Daniel noueyikatsajtsilia ipampa Israel
9
'Darío, ikoneu Asuero, yejuan teuejkakoneu katka intech on medos, tlamandarouaya ipan on iminreino on Babilonios. 2 Kuikaya se xipan ika tlamandarouaya, ijkuak nejua Daniel, oninomachtij on amamoxtli de on tiotlajtojketl Jeremías, kampa kijtoua ika Jerusalén kixoxotoniskej, niman uejkauiskia xoxotontoskia setenta xipan. Ijkon toTEKO yokijlijka on tiotlajtojketl. 3 Yejua ika, nejua oninoueyikatsajtsilij chikauak niman onikiknotlajtlanilij toTEKO Dios impampa itlapejpeniluan. Oninosau, oniknokentij ajmankatlakentli, niman oninotlalij ipan tlikonextli. 4 Oninoueyikatsajtsilij niman oninoyolkuitij ika in tlajtoltin:'NoTEKO Dios akin tiueyixtikaj niman tikpiya nochi poder, tejua nochipa tiktemaka on tlen tikprometeroua, niman tikintitia ika tinkintlajsojtla on yejuan mitstlajsojtlaj niman kitlakamatij motlanauatiluan. 5 Yotitlajtlakojkej; yotikchijkej tlen xkuajli; yotimitstlalkauijkej; xipan otimitsitakej; otiktlalkauijkej motlanauatiluan, niman xotikchijkej on tlen titlanauatia. 6 Xotiknekej otikakej on tlen kijtouayaj on tiotlajtojkej yejuan motekipanojkauan, yejuan ika motokatsin okinnotskej on toreyes, totlayekankauan niman on toachtojtajuan, niman nochimej on israelitas.
7 'Tejua toTEKO, nochipa tiyolmelajki, pero tejuamej yejuan tijudíos sanoyej titepinajtianimej pampa sanoyej titlajtlakolejkej. Titochimej titepinajtianimej, sanken yejuan chantij Jerusalén niman on oksekimej israelitas yejuan chantij Judá niman tejuamej yejuan tinemij uejka ipan oksekimej países kampa tejua otitechtotokak pampa xotimitstlakamatkej. 8 ToTEKO, tejuamej, on toreyes, on totlayekankauan niman on toachtojtajuan, sanoyej tipinauaj ika otitlajtlakojkej mixpan. 9 Pero tejua, toDios, titeikneliani niman titetlapojpoluiya maski xtimitstlakamatij nion xipan timitsitaj. 10 Tejuamej xotiknekej otimitskakkej toTEKO Dios, nion xotikintlakamatkej motlanauatiluan yejuan otitechmakak intechkopa on tiotlajtojkej yejuan motekipanojkauan. 11 Tinochimej tejuamej yejuan tiisraelitas xotiktlakamatkej motlamachtiluan, niman xotiknekej otikchijkej on tlen otitechnauatij. Yejua ika, topan ouets on tlauelijli niman tlajyouilistli yejuan tlajkuilolnestikaj ipan on ley yejuan okijkuiloj motekipanokau Moisés, pampa otitlajtlakojkej mixpan. 12 Tejua, ijkuak otitechajtitlanilij in castigo, oticumpliroj on tlen otitechijlij topan nochiuas niman impan nochiuas on yejuan techmandarouaj. Melauak tej, xkaman ijkin nochiuaya ipan in tlaltikpaktli ken aman in castigo ipan ouets in ueyikalpan Jerusalén. 13 Maski ye topan nochijtikaj in tejmotij tlajyouilistli ijkon ken tlajkuilolnestikaj ipan itlanauatil Moisés, tejuamej xtimitstejtemouaj toTEKO Dios, nion xtikintlalkauiyaj totlajtlakoluan, niman xtiknekij tikakiskej on tlen melauak yejuan tejua titechijlia. 14 Yejua ika, tejua toTEKO, ye tikpiyaya listo in castigo yejuan topan ouets, pampa tejua tikchiua nochi tlen melajki, niman tejuamej xtiknekij timitskakiskej.
15 'Tejua toTEKO Dios, otikinkixtij motlapejpeniluan ne Egipto ikan moueyipoder, yejua ika aman nochiuiyan mitsixmatij, desde ijkuakon hasta aman. Pero tejuamej otitlajtlakojkej niman otikchijkej on tlen xkuajli. 16 ToTEKO, tejuamej tikmatij ika tiyolmelajki niman titeiknelia. Timitsiknotlajtlaniliaj, xkejkuani motemojtijtlauel ipan Jerusalén, pampa Jerusalén yejua moueyikalpan, yejuan onkaj ipan moyektepeu. Nochi tlakatl de nochimej naciones yejuan nanika nisiu chantij, kipijpinauiyaj Jerusalén niman kimpijpinauiyaj motlapejpeniluan, ipampa totlajtlakoluan niman intlajtlakoluan toachtojtajuan.
17 'NoDios, xkaki nooración niman on tlen nimitstlajtlanilia nejua akin nimotekipanojkau. Para mitstlakaitaskej, noTEKO, xkita ikan motetlajsojtlalis* nochi tlen teajman yejuan ipan yonochiu moyektiopan.
18 'NoDios, xtechkaki niman xtechalita ken teajman tinemij, niman xkita ken xoxotontok on ueyikalpan kampa mitsyekteneuaj motokatsin. Xtimitsiknotlajtlaniliaj pampa kuajli titouikaj, yej timitsiknotlajtlaniliaj san ipampa moueyiteiknelilis.
19 '¡ToTEKO, xtechkaki! ¡ToTEKO, xtechtlapojpolui! ¡Topan xuajtlacha, niman xuajla xtechpaleuiki para tikselis tetlakaitalistli noDios, niman ipampa moueyikalpan niman impampa motlapejpeniluan yejuan mitsyekteneuaj, maka xmouejkaua! '
Tiotlajtojli itechkopa on setenta semanas
20 'Nejua sanken ninoueyikatsajtsilijtikatka niman ninoyolkuitijtikatka ikan notlajtlakoluan niman intlajtlakoluan on nochanejkauan israelitas, niman nikiknotlajtlanilijtikatka noTEKO Dios ipampa on iyektepeu Jerusalen. 21 Sanken ninoueyikatsajtsilijtikatka, ijkuak Gabriel, on ángel yejuan yonikitaka ipan on achtoj tlatlachalistli, oualaj ouajpatlantiaj kampa ninemi. Ijkuakon, ye ajsitikatka on hora ijkuak on tiopixkej kiuentlaliayaj on uentli yejuan kitemakayaj tiotlak. 22 Niman yejua onechijlij: 'Daniel, nejua oniuajlaj para onimitskajsikamachiltiko in tiotlajtojli. 23 Ijkuak opeu timoueyikatsajtsilia, Dios nimantsin omitsnankilij. Niman nejua oniualaj onimitsijliko on tlinon ika omitsnankilij Dios, pampa yejua sanoyej mitstlajsojtla. Aman tej, kuajli xkaki tlinon nimitsijlis, para kuajli tikajsikamatis on tlatlachalistli.
24 Dios okitlalij 490 xipan,
para on chanejkej ipan on país Israel
niman ipan on yektli ueyikalpan,
tlamis on xipanteitalistli itech Dios niman tlamis on tlajtlakojli,
para ijkon kintlapojpoluiliskej on tlen xkuajli okichijkej.
Kemaj, nochi tlakatl yolmelajkanemis para nochipa.
Ijkuakon nocumpliros on tlinon on tiotlajtojkej okitakej
niman okitiotlajtojkaitojkej
niman kitiochijkatlaliskej on kampa más tlayekkan.
25 Noneki tikmatis niman tikajsikamatis kuajli nochi in:
Desde ijkuak okis on tlanauatijli para oksejpa ma kichijchiuakan
niman ma kuejkuektlalikan Jerusalén,
hasta ijkuak yejkos on Tlayekanki Tlatiochijtli,
panos 49 xipan.
Niman ijkuak ikalpanojuiuan niman itepanuan Jerusalén oksejpa kinchijchiuaskej,
nochi on kuikas 434 xipan,
pero ijkuakon sanoyej onyas tlajyouilistli.
26 Ijkuak tlamis on 434 xipan,
kimiktiskej on Tlayekanki Tlatiochijtli.
Ijkuakon, Jerusalén niman on yektiopan
kixoxotoniskej isoldados on rey xompayejyeua yejuan uajlas.
On tlaxoxotonilistli san yejkotetsis,
ken itlaj on apachiuilistli,
niman on nouijsokilistli niman tlaxoxotonilistli ika onkaj nochiuas
hasta kaman nochi tlamis.
27 Kemaj, chikome xipan màs, on rey xompayejyeua kichiuas pacto iuan miyek tlakatl.
Pero ipan yeyi xipan uantlajko,
kinteltiskej on tiopixkej para makasa ma kitlauentlalikan Dios niman makasa ma kiuentlalilikan on yolkej.
Ipan on yektli tlaixpan,
yej kitlalis sen tetlajyeloj ídolo para ompa kitlauentlalilis,
hasta kaman yejkos on castigo
yejuan Dios yokijtoj kuajtitlanis ipan on xompayejyeua rey.' "