Dios kinyolkuitis on naciones pampa okintlajyouiltijkej on israelitas (3.1- 17)
3
ToTEKO kijtoua: “Ijkuak ajsis on tonajli, nejua nikchiuas para on chanejkej ne Judá niman Jerusalén yejuan okinuikakej ken esclavos ipan oksekimej países, oksejpa ma nokuepakan ipan imimpaís. 2 Niman ijkuakon, nikinsentlalis nochimej on naciones, niman nikinuikas ipan on ixtlauatl itoka Josafat. Kemaj ompa nikinyolkuitis pampa yejuamej okinchajchayajkej on notlapejpeniluan israelitas ipan nochi tlaltikpaktli, niman okinoxexelouilijkej nopaís. 3 On naciones okinoxexelouilijkej on notlapejpeniluan israelitas ikan suertes. Okinnemakilijkej inkoneuan tlakamej niman siuamej. Kemaj ika on tomin okojkej vino, niman no, ika okintlaxtlauilijkej on siuaauilnenkej.4 '¿Tline nennechtlauelitaj nemejuamej naciones Tiro, Sidón niman Filistea? ¿Nenkipiyaj tline nenkinekij nennechtlakuepiltiskej? ¿Nemechchiuilia itlaj tlen xkuajli? ¡Ka, yej nejua, xuejkajtika poliui ika nemechtlakuepiltis! 5 Nemejuamej onennechichtekilijkej on plata niman on oro; onenkiktikej ipan nemotiopanuan on tlajtlamach yejuan kualtsitsimej niman patiojkej yejuan noyaxkauan. 6 Uejka onenkinuikakej on chanejkej Judá niman Jerusalén, niman onenkinnemakakej ken esclavos intech on griegos. 7 Pero nejua nikinkixtis ne kampa onenkinnemakatoj, niman nikchiuas para nemejuamej no ijki xtlajyouikan ken yejuamej otlajyouijkej. 8 Nejua nikinnemakas nenmokoneuan tlakamej niman siuamej intech on judíos, para yejuamej ma kinnemakiltikan on Sabeos yejuan uejka chantij. ¡Nejua akin niDios, ijki yonikijtoj nikchiuas!
9 '¡Xnemikan listos para nenyaskej ipan on nouijsokilistli! ¡Xkiminnotsakan on tlakamej yejuan yolchikajkej! ¡Ma uajlakan nochimej on soldados! 10 On tepostlalmakakej xkinkuepakan espadas, niman on sakatlatektlilomej xkinkuepakan lanzas, niman on tlakamej yejuan xkojtikej ma nokuepakan tlakamej yejuan sanoyej kojtikej para ueliskej tlauijsokiskej ipan on nouijsokilistli. 11 Nochimej nemejuamej naciones yejuan nisiu nenonokej, ¡xijsiuikan, xmosentlalijtetsikan! ¡Hasta on yejuan xkuelita tlauijsoki, ma ueli tlauijsoki! 12 Xnemikan listos nemejuamej naciones, niman xuiyan ipan on ixtlauatl itoka Josafat, pampa nejua nemoTEKO ompa nemechyolkuitis niman nemechtlajtlakolmakas. 13 Pampa nemejuamej sanoyej nenxompayejyeuamej, nejua nemechtekis kenon trigo yejuan yochikau. Nemechpapaxos ken kipapaxouaj on uvas yejuan ika kichijchiuaskej vino hasta kaman on tanques kampa kipapaxouaj on uvas tetemiskej niman pankisas iyayo on uvas. 14 Sanoyej miyek tlakatl youajlaj ne kampa itoka 'Ixtlauatl Kampa Dios Tetlajtlakolmaka', pampa ye ajsitikaj on tonajli ijkuak Dios kuajtitlanis on castigo. 15 On tonaltsintli niman on metstli xok tlauilouaj, niman on sitlalimej xok petlanij. 16 Ijkuak nejua nemoTEKO nitlajtoua ikan chikauak tlakomonajli ne Jerusalén ipan on tepetl Sión, on cielo niman in tlaltikpaktli uiuixkaj. Pero nejua nikinmanauis on israelitas, notlapejpeniluan."
17 ToTEKO ijkin okinmijlij on intlapejpeniluan: "Ijkuak yejkos on tonajli, nemejuamej nenkimatiskej ika nejua ninemoTEKO Dios. Nejua nichantis ipan noyektepeu Sión. Jerusalén yes sen ueyikalpan yejuan yektli. Xokaman kinoyaxkatiskej on yejuan xchanejkej.
Dios kintiochiuas on israelitas niman kintlauelis intlauelikniuan
18 'Ipan on tonajli, on vino niman on leche sanoyej miyek onyas kenon atl yejuan meya ipan on tepemej niman ipan on tepetsitsimej. Ne Judá onyas sanoyej miyek atl ipan on ayajtoktsitsimej, niman ipan on noueyitiopan mextias atl yejuan katekis on ixtlauatl itoka Sitim.
19 'Ipan on país Egipto xokaman yakaj chantis, niman on país Edom nokuepas sen xalpatlajkan pampa on inchanejkauan okinuijsokkej on chanejkej Judá; okinmiktitoj ipan intlal maski xkipiyayaj tlajtlakojli. 20-21 Nejua xnikintlapojpoluis on yejuan otemiktijkej, yej nikintlakuepiltis. Pero ne Judá niman ne Jeru salén, nochipa chantiuas, niman nejua akin niDios, nichantis ne Jerusalén ipan on tepetl Sión.”