Dios kinmachistia on israelitas ika uajlaskej miyekej chapolimej ken sanoyej miyekej soldados yeskiaj
2
'Xpitsakan on tlapitsajli ipan on tepetl Sión; ma kakisti ipan iyektepeu toTEKO on tlapitsajli yejuan tlanotsa ijkuak ye nouijsokilos. Ma nomojtikan nochimej on chanejkej ne Judá, pampa ye ajsitikaj on tonajli ijkuak yejkos on castigo yejuan toTEKO kuajtitlanis. 2 Ipan on tonajli sanoyej tlayouatias, niman sanoyej tlamoxtentos.'Yoyejkokej miyekej niman kojtikej soldados yejuan yonochayajkej ipan on tepemej. Yonesikoj kenon tlastajlotl ijkuak tlanesi. Xkaman ijkon kitakayaj, nion xkaman oksejpa ijkon kitaskej. 3 Yejuamej ken itlaj on tlitl yejuan nochi kitlatia. Ijkuak xe yejkoyaj ipan in tlajli, sanoyej kualtetsin tlaxoxouixtoya kenon xochitlan Edén; niman ijkuak yopanokej, on tlajli onokau kenon xalpatlajkan. ¡Xitlaj onomanauij; nochi okikuajkej! 4 Yejuamej no ken on caballos niman notlalouaj kenon caballos yejuan yauij ipan nouijsokilistli. 5 Niman ijkuak tsijtsikuintiuij ipan on tepemej, kichiuaj ma tlakokomoka ken tlakokomoka ijkuak notlalouaj on carretas yejuan ika tlauijsokij. Kakistij ken ijkuak totopoka on xojtli uaki ijkuak tlatlatikaj. No ijki, yejuamej nesij kenon tojlamej niman kojtikej soldados yejuan yonotekpankej para tlauijsokiskej. 6 Nochi tlakatl kuekuetlaka ijkuak kinta on chapolimej, hasta ixistaleuij. 7 On chapolimej kenon tlakamej yejuan xnomojtiaj ipan on nouijsokilistli. Notlajtlalouaj, tlejkouaj ipan on tepanchinantli niman melajkayauij, nion se xkitlalkauiya iojui. 8 Yejuamej xnomajmapejtiuij, nochimej kitokaj inojui. Maski kinokijkixtilijtiuij on flechas, xnochajchayauaj. 9 Kixnamikij niman kuijsokij on ueyikalpan, notlajtlalouaj ipan on tepanchinantli, tlejkouaj ipan kaltin niman kalakij kalijtik kenon tlachtekej kalakij ipan on ventanas.
10 'On cielo niman in tlaltikpaktli uiuixkaj inmixpan yejuamej, on tonaltsintli niman on metstli xok tlauilouaj, niman on sitlalimej no xok petlanij. 11 ToTEKO, yejua kinyekana on miyekej chapolimej ken isoldados yeskiaj, niman kiminnotsa ikan sen tlakomonajli. Sanoyej miyekej on chapolimej, xakaj ueli kimpoua on yejuan kitlakamatij itlanauatiluan toTEKO. ¡Sanoyej ueyi niman temojtij yes on tonajli ijkuak toTEKO kuajtitlanis on castigo! Xnemi akinon kixikos yejua on temojtij tlajyouilistli.
Dios oksejpa kintekuitlani on israelitas para ma noyolpatlakan
12 'Yejua ika, aman toTEKO mechijlia: 'Xmokuepakan notech ikan nochi nemoyojlo. ¡Xmosauakan niman chikauak xajmankachokakan! 13 ¡Melauak xmokuepakan notech, maka sanenkaj xmotlakentetsayanakan para nenkiteititiskej kitl saman nenmajmanaj, yej melauak xmoyolkokokan! Ijki xchiuakan pampa nejua nenmoTEKO sanoyej niyolyemanki niman niteiknelia. Xnimantsin nikualani, niman notetlajsojtlalis xkaman tlami. Nejua nikneki nemechtlapojpoluis niman xok nikneki nemechcastigaros.'
14 'Ijki tej, xchiuakan, kas ijki yejua xok mechcastigaros, niman mechmakas trigo, cebada niman vino para uelis nenkiuentlaliliskej yejua nemoTEKO Dios.
15 '¡Xpitsakan on tlapitsajli ipan on tepetl Sión! Xkintekuitlanikan nochimej on israelitas niman xkinmijlikan ma nosauakan. 16 Xkinsentlalikan on israelitas, itlapejpeniluan Dios, niman xkinchipauakan. Xkinsentlalikan on ueuentsitsimej, on kokonej, niman no, yejuamej on kokonej yejuan sanken chichij. ¡No ijki, ma uajkisakan de ipan inkalijtik kampa kochij on yejuan kemach ononamiktijkej! 17 Ma chokakan yejuamej on tiopixkej yejuan kitekichiuiliaj toTEKO, niman ijkin ma noueyikatsajtsilikan ipan on tlajkokiauak yejuan nokaua itsajlan ikalixpan on ueyitiopan niman on tlaixpan: 'ToTEKO, xkintlapojpolui on motlapejpeniluan; maka xtekauili para oksekimej inka ma uetskakan; maka xkintemaka intech on naciones yejuan xtlaneltokaj motech yejuan kinmijliaj kitl tejua yejuan titoDios yotitechtlalkauij.' "
II. KENIJKI DIOS KINTIOCHIUAS ON ISRAELITAS IPAMPA IMINTLAKAMATILIS
(2.18 - 3.21)
Dios kuajtlalia iteiknelilis impan on israelitas
18 'Kemaj toTEKO Dios okititij ipaís ika sanoyej kitlajsojtla; yejua okintlapojpoluij on itlapejpeniluan, 19 niman okijtoj: 'Nejua nemechtitlanilis trigo, vino niman aceite de olivo yejuan tikpixkas, niman kuajli nenmixuiskej. Niman [on yejuan xtlaneltokaj notech los de otras naciones] xokaman nikinkauilis nemoka ma uetskakan. vino niman aceite de olivo yejuan tikpixkas, 20 Nikinmejkuanis nemotech on chapolimej yejuan oualejkej kampaka norte, niman nikominxinis ipan on xalpatlajkan. On yejuan yakatstiuij nikinamimiktis ipan on Mar Muerto, niman on yejuan tlakuitlapan yauij nikinamimiktis ipan on Mar Mediterráneo. Niman ompa palaniskej niman moloniaskej. ¡Nikchiuas tlajtlamach yejuan tetlatlachaltij!'
21 'Nemejuamej chanejkej ne Israel, maka xmomojtikan. Yej sanoyej xpakikan pampa nemoTEKO kichiuas tlajtlamach yejuan tetlatlachaltij. 22 Maka xmomojtikan tepeyolkej tekuanimej, on sakayoj oksejpa xoxouiyas, on kojtin oksejpa tlakiskej, niman on higojkojtin niman on uvajtemekamej sanoyej tlakiskej. 23 ¡Xpakikan nemejuamej yejuan nenchantij ne Sión, xpakikan itech nemoTEKO Dios! Yejua mechmakas on kiautli ijkuak nonekis ma kiaui. Mechmakas on atliuetskatlajkiautli niman on seuayankiautli, ijkon ken achtoj mechmakaya. 24 Nenkipixkaskej sanoyej miyek trigo, niman no nenkipiyaskej sanoyej miyek vino niman aceite de olivo.
25 'Dios kijtoua: 'Nejua oksejpa nemechmakas on tlakyotl yejuan onenkipolojkej ipan on xiutin ijkuak omechtlakualijkej on chapolimej. On miyek chapolin, nejua onemechajtitlanilij para ma mechtlatlajtlamilikan. 26 Nemejuamej nentlakuaskej niman kuajli nenmixuiskej, niman nennechueyiteneuaskej nejua nemoTEKO Dios, pampa nejua nikchiuas nemopampa tlajtlamach yejuan tetlatlachaltij, niman nemejuamej notlapejpeniluan xokaman oksejpa nemoka uetskaskej. 27 Niman ijkuakon nemejuamej israelitas nenkimatiskej ika nejua nemoTEKO nemouan ninemi. Nenkimatiskej ika nejua ninemoDios niman xnemi okse. ¡Nemejuamej notlapejpeniluan xokaman oksejpa mechpijpinajtiskej!
Dios kuajtitlanis iEspíritu impan on israelitas
28 'Niman ijkuak nochi in yopanok, nikuajtitlanis noEspíritu ipan nochi tlaltikpaktlakatl. Niman on nemokoneuan tlakamej niman siuamej, tiotlajtoskej. On yejuan ueuentsitsimej temikiskej, niman on telpokamej kiseliskej on tlatlachalistin ken intemikpan. 29 Niman ipan on tonaltin, no nikuajtitlanis noEspírirtu impan on tekipanojkej tlakamej niman siuamej.
30 'Ipan on cielo nejua nemechititis tlajtlamach yejuan sanoyej tetlatlachaltij, niman ipan in tlajli onyas yestli niman tlitl, niman no sanoyej nokuiteuas miyek poktli. 31 Ijkuak ye ajsis on ueyi niman temojtij tonajli ijkuak nejua nemoTEKO nikuajtitlanis on castigo, on tonaltsintli xok tlauilos, niman on metstli chichileuis kenon yestli." 32 Pero nochimej on yejuan nechmauistiliskej, xmikiskej, yej makisaskej, pampa ipan on tepetl Sión niman ne Jerusalén, ompa nomanauiskej ijkon ken nejua nemoTEKO yonikijtoj. Nochimej on yejuan notlapejpeniluan, xmikiskej."