On ueyikatsajtsilistli yejuan ika Jonás onoueyikatsajtsilij ijtik on ueyi michin
2
Kemaj Jonás onoueyikatsajtsilij itech toTEKO Dios, ijkuak nemiya ijtik on ueyi michin. 2 Ijkin okijtoj: "Chika sanoyej nitlajyouiyaya, onimitstsajtsilij tejua noTEKO, niman tejua otinechnankilij. Chika ninemiya ne kampa sanoyej uejkatlan kampa nemij on mikatsitsimej, onimitstsajtsilij, niman tejua otinechkak. 3 Otinechontlajkal tlatsintlan kampa sanoyej uejkatlan ijtik on mar. On sanoyej kojtik atl nechuijuikaya. Niman on kojtik ikoxonajlo on mar, chikauak nopan panouaya. 4 Hasta niknemiliaya kas ye ika yotinechtlalkauij. Pero nejua sanken* niknemilijtikatkaj oksejpa niyas ipan moyektiopan. 5 On miyek atl kualtsin nechtlapachojtikatka. Nitsakutikatka ika on mar yejuan sanoyej uejkatlan. Niman on amoxkuitlatl yejuan onkaj ijtik on mar onechkuamamalin. 6 Oniuetsito tlatsintlan kampa sanoyej uejkatlan ijtik on mar hasta ne kampa uajpeuaj tepemej. Niman nikmatiya ken ye ika yonechtsakukaj. Ninemiya ken se yejuan salijtikaj ijtik on mar. Nikmatiya ken xokaman nikisas, pero tejua, noTEKO Dios, otinechpanuetsitij ixko on mar, niman otinechmanaui para maka nimikis. 7 No ijki ijkuak nikmatiya nonemilis nechtlalkauiyaya, onimitselnamik tejua noTEKO. Noueyikatsajtsilis oajsik hasta motech ne ipan moyektiopan. 8 On yejuan kitlaliaj inyojlo intech on ídolos, yejuan xitlaj* uelij kichiuaj, peua xok tejua mitsmauistiliaj. 9 Pero nejua ninokuikatis niman nimitsueyitenuas. Nimitsmakas tlaxtlauijli niman nimitsmakas uentli. Nejua nikchiuas tlen onimitsyektlajtolmakak. San tejua, noTEKO, tiueli titemanauiya."
10 Kemaj toTEKO okichiualtij on ueyi michin ma kisotlati Jonás kampa tlaluakan.