Hageo
On amamoxtl Hageo san onkaj ken borrador. Xe kita sen tlamatki yejuan kinta on tlajtolpatlalistin para kijtoua tla ye kuajli onokej noso ka.
Tlanauatiaj oksejpa ma kichijchiuakan on ueyitiopan
1
Ipan on achtoj tonajli de on chikuasen metstli, ijkuak Darío ye kipiyaya ome xipan ika tlamamandarouaya ken rey, toTEKO itechkopa on tiotlajtojketl Hageo, okinots on gobernador de Judá yejuan itoka katka Zorobabel, itelpoch Salatiel, niman iuan no okinots on tlayekanki tiopixki Josué yejuan ikoneu Josadac.2 Itechkopa on tiotlajtolketl Hageo, toTEKO yejuan nochi ueli kichiua, ijkin okijtoj: “In tlakamej kijtouaj ika xe ajsi on kuajli tonajli para oksejpa kichijchiuaskej on ueyitiopan.”
3 Kemaj toTEKO okinmijlij on israelitas in tlajtojli itechkopa on tiotlajtolketl Hageo: 4 “¿Nemejuamej, uej nenkinekij kuajli nenchantiskej ipan kaltin kuajli tlachijchijtin yejuan kualtsitsimej, niman noueyitiopan uej xoxotontok? 5 Nejua, nemoTEKO yejuan nochi ueli nikchiua nemechijlia: Xnemilikan kuajli de on tlen nenkichiua. 6 Nemejuamej sanoyej nentôkaj, pero nenkipixkaj achijtsin. Nentlakua, pero xnenmixuij. Nentlaonij, pero sanken* nenamikij. Nemotlakentiaj, pero xnenxotlaj. Nemotlaxtlauil xnesi kanika yau; nesi ken nenkitlaliaj ijtik xikipijli yejuan tekojkoyoktik. 7 Nejua, nemoTEKO yejuan nochi niueli nikchiua nemechijlia: 'Xnemilikan kuajli de on tlen nenkichiuaj. 8 Xuiyan ipan tepemej; xkuajkikan kojtli* niman oksejpa xchijchiuakan noueyitiopan. Niman nejua nikselis ikan paktli, niman ijkon nechmakaskej tlakaitalistli ken nechtocaroua nikselis.
9 "Nemejuamej nenkinekij miyek, pero nenkipixkaj san achijtsin. On tlen nenkeuaj nemochan, nejua nikchiua para nimantsin ma tlami. ¿Tline* ijkon onikchiu? Ijkin onikchiu pampa nochan xoxotontikaj chika nemejuamej uej sa nenkinemilijtokej nenkuektlaliskej nemokaluan. Nejua, nemoTEKO yejuan nochi ueli kichiua nemechmelajkaijlia. 10 Yejua ika, ipampa nemotlajtlakol xkiaui, nion on tlajli xmechmaka itlakyo. 11 Nejua onikchiu ma tlauajuaki nochiuiyan ipan on tlajli, ipan tepemej, ipan tlatoktli de trigo, ipan uvasyoj, ipan olivojyoj, ipan nochi on tlatokyo ipan mijlaj, impan tlakamej, niman impan yolkej. Nochi nemotekiu sannenkaj.”
12 Kemaj Zorobabel, Josué niman nochimej on oksekimej israelitas onomojtijkej ijkuak okakkej on tlen toTEKO kinmijliaya itechkopa on tiotlajtojketl Hageo. Niman okitlakamatkej on tlen toTEKO Dios okinauatij ma kijto Hageo. 13 Kemaj Hageo, itiotlajtojkau toTEKO, okinmijlij on temachistijli yejuan Dios okimakak. Ijkin okinmijlij: "ToTEKO kijtoua: 'Nejua nemoTEKO, nemechmelakaijlia ika ninemi nemouan' ”.
14 Ijkin tej, toTEKO okiyoleu Zorobabel, on gobernador de Judá, niman Josué on intlayekankau on tiopixkej niman nochimej on oksekimej israelitas para peuas kichijchiuaskej on tiopan. Yejuamej opeu kichijchiuaj itiopan iminDios yejuan nochi ueli kichiua, 15 ipan on tonajli 24 de on chikuasen metstli ijkuak ye kipiyaya ome xipan ika Dario otlamandaroj ken rey.