Hageo 2

Iueyilis on yenkuik itiopan toTEKO

Ipan on tonajli 21 de on chikome metstli, toTEKO oksejpa okinots on tiotlajtojketl Hageo. 2 Yejua okinauatij ma kinotsa Zorobabel, ikoneu Salatiel yejuan igobernador Judá, Josué intlayekankau on tiopixkej yejuan ikoneu Josadac, niman nochimej on sekimej israelitas. Ijkin xkintlajtolti: 3 "On yejuan okitakej on achtoj tiopan yejuan onkatka, ikan nochi ikualtsinyo ma kijtokan kenijki kitaj in yejuan aman tikpiyaj. ¿Xijki nenkitaj ika semi xkualtsin nesi kenon oksekatka? 4 Pero xmoyoleua Zorobabel. Xmoyoleua Josué tiintlayekankau on tiopixkej. Niman xmoyoleuakan nochimej nemejuamej tlakamej ipan in país. Xtekitikan pampa nejua ninemi nemouan. Nejua nemoTEKO yejuan nochi ueli nikchiua, ijkin nemechmelajkaijlia. 5 Nejua onikimprometerouilij mouejkatajuan ijkuak okiskej Egipto, ika noEspíritu nochipa yas inuan yejuamej niman iminuejkakoneuan. Yejua ika maka xmomojtikan.

6 "Sa achijtsin poliui ijkuak nikchiuas ma uiuixka cielo, tlaltikpaktli, mar niman on tlaluakan. 7 Nikchiuas ma uiuixkakan nochimej naciones, niman kuajkiskej iminriquezas, niman noueyitiopan ika noueyilis. ToTEKO yejuan nochi ueli kichiua ijkin mechmelajkaijlia. 8 ToTEKO uejuan nochi uili kichiua ikin kijtoua: Nejua noyaxka* nochi on plata niman on oro ipan in tlaltikpaktli. 9 In ika ome tiopan más kualtsin yes xken on yejuan achto onkatka. Kemaj nikchiuas ma onya yolseuilistli nikan. Nejua, nemoTEKO yejuan nochi ueli nikichiua, ijkin nemechmelajkaijlia."

ToTEKO okinmajuak on chanejkej pampa xsán yejua kitokaj

10 Ipan on tonajli 24 de on chiknaui metstli ipan on ome xipan ijkuak rey katka Darío, toTEKO okinots on tiotlajtojketl Hageo: 11 Ijkin kijtoua nemoTEKO yejuan nochi ueli kichiua:

—xkintlajtolti on tiopixkej in tetlajtoltilistli: 12 ¿"Tlinon nochiuas tla yakaj kikti nakatl yejuan tlatiochijtli ipan icapa, niman ika itenko on capa okiteloj pan, tlakuajli, vino, aceite de oliva noso san katlejua tlakuajli?' ¿San ika kitelos, on tlakuajli ika on icapa, on tlakuajli nokauas tlatiochijtli?"

Ijkuak on tiotlajtojketl Hageo okintlajtoltij on tiopixkej, yejuamej okinankijlikej:

—Ka, on tlakuajli xnokaua chipauak.

13 Kemaj Hageo oksepa okinmijlij:

—Pero tla yakaj onokau xchipauak pampa okimatokak sen mikatsintli, niman kemaj yas niman no kimatokas san tlinon de on tlajtlamach*, tla ijkon, ¿no xchipauak yes ixpan toTEKO?

On tiopixkej okinankilikej:

—Kemaj.

14 Kemaj Hageo okijtoj:

—ToTEKO kijtoua: “Sa no ijki kichiuaj in chanejkej. Nochi tlen kichiuaj, niman nochi on tlen nechmakaj xchipauak nixpan nejua. 15 Aman niman para tlayakapan, kuajli xnemilikan de yejua in. Ijkuak xe nenpeuayaj nenkichijchiuaj on ueyitiopan, 16 ¿tlinon nemopan nochiuaya? Tla yakaj kinekiya kinextis sempoajli tlatemachijtli de trigo ipan ikueskon, yej san kinextiaya majtlaktli tlatemachijtli. Niman tla yakaj kinekiya kinextis 50 litros de vino, yej san kinextiaya sempoajli litro. 17 Nejua onikixpoloj ikan chauistli niman ikan tesiutli, nochi on tlatoktli yejuan nemejuamej nenkipiyayaj, pero maski ijkon onemechchiuilij, xonenualajkej notech. Nejua, nemoTEKO, nemechmelajkaijlia.

18 "Aman ipan 24 de on chiknaui metstli, yotlan kitlaliaj on temej tlatsintlan kampa ipeuyan notiopan. Aman tlamach nikchiuas yejuan xe nikchiuaya. 19 Maski aman xonkaj trigo noso cebada ipan nemokueskonuan, niman xe tlatlakitia on uvasyoj, on higuera* kojyoj, on granada kojyoj, nion on olivo kojyoj, desde aman nejua nemechtiochiuilis para tlakiskej."

ToTEKO kimaka Zorobabel sen promesa

20 Sa no ipan on tonajli 24, toTEKO oksejpa okinots Hageo, 21 niman okijlij ma kinotsa Zorobabel on yejuan gobernador ne Judá niman para ijkin ma kijli: “Nejua nikchiuas ma uiuixka cielo niman tlaltilpaktli. 22 Nikpopolos iminueyilis on reyes ipan in tlaltikpaktli niman nikxoxotonis imintronos. Nikinxoxotonis imincarretas de nouisokilislti niman on yejuan ijtik yauij. Niman nikinmiktis on caballos, niman on yejuan impan yetiuij. Cada se mikis ika iespada ikniu. 23 Niman tejua notekitkau Zorobabel, ipan on tonajli, nimitsmakas tekiuajyotl para titlamandaros, pampa nejua yonimitstlapejpeni. Nejua moTEKO yejuan nochi ueli nikichiua, nikmelajkaijtoua."