11
'Nejua onikyoleu niman onikpaleuij Miguel, ijkuak Darío, rey de Media, kuikaya se xipan ika tlamandarouaya ken rey.2 Niman aman nimitsititis on tlen melauak yejuan nochiuas.
On rey de Siria niman de Egipto
'Nemiskej yeyimej reyes màs yejuan tlamandaroskej ne Persia yejuan onopatlatiaskej. Kemaj ijkuak tlamis tlamandaroskej, uajlas okse rey yejuan ika naui yes. In rey más rico yes xken on yeyimej reyes yejuan achtoj panoskej. Niman ijkuak in rey sanoyej yoricojtiak, niman kipiyas miyek poder, kisentlalis miyek tlakatl para kuijsokis on rey de Grecia. 3 Pero más sakin* tlamandaros sen rey yejuan sanoyej uelis tlauijsokis. Yejua kichiuas para sanoyej ueyiyas on ireino, niman kichiuas nochi tlen yejua kinekis. 4 Pero ijkuak on rey kipiyas màs poder, yejua mikis. Kemaj on ireino xexeliuis naukan. Iueyipoder in rey yejuan sanoyej kojtitias, xintech nokauas ikoneuan. No ijki on ireino xok kipiyas on poder ken achtoj, pampa kinoxexelouiliskej oksekimej reyes niman yejuamej tlamandaroskej.
5 'On rey de Egipto kajsitias más poder. Pero se on isoldadojtlayekankau nochiuas sen rey niman tlamandaros ipan sen más ueyi reino. 6 Pero tla yopanok keski xipan, irey Egipto niman on rey de Siria nonotsaskej niman kichiuaskej sen pacto. On rey de Egipto, kimakas ichpoch on rey de Siria, para iuan nonamiktis, para ijkon melauak xkipiyaskej tlauejli on omemej naciones. Pero on yolseuilistli yejuan kinemiliayaj kipiyaskej, xijki kisas, pampa on siuatl niman ikoneu, niman iueuentsin inuan itekitkauan, kinmiktiskej. 7 Pero se yejuan ken kita on siuatl, nochiuas rey ne Egipto, niman yejua iuan miyekej isoldados, konuijsokiskej on rey de Siria. Yejuamej kalakiskej ipan on ueyikajli kampa chantij isoldados on rey de Siria, niman kintlaniskej. 8 Niman ijkuak nokuepaskej Egipto, kinuajkiskej on dioses de tespostli niman nochi on tlajtlamach tlachichijtli ikan oro niman ikan plata. Sakin, ijkuak yopanok keski xipan ika on omemej naciones xnouijsokiskej, 9 on rey de Siria, kinekis kinoyaxkatis on ireino Egipto, pero xuelis kitlanis. Yejua ika, oksejpa nokuepas para ichan.
10 'Pero ikoneuan on rey de Siria, notlatlajtlaliliskej para yaskej ipan on nouijsokilistli, niman kinsentlaliskej sanoyej miyekej soldados. Semej yejuamej iuan miyekej isoldados yaskej para konnoyaxkatiskej on ireino Egipto. Yejuamej yaskej ken itlaj sen ueyitemojtij río yejuan yopankis, niman nochi kixoxotoniskej. Ajsiskej hasta ipan on ueyikajli kampa nemij isoldados on rey de Egipto. 11 Ijkuak on soldados de Siria kinekiskej kalakiskej Egipto, on rey de Egipto sanoyej kualanis, niman kisas iuan miyekej isoldados para kominixnamikiskej on intlauelikniuan, niman kintlaniskej. 12 Niman ika on itetlanilis, pampa sanoyej miyek itlauelikniu kimiktis, sanoyej noueyimatis. Pero on itetlanilis xuejkauis kipiyas, 13 pampa on rey de Siria kisentlalis más miyekej soldados xken okinsentlalijka achtoj. Niman kemaj ijkuak yopanok keski xipan, oksepa kuijsokis on rey de Egipto, pero aman kuijsokis inuan más miyekej soldados ikan miyek armastin.
14 'Ijkuak ijkin nochiuas, miyekej kixnamikiskej on rey de Egipto. Intsajlan on yejuan teixnamikiskej, ompa teuan nemiskej tlakamej sanoyej tlauelejkej de Israel, ijkon ken otikitak ipan sen tlatlachalistli, pero xtetlaniskej ken yejuamej kinemiliayaj. 15 On rey de Siria uajlas, niman isoldados kinchijchiuaskej escaleras de tlajli para ika uelis tlejkoskej ipan on tepanchinantli iyeualkan on ueyikalpan, niman kinoyaxkatiskej on ueyikalpan. Hasta on soldados yejuan más uelij tlauijsokij, xueliskej kinteltiskej on soldados yejuan intlauelikniuan. 16 On rey de Siria yejuan teuijsokis kichiuas nochi tlen yejua kinekis, niman xakaj uelis kixnamikis. Niman nokauas ipan on Kualtetsin Tlajli de Israel, niman kipiyas poder para nochi kixoxotonijtias. 17 On rey de Siria kinejnemilis kenijki kitlanis on rey de Egipto. Niman para kitlanis, kichiuas sen pacto iuan on rey niman kimakas ichpoch para iuan nonamiktis, pampa kinemilia ijki uelis kixoxotonis ireino. Pero on ken kinemiliaya kichiuas xijki kisas. 18 Kemaj, peuas kinuijsokis on uejueyikalpamej yejuan onokej itenko on mar. Niman miyekej uejueyikalpanmej kintlanis niman kinnoyaxkatis, pero sen ueyixtikajsoldado tlayekanki kiteltlalis on inoueyimatilis. Niman ijkon sanoyej kipijpinajtis on rey de Siria. 19 Kemaj on rey de Siria nokuepas ipan ipaís kampa kinemilis niyanas ipan on ueyikajli kampa nemij soldados, pero ipan iojui kuetlajxiuis niman xok uelis ajsis, niman xokaman más kimatiskej de yejua.
20 'Kemaj kalakis okse rey yejuan kipatlas, yejuan kititlanis sen tlakatl para kinchiualtis on chanejkej yejuan kintlankapiya ma kitlaxtlauakan miyek impuestos para ricojtis ireino. Pero ipan keski tonajli kimiktiskej, pero xkimiktiskej ipan guerra.
21 'Sakin de in rey, tlamandaros se yejuan sanoyej xkuajli rey yes, yejuan nion xkimelauaskia rey yes. Yejua kiyanas on ixkuajlitlamachilis de on tlen kinemilia kichiuas, niman kinoyaxkatis* on reino ikan tlakajkayauilistli. 22 In rey de Siria kinmiktis nochimej on yejuan kinekiskej kixnamikiskej, niman hasta on ueyixtikaj tiopixki tlayekanki yejuan okichiu on pacto, no teuan kimiktis. 23 No ijki, kinkajkayauas on oksekimej naciones yejuan iminuan kichiuas sen pacto de tlajsojkaiknijtin. Niman maski san keskimej soldados kimpiyas para teuijsokis, yejua tetlanis. 24 Ijkuak xakaj kichixtias, yejua kalakis ipan on uejueyitlalpanmej kampa más ricojpan, niman kichiuas tlen sanoyej xkuajli yejuan nion iuejkatajuan xokichijkej. Isoldados kinxexelouilis on tlajtlamach niman on riquezas yejuan kitekuilis ipan on tlauisokilistli. Kuajli kinejnemilis kenijki kinuisokis on uejueyikalpanmej yejuan yeualtsakutokej ikan tlakpak tepanchinantli. Pero yejua xuejkauis ika kintlankapiyas on uejueyikalpanmej.
25 'Pampa kinemilis ika sanoyej yolchikauak niman kipiya poder, kisas konuijsokis on rey de Egipto iminuan sanoyej miyekej isoldados. Pero on rey de Egipto notlakatechijchiuas niman kixnamikis ikan miyekej isoldados yejuan sanoyej kojtikej. Pero in rey de Egipto ipan nokuepaskej. Yejua ika xuelis kixnamikis on itlauelikniu. 26 Sano yejuamej on itenotskauan yejuan iminuan tlakuaya ipan imesa, ipan nokuepaskej niman kuijsokiskej. Miyekej isoldados kintlaniskej niman miyekej mikiskej. 27 Kemaj, in omemej reyes yejuan kinekij kinoyaxkatiskej on reino, niman kinekij kinochiuiliskej tlen xkuajli, notlaliskej para tlakuaskej san sekan ipan sen mesa, niman noijliskej tlen xmelauak. Pero xijki kisas ken cada se kineki ma nochiua, pampa xe ajsi on tonajli para ijki nochiuas. ###<**She wants to remove "want". Why?> 28 On rey de Siria, nokuepas ipan ipaís ika miyek riquezas yejuan kinoyaxkatis* ipan on guerra. Pero achtoj kinekis kipopolos on pacto yejuan okichijkej on israelitas iuan Dios. Yejua kichiuas nochi tlen yokinemilijka kichiuas, niman kemaj nokuepas ipan ipaís.
29 'Ijkuak ajsis on tonajli ken ye onkaj kamanon yes, oksejpa kinuikas isoldados para konuijsokiskej Egipto, pero aman xok tetlanis ken achtoj onochijka. 30 Xok tetlanis pampa yejkoskej barcos yejuan ualeuaskej kampaka ikalakiyan tonaltsintli, niman sanoyej miyekej soldados kinuajuikaskej para kinmixnamikiskej on soldados de Siria. Kemaj, on soldados de Siria nomojtiskej niman nokuepaskej inchan. Pero on rey de Siria antes yas ichan kinekis notlauelkixtis ika on pacto yejuan okichiu Dios inuan itlapejpeniluan, niman hasta kintlaxtlauilis on yejuan kitlalkauiskej intlaneltok itech Dios.
31 'Isoldados on rey de Siria, kijtlakoskej ika intlajtlakol on ueyitiopan niman itepanchinanuan on ueyikalpan. No ijki, on soldados xok kinkauiliskej on tiopixkej ma kuentlalikan on uentin yejuan mojmostla kuentlaliaj, niman ipan on ueyitiopan, on soldados yej kitlaliskej itlaj yejuan sanoyej tetlajyeloj. 32 Ikan kualtsin tlajtoltin, on rey kinyekteneuas on yejuan xok nouikaj ken ipacto Dios tlanauatia, pero on yejuan kitlasojtlaj toTEKO noyolchikauaskej niman melajkanemiskej. 33 On yejuan tlamatkej* ompa tetsajlan nemij, miyek tlakatl kimachtiskej, pero kemaj miyekej kinmiktiskej, noso kintlatiskej, kinmichtekiliskej nochi tlen inyaxka; sekimej kinuikaskej ken esclavos ipan okseki países. Yejua in uejkauis keski xipan. 34 Ijkuak yejkos on tonajli ika kintlaueltokatinemiskej, yakaj kimpaleuis maski achijtsin. Pero miyekej yej intech panoskej san pampa kinekij itlaj kiseliskej. 35 Sekimej on tlamatkej yejuan temachtiayaj, kintlaueltokatinemiskej niman kintlajyouiltiskej. Pero on intlajyouilis ika yolchipauiskej niman ika más yolmelajkanemiskej hasta ijkuak ajsis on tonajli ijkuak Dios kichiuas nochi, ijkon ken yejua yokitlalij.
36 'On rey de Siria kichiuas nochi on tlen yejua kinekis. Yejua tej, sanoyej noueyimatis hasta kinemilis ika más ueyixtikaj xken nochimej on dioses, niman kijtos miyek tlajtoltin yejuan ika kuijuikaltis Dios. Niman nochi tlen kichiuas kuajli kisas ken yejua kinekis, hasta ijkuak Dios kuajtitlanilis on castigo, pampa on tlen Dios yokijtoj kichiuas, ika onkaj kichiuas. 37 On rey xkintlakaitas nion on dioses de iachtotajuan, nion on dioses yejuan kinmauistiliaj on siuamej, nion yakaj okse dios, pampa yejua kinemilis ika san yejua más ueyixtikaj xken nochimej on dioses. 38 Pero yej kemaj kimauistilis on dios yejuan miyekej kinemiliaj kinmanauiya on uejueyikalpanmej yejuan yeualtsakutokej ikan tepanchinantli, on dios yejuan iachtojtajuan xokimauistilijkej. Itech yejua in dios kiuentlalis oro, plata, on tetsitsimej yejuan sanoyej kualtsitsimej niman tlajtlamach yejuan sanoyej patioj. 39 Para kinmanauis on uejueyikalpanmej yejuan okintlan, niman yejuan yeualtsakutokej ikan tepanchinantli, kinchiualtis ma kipaleuikan on yejuan kinmauistiliaj dioses yejuan xkinmixmatij. Niman nochimej on yejuan kiseliskej ken iminrey, yejua kinmakas ueyi tetlakaitalistli, kintlalis ipan uejueyi tekiuajyotl niman kinmakas tlaltin ken tlaxtlauijli.
40 'Ijkuak ajsis tonajli para tlamis nochiuas on ken ones ipan on tlatlachalistli, on rey de Egipto kisas niman konuijsokis on rey de Siria. Pero on rey de Siria yas konixnamikis, niman ken itlaj ajakakiautli ipan yas on rey de Egipto. Kitemiltis on país de Egipto ikan carretas de nouijsokilistli, ikan soldados yejuan caballojyetiuij niman ikan miyekej barcos. Yejua kinnoyaxkatis miyekkej países niman kimpopolojtias ken kichiua on apachiuilistli. 41 No ijki, kalakis ipan on kualtetsin Tlajli de Israel niman kimiktis miyek tlakatl. Pero san nomanauiskej on chanejkej ipan on países Edom, Moab, niman sa ken nochimej yejuan chantij ipan on ueyitlalpan Amón. 42 Isoldados kinoyaxkatiskej oksekimej países, niman nion Egipto xuelis nomanauis. 43 Kinoyaxkatiskej on tlen más patioj kipiya Egipto, on tlajtlamach de oro, de plata, niman nochi tlen ompa onkaj yejuan kualtetsitsimej. Kemaj, kej yaskej konnoyaxkatiskej on país Libia niman Etiopía. 44 Pero kemaj on rey kimachistiskej ijtlaj ye nochijtikaj kampaka ikisayan tonaltsintli niman kampaka norte. Ijkuakon, yejua sanoyej nomojtis. Yejua ika, amanaman kisas tlauelmiktias para konmiktis miyek tlakatl. 45 Niman kitlalis icampamento de rey ipan on tlajko ojtli yejuan ualeua itech on mar, niman ajsi itech on kualtetsin yektepetl. Pero yejua ompa mikis niman xakaj uelis kipaleuis.