Oseas 4

ISRAEL NOUIKA KEN SEN SIUAAUILNENKETL, NIMAN TOTEKO NOCHIPA NOUIKA IKAN YOLMELAJKILISTLI

(4.1 – 13.16)

Iauilnemilis Gomer iuan notemachiua itlajtlakoluan on israelitas

(4.1 - 5.7)

ToTEKO kinteixpanuiya on israelitas

Israelitas, xkakikan on tlinon kijtoua toTEKO. Yejua mechteixpanuiya nemejuamej yejuan nenchantij ipan in país, pampa nemejuamej xok nenkichiuaj tlinon nenkijtouaj, xok nentetlajsojtlaj niman no xok nenkixmatij Dios. 2 Sa nenmochimej nentlakajkayauaj, niman maski nemotlajtolmakaj xnenkichiuaj tlinon nenkijtouaj. Nemejuamej nentemiktiaj, nenajauilnemij, nenkichiuaj tlauelijlotl niman nentlachtekij; nenkichiuaj xompayejyeueualistli yejuan sanoyej ika nentetlajyouilitiaj; niman no sa chika nentemiktiaj. 3 Yejua ika ipan in país onkaj ajmantli; on yejuan nikan chantij xok kojtikej; hasta on tepeyolkej niman on totomej mijmikij. No ijki, mijmikij on michimej yejuan nemij ipan mar.

ToTEKO kinteixpanuiya on tiopixkej

4 ToTEKO kijtoua: "¡Maka yakaj ma tetechti noso maka yakaj ma teajua! Nejua, yej san nemejuamej tiopixkej nemechteixpanuiya. 5 Nemechcastigaros nemejuamej tiopixkej ijkuak tlajokaj niman ijkuak tlayoua. No ijki, nenmouan nikincastigaros on tiotlajtojkej. Niman no, nikpopolos on país Israel yejuan ken nemonanaj yeskia. 6 On notlapejpeniluan xnechixmatij pampa xonenkinmachtijkej para ma nechixmatikan. Yejua ika yejuamej mijmikij. Niman pampa nemejuamej tiopixkej, xonenkinekej onennechixmatkej, nejua no ijki xok nemechselia ken tiopixkej. Pampa onenkelkajkej notlamachtiluan nejua akin ninemoDios, nejua no nikinmelkauas nemokoneuan.

7 Ijkuak más onomiyekilijkej on tiopixkej, yejuamej más tlajtlakouayaj nixpan; yejua ika, nikinkuilis on tetlakaitalistli niman yej nikimpijpinajtis.8 On tiopixkej kiseliaj tlakuajli de on uentin yejuan on israelitas kuajkij impampa intlajtlakoluan. Yejua ika, on tiopixkej kinekij para on israelitas más ma tlajtlakokan.9 Ijkon kenon tiopixkej tlajtlakouaj, on oksekimej israelitas no ijki tlajtlakouaj. Yejua ika tej, on tiopixkej niman on oksekimej israelitas nochimej ijki nikincastigaros pampa xkuajli ken nouikaj.10 Pampa xok nechtekipanouaj nejua akin niiminTEKO, maski yejuamej sanoyej tlakuaskej, xok ixuiskej; maski notekaskej iminuan miyekej auilnenkej, xueliskej kipiyaskej inkoneuan."

ToTEKO kinteixpanuiya on yejuan kinmauistiliaj ídolos

11 ToTEKO no kijtoua: "On auilnemilistli niman on vino kichiuaj para on notlapejpeniluan ma tlamachilispoliuikan. 12 On notlapejpeniluan kinekij kimatiskej tlinon kichiuaskej, niman komintlajtoltiaj on iminídolos de kojtli. Yejuamej kinemiliaj ika on ídolos de kojtli ueliskej kiminankiliskej. Yejuamej xuelij kajkauaj on auilnemilistli. On notlapejpeniluan xkajkauaj on xkuajli ojtli niman ijkon yejuamej yonechtlalkauijkej nejua akin niiminDios. 13 Inkuapan on tepemej niman impan on tepetsitsimej, kitlatiaj kopajli niman tlauentlaliaj. Niman no ijki kichiuaj kampa onkaj kuajli itlaseuajlo on auakojtin, on álamokojtin niman oksejki kojtin.

'Yejua ika, on nemochpochuan auilnemij, niman on nemosiuamonuan tlakapapatlaj. 14 Pero nejua xnikincastigaros on nemochpochuan ipampa inauilnemilis niman on nenmosiuamouan ipampa intlakapapatlalis, pampa sano nemejuamej no ijki nenkichiuaj iminuan on siuaauilnenkej, para ijki iminuan nentlauentlaliaj, iminuan nenmotekaj on siuaauilnenkej para nenkinmauistiliaj imindioses. Nochimej nemejuamej sanoyej nentontos, niman nemochimej nemejuamej xkuajli nemontlamiskej ipan nemonemilis.

15 'Maski tejua Israel tiauilnemi, Judá maka no ma tlajtlako. ¡Nemejuamej chanejkej ne Judá makasa xuiyan ne Gilgal nion makasa xtlejkokan ne Bet-avén para nenkinmauistiliskej on ídolos; nion makasa ijkin xkijtokan ijkuak nenmotlajtolmakaj: 'pampa nemi toTEKO, nikprometeroua nikchiuas in tlen yonikijtoj'! 16 On israelitas sanoyej tsontekonchikajkej. ¡Yejuamej más tsontekonchikajkej xken sen mula! Pampa ijkon nouikaj, ¿kinemiliaj ika nejua akin niiminTEKO nikincuidaros ken kincuidarouaj on borreguitos ipan on kualtetsin sakayoj? 17-18 On ichanejkauan Israel yonotemakakej intech on ídolos para kinmauistiliaj. ¡Semi yonixpolojkej! ¡Nochimej yoxixinkej kenon tlajtlauankej! Yejuamej xyolajsij ika auilnemij; yejuamej xkinekij ma kintlakaitakan, yej kinekij kichiuaskej tlinon tepinajtij. 19 ¡Yejua ika sen ajkomalakotl kinuikas, niman yejuamej pinauaskej pampa kinmauistiliaj on ídolos!