ToTEKO kinteixpanuiya itlayekankauan Israel
5
'Xkakikan yejua in, nemejuamej tiopixkej; kuajli xkakikan, nemejuamej yejuan nenitlayekankauan on israelitas; niman no xkakikan nemejuamej, yejuan ken nenkitaj on rey. Nejua nenmechtlajtlakolmaka pampa onenkinkajkayajkej on israelitas para okinmauistilijkej ídolos ne Mispa niman ipan on tepetl Tabor. 2 Nemejuamej nenkichiuaj ken nenkichkuaskiaj sen uejkatlan tlaltekontli ipan iixtlauayo Sitim para nenkintlatlaliliaj notlapejpeniluan. Yejua ika nejua nemechcastigaros nenmochimej. 3 Nejua kuajli nikmatstikaj ken nemouikaj nemejuamej israelitas. Nemejuamej nenmouikaj ken sen siuaauilnenketl yejuan kajteua iueuentsin para iuan onnoteka okse tlakatl. Ijki yonenmijtlakojkej.4 'On tlinon xkuajli kichiuaj on israelitas, xkinkauilia ma nokuepakan notech nejua akin niiminDios. Yejuamej xuelij kajkauaj on auilnemilistli; yejuamej xkinekij nechseliskej ken niiminTEKO. 5 On inoueyimatilis Israel sano yejua kiteixpanuiya; Israel niman Efraín uetsis ipampa on tlinon xkuajli kichiuaj, niman inuan yejuamej, hasta Judá no uetsiskej. 6 Iminuan iminborregos niman iminuakaxuan yaskej kitejtemojtinemiskej ToTEKO para kimauistiliskej, pero xkinextiskej pampa yejua yokintlalkauij. 7 On israelitas yokitlalkauijkej toTEKO, niman on inkoneuan, toTEKO xkinselia ken ikoneuan. Ipampa on tlinon xkuajli okichijkej on israelitas, san se metstli kuikas ika imintlal kinxoxotoniliskej.
On castigo yejuan kiselis Israel niman Judá
(5.8 - 8.14)
On israelitas yejuan chantij ne Israel niman Judá nouisokij
8 '¡Xpitsakan on kuakuautli ne Gabaa niman xpitsakan on tlapitsajli ne Ramá para ma kitemachisti ika onyas nouisokilistli! Xtsajtsitiakan ne Bet-avèn, xkijtojtiakan on tlinon xkuajli ipan nochiuas on ueyikalpan! ¡Xkinmojkamiktikan on inuejkakoneuan itribu Benjamín! 9 Nejua nikinmachistia itribus Israel on tlinon melauak impan nochiuas: Israel kixoxotoniskej ipan on tonajli ijkuak nicastigaros."
10 ToTEKO kijtoua: "Itlayekankauan Judá kichiuaj kenon tlachtekej yejuan kinmejkuaniaj on neskayomej kampa teuan notlalnamikij para más kueyiliaj imintlal. ¡Yejua ika, nejua impan nikontitlanis noueyitlauel, ken nikontitlaniskia sen temojtij apachiuilistli! 11 Niman on yejuan chantij ne Israel sanoyej tlajyouiyaj. Xok kiseliaj on tlen kuajli yejuan kitocaroua kiseliskej pampa yokitlalijkej ipan inyojlo ika sanken kinmauistiliskej on yejuan xmelauak dioses. 12 'Nejua tej, para on chanejkej ne Israel, niyes kenon pochanuistli yejuan kikua on lana, niman para on chanejkej ne Judá niyes kenon palanilistli yejuan kipalanaltia on kojtli.
13 'Ijkuak itlayekankauan Israel niman Judá okitakej ken sanoyej okualokej on inchanejkauan, yejuamej okintitlankej intlajtojkauan ne Asiria para kitlajtlaniliskej on ueyixtikaj rey ma kimpaleui. Pero yejua xouel okimpaleuij; xouel itlaj okichiu para ma kimpajtikan on tlakamej. 14 Ijkon ken sen león ipan chapani sen yolki niman kitlankojkotona, nejua no ijki nikchiuilis Israel niman Judá; nejua nikinuikas niman xakaj uelis kinmanauis.
15 'Kemaj ninokuepas kampa nejua ninemiyaj, hasta kaman yejuamej kijtoskej ika melauak yejuamej tlajtlakolejkej niman kemaj nechajtejtemoskej. ¡Ijkuak yejuamej sanoyej tlajyouiyaj, ijkuakon kemaj nechtejtemoskej!"