In tiotlajtojli yejuan kijtoua tlinon nochiuas ipan on sa ika nochi tonaltin
12
'Ipan on tonaltin uajlas Miguel, on ueyixtikaj ángel tepaleuijketl yejuan kinmanauiya on mochanejkauan israelitas. Ijkuakon sanoyej onyas temojtij tlajyouilistli. On tlajyouilistli yes kenon yejuan xkaman oonyak desde ijkuak opeu onokej on naciones. Ijkuak yejkos on tonajli, makisaskej nochimej mochanejkauan yejuan intoka tlajkuilolnestikaj ipan on amamoxtli, yejuan kijtoua akinomej kipiyaj on yenkuik nemilistli para nochipa. 2 Miyekej yejuan yomikkej, yejuan nemij ipan intlalkon, oksejpa yoliuiskej: sekimej para nochipa nemiskej, niman oksekimej para nopijpinajtiskej niman para nochipa tlajyouiskej. 3 On tlakamej tlamatkej, yejuan okiyekankej miyek tlakatl ipan kuajli ojtli, petlaniskej kenon istak moxtli ipan cielo. ¡Petlaniskej kenon sitlalimej yejuan petlanij para nochipa! 4 Pero tejua Daniel, xkichtakaejeua nochi in tlajtoltin ipan on amamoxtli niman xsellaro para maka yakaj ma kajsikamati, hasta ma ajsi on sa ika nochi tonajli. Miyekej sa nochiuiyan kistinemiskej kitejtemoskej tlaixmatkilistli, pampa kinekiskej más tlamach kimatiskej. Niman on tlaixmatkilistli más miyekiyas."5 Nejua Daniel, onikintak okse omemej tlakamej yejuan ijkayaj inajnakastlan on río. Se ijkaya ipan ilado kampa nejua ninemiya, niman on okse ijkaya ipan okse ilado on río. 6 Niman semej in tlakamej okitlajtoltij on tlakatl yejuan itlaken tlachijchijtli katka ikan lino, yejuan ijkaya tlakpak ixko on atl de on rìo:
—¿Kamanon tlamis nochiuas nochi in tlajtlamach yejuan sanoyej tetlatlachaltij?
7 'On tlakatl tlakemej ikan lino okintelkets imauan ipan cielo, niman ikan iyektokatsin on Dios yejuan nochipa nemi, ijkin okijtoj:
—Ipan yeyi xipan uan tlajko, ijkuakon tlamis ika kintlaueltokatinemiskej on iyektlapejpeniluan Dios, niman ijkon tlamis nochi in tlajtlamach.
8 Nejua onikak tlinon okijtoj, pero xitlaj* onikajsikamat. Yejua ika, nejua oniktlajtoltij:
—Noteko, ¿kenijki ontlamis nochi in tlajtlamach?
9 Niman yejua onechnankilj:
—'Daniel, xuiya ipan moojui, pampa in tlajtlamach* noneki ichtaka onyas hasta ma ajsi on sa ika nochi tonajli. 10 Miyekej kijyouiskej miyek tlajtlamach tlen yonijtoj, niman ikan nochi on, yejuamej yolchipauiskej niman noyolchikauaskej. Pero on xkuajkualtin tlakamej saken kichiuaskej on tlen xkuajli, niman xkajsikamatiskej on tlen nikan tlajkuilolnestikaj. Pero on tlakamej yejuan tlamatkej nochi kajsikamatiskej.
11 'Panos 1,290 tonajli desde ijkuak on tiopixkej xok kinkauiliskej ma kuentlalikan on uentin yejuan mojmostla kuentlaliaj, niman ipan on ueyitiopan yej kitlaliskej itlaj yejuan sanoyej tetlajyeloj. 12 Sanoyej ma paki on yejuan tlamacha niman yolmelajkanemi hasta panos on 1,335 tonajli. 13 Pero tejua Daniel, xnejnemi ipan moojui hasta ijkuak tlamis monemilis niman timikis, pampa ipan on sa ika nochi tonaltin oksejpa tiyoliuis para tikselis motlayokolil.”