamej sanoyej onomojtijkej niman oquitlajtoltijquej:
—¿Tline ijkon otikchiu? ¿Tlinon uelis timitschiuiliskej para in mar xok koxonis?
12 Niman Jonás okinnankilij:
—Xnechontlajkalikan ijtik in mar niman on tejmojtij ajakakiautli noteltis. Nejua nikmati ika nikpiya tlajtlakojli, yejua ika oualaj nemopan in temojtij ajakakiautli.
13 Pero on tlakamej yejuan tekitiyaj ipan on barco xkinekiyaj kontlajkaliskej ipan on mar, yej okichijkej kanika para kuikaskiaj on barco kampa tlatenko ipan tlajli. Pero xouelkej pampa on mar más temojtij koxoniya iminpan yejuamej. 14 Kemaj onoueyikatsajtsilijkej itech Dios, niman ijkin okijlijkej: "¡Ay Dios! Maka xtechkauili ma timikikan ipampa itlajtlakol in tlakatl. Niman tla yejua xkipiya tlajtlakojli maka titechtlajtlakoltis tla tikmiktiaj pampa tejua tiDios niman tejua nochi tikchiua ken tejua tikita kuajli. Yejua ika otikchiu ma uajla in temojti ajakakiautli."
Jonás okontlajkalkej ijtik on mar
15 Ijkuak ijkin okijtojkej, okajsitiajkej Jonás niman okontlajkalkej ijtik on mar, niman on mar xuejkatika onoteltij. 16 Ikuak on tlakamej yejuan tekitiyaj ipan on barco okitakej on tlen onochiu, okimatkej sen ueyi tlakaitalistli itech Dios niman okiueyitenejkej. Kemaj okimakakej sen uentli niman onoyektlajtolmakakej para kichiuaskej tlen kuajli itech Dios.
17 Chika ijkon nochiuaya, toTEKO okichiu para sen ueyi michin ma kipetstolo Jonás. Ijkon tej, Jonás nemiya ijtik on ueyi michin yeyi tonajli niman yeyi yeuajli.