Jonás okualan pampa toTEKO okinmiknelij on yejuan chantij ne Nínive
4
Pero Jonás xokuelitak on tlen toTEKO okichiu niman sanoyej okualan. 2 Yejua ika ijkin okinots toTEKO, niman ijkin okijlij:—Xkita noTEKO, in yejua yoniknemilijka tikchiuas ijkuak sanken* ninemiya ipan nopaís. Yejua ika oniknek nimantsin nias ipan on ueyi kalpan Tarsis. Ijkon oniknek pampa nejua nikmatiya ika tejua tisenDios yejuan titetlajsojtla niman titeiknelia, ika tejua xnimantsin tikualani niman ika sanoyej ueyi motetlajsojtlalis. Nikmatiya ika timoyolpatlas niman xtikintlajyouiltis ken yokijtojka tikchiuas. 3 Yejua ika noTEKO, nimitstlajtlanilia xnechkixtili nonemilis. Más kuajli tla nimikis xken tla ninemis.
ToTEKO okajuak Jonás pampa xokipix teiknoitalistli
4 Pero toTEKO okinankilij:
—¿Tikita kuajli ika sanoyej tikualani?
5 Jonás okis de on ueyi kalpan niman oyaj kampaka ikisayan tonaltsintli de on ueyi kalpan. Ompa okichijchiu sen kalmatsintli niman onotlalij ompa ipan itlaseuajlo. Sa kichixtikatka kitas tlinon ipan nochiuas on ueyi kalpan. 6 Kemaj toTEKO Dios para kiyoltlalis Jonás okichiu ma noskalti ikuapan sen xojtli itoka xepojxojtli. Ijkon onochiu para okitlajseuasyotilij Jonás niman para nouelmatiya. Jonás sanoyej pakiya ika on xepojxojtli.
7 Pero uajmostla ijkuak otlanes, Dios okichiu para ma okuijloua on xepojxojtli, niman ouak. 8 Kenaj ijkuak chikauak yotonak, Dios okichiu ma uajla sen ajakatl sanoyej totonki yejuan oualeu kampaka ikisayan tonaltsintli. Niman ika on tonaltsintli kimaya melajki ipan itsonTEKOn, yejua kimatiya sotlauis niman xok kinekiya nemis. Kijtouaya, “Más kuajli tla nimikis xken tla sanken* ninemis”.
9 Pero Dios okinankilij:
—¿Tikita kuajli ijkin tikualanis pampa ouak on xepojxojtli?
Niman Jonás okinankijlij:
—¡Kemaj, nikita kuajli para ijkin nikualanis! ¡Sanoyej nitlauelmiki!
10 Kemaj toTEKO okinankilij:
“¿Sanoyej tikiknelia on xepojxojtli yejuan xtejua otiktokak nion xtejua otikiskaltij yejuan san ipan se yeuajli okis, niman ipan okse yeuajli ouak? 11 ¿Kenijki tej, nejua uej xnikiknelis on ueyi kalpan Nínive kampa nemij más de 120,000 chanejkej yejuan xkimatij ika ixpolijtokej ipan tlajtlakojli, niman no kampa nemi miyek yolki?”