Daniel okipix sen tlatlachalistli ken itemikpan itech on río Tigris
10
Ijkuak Ciro, rey de Persia, kipiyaya yeyi xipan ika tlamandarouaya ken rey, Daniel, (yejuan no itoka katka Beltsasar), okititijkej ipan sen tlatlachalistli on tlen nochiuas. On tlen okititijkej melauak onochiu, pero on tlen okitak sanoyej ouijtikaj katka para kajsikamatis. Pero Daniel okichiu kanika para okajsikamat niman ouel kuajli okimat tlinon kijtosneki on tlen okitak ipan on tlatlachalistli.2 "Ipan on tonaltin, nejua, Daniel, sanoyej oninajman yeyi semana. 3 Nejua, xonikuaj on tlakuajli yejuan más uelik, nion xonikuaj nakatl, nion xonikonik vino, nion xoninotlalilij ajuiyalistli, yej hasta ijkuak yopanok on yeyi semana. 4 Ipan on ika sempoajli uan naui tonajli de on achtoj metstli de on xipan, nejua ninemiya itempan on ueyi río Tigris. 5 Kemaj san amanaman onikitak sen angel, yejuan tlakemej katka ikan tela de lino, ixijlanilpikau de oro yejuan más kuajli. 6 Itlalnakayo petlaniya ken itlaj on tetl topacio, niman ixayak petlaniya ken tlapetlanajli, ixtololojuan katkaj ken okopiltin yejuan kauantokej, imauan niman ikxiuan petlaniyaj ken bronce yejuan petstik, niman itlajtol kakistiya ken kampa sanoyej tojlan.
7 'On tlatlachalistli san nejua ouel onikitak. Sekimej yejuan ompa nouan nemiyaj xitlaj* okitakej, pero maski xitlaj okitakej, sanoyej onomojtijkej, niman onotlajtlalojkej* oniyanatoj. 8 Noselti onechkajkej, yejua ika noselti onikitak on ueyi tlatlachalistli. Nejua sanoyej oninomojtij, hasta oniixistaleu niman xok nikojtik katka. 9 Ijkuak onikak otlajtoj on tlakatl, onisotlau niman oninixakamanteuets ipan tlajli. 10 Kemaj akinonon onechkuiteu ikan ima, hasta kaman ouel oninokojtilij ikan nomauan niman noteteponuan. 11 Niman yejua onechijlij: 'Daniel, akin Dios sanoyej kitlajsojtla, kuajli xkaki tlinon nimitsijlis: xmokuiteua, pampa Dios onechajtitlan para ma nimitsitaki.'
'Ijkuak ijkon onechijlij, nejua nimantsin oninotelkets, maski nikuekuetlakaya. 12 Kemaj yejua onechijlij: 'Maka xmomojti Daniel, pampa ipan on achtoj tonajli ijkuak tejua tiknekiya tikajsikamatis on tlajtlamach* tlen ouijtikaj, niman tejua otimoknelij ixpan moDios, yejua omitskak ijkuak otimoueyikatsajtsilij. Yejua ika, nejua oniuajlaj. 13 Pero on xkuajli tlayekanki ángel de ireino on país Persia, sempoajli uan se tonajli xonechkauilij ma niuajla. Pero Miguel, semej on ángeles tlayekankej yejuan más uejueyixtokej, onechpaleuijko, pampa san nejua yoninokajka iuan on xkuajli ángel intlayekankau on reyes de on país Persia. 14 Yejua ika, ouel oniualaj onimitsijliko on tlinon más sakin impan nochiuas mochanejkauan, pampa on tlatlachalistli yejuan otikitak, yejua nochiuas más sakin.'
15 'Chika sanken ijkon nechijlijtikatka, nejua oninotsonakapiloj niman nitlachixtikatka ipan tlajli, niman xok ueliya nitlajtouaya. 16 Pero yakaj yejuan tlajtlachaya ken sen tlakatl okiteloj noten. Kemaj, onitlajtoj niman onikijlij: 'Noteko, on tlatlachalistli okichiu para sanoyej ma ninomojti niman para makasa ma nikojtik. 17 ¿Kenijki, nejua akin nimotekipanokau, niuelis mouan nitlajtlajtos tla xok nikojtik niman hasta xok ueli ninijyotia?'
18 ''Kemaj on yejuan tlajtlachaya ken sen tlakatl, oksejpa onechkitskij, niman onechmakak yenkuik chikaualistli. 19 Niman kemaj onechijlij: 'Maka xmomojti nion maka xmokuaajmana. Dios mitstlajsojtla. ¡Xmoyolchikaua niman maka xmomojti!'
'Chika yejua nechnojnotsaya, onikmat ika nikajsitiaya chikaualistli, niman onikijlij: 'Noteko, chika yotinechmakak chikaualistli, xnechijli itlaj.'
20-21 'Kemaj yejua onechijlij: '¿Tikmati tline onimitsitako? Oniuajlaj para nimitspantlantilis on tlen tlajkuilolnestikaj ipan on amamoxtli kampa nestikaj on tlen melauak. Kemaj oksejpa nias para iuan ninouijsokis on xkuajli ángel itlayekankau Persia. Niman tla yotlan iuan ninouijsoki, kej uajlas on xkuajli ángel itlayekankau Grecia. Ijkuak iuan ninouijsokis, san nechpaleuis Miguel, on kuajli ángel yejuan itlayekankau Israel.