ON IKA OME TLANAUATIJLI PARA ON TIOTLAJTOJKETL JONÁS MA TEMACHTITI NE NÍNIVE
(3.1 - 4.11)
Jonás okitlakamat itlanauatil Dios niman oyaj otemachtito ne Nínive On tlakamej ipan on ueyi kalpan Nínive onoyolpatlakej
3
ToTEKO ika okpa okinots Jonás niman okijlij: 2 "Isijkapan xuiya ipan on ueyi kalpan Nínive yejuan ueyixtikaj, niman xkinmijliti tlen nimitsijlis."3 Kemaj Jonás okitlakamat toTEKO, niman oyaj Nínive. Nínive katka sen ueyi kalpan yejuan ueyixtikatka. Tla yakaj tlakatl kinekiya kinejnemis nochi on ueyi kalpan, nonekiya yeyi tonajli. 4 Jonás okalak ipan on ueyi kalpan niman onejnen se tonajli. Niman ijkin chikauak kijtojtiaya: "¡Ipan 40 tonajli Dios kixoxotonis in ueyi kalpan Nínive!"
On tlakamej yejuan chantij ipan on ueyi kalpan Nínive onoyolpatlakej
5 On chanejkej ipan on ueyi kalpan okineltokakej Dios. Niman san sekan okinojlijkej desde on yejuan más uejueyimej tlamatkej* hasta on yejuan xtlamatkej*, ma nosauakan niman ma notlakentikan ika tlakentli* yejuan tejsontik, para kiteititiskej ika sanoyej najmanaj.
6 Ijkuak irey on ueyi kalpan Nínive okimat on tlen onochiu, no onotelkets de ipan itrono niman okau itekiuajyo, niman okinokixtilij on tekiuajtlakentli* niman okitlalij tlakentli* yejuan tejsontik niman onotlalij ipan tlikonextli. 7 Kemaj on rey niman itlapaleuijkauan okitemakakej in tlanauatijli nochiuiyan ipan on ueyi kalpan Nínive: “Maka yakaj ma tlakua. Niman maka ma kintlamakakan nion maka ma kinmatliltikan on uakaxtin niman on borregos iuan nochimej on oksekimej yolkej. 8 Yej noneki nemochimej xmotlakentikan nemejuamej niman nemoyolkauan ikan tlakentin yejuan tejsontikej para xteititikan ika nenmajmanaj. Niman xmoueyikatsajtsilikan itech Dios ikan nochi nemoyojlo. Cada se makasa kichiua on tlauelîjlotl niman nochi on tlajtlamach* tlen xkuajli kichiuayaj. 9 Manin Dios uelis noyolpatlas. Manin xok kualanis, niman ijki xtimikiskej."
10 Ijkon tej, Dios okitak on tlen okichijkej on tlakamej ne ipan on ueyi kalpan Nínive, niman kenijki okitlalkauijkej on tlen xkuajli kichiuayaj. Kemaj toTEKO onoyolpatlak niman xokintlajyouiltij ken yokijtojka kintlajyouiltis.