Daniel okipix tlatlachalistli de sen borrego niman de sen chivo
8
'Ijkuak Belsasar kipiyaya yeyi xipan ika tlamandarouaya ken rey, nejua Daniel, onikpix ika ome tlatlachalistli ken ipan notemik. 2 Ipan on tlatlachalistli, onikitak ika nejua ninemiya ipan on ueyikalpan Susa yejuan icapital on reino, niman yejuan onkaj ipan iueyitlalpan Elam, niman nokaua itempan on río Ulai.3 'Ijkuak onontlachix uejka, onikitak nemiya sen borrego itenko on río. On borrego kipiyaya ome ikuakuauuan ueueyakej, pero se ikuakuau yejuan más sakin* okis, más oueyakiyak xken on okse. 4 Onikitak ika on borrego kintejteuiyaya yolkamej +{ kampaka ikalakiyan tonajli,} kampaka norte niman kampaka sur. Niman nion sen yolki xueliya kixnamikiya, yej nochimej kintejteuiyaya. Yejua kichiuaya nochi tlinon kinekiya, niman mojmostla nochijtiaya más kojtik.
5 'Nejua sanken nitlanemilijtikatka de on tlen onikitak, niman sa onikitak ika sen chivo oualeu neka ikalakiyan tonaltsintli. Yejua sanoyej uajnotlalouaya hasta nesiya ken sa ipan ajakatl uajlaya. Yejua in chivo kipiyaya sen ikuakuau sanoyej ueyak intsajlan ixtololouan. 6 Niman ijkuak oyejkok itech on borrego yejuan achtoj onikitak itech on río, yejuan kipiyaya ome ikuakuau, sanoyej chikauak okitejteuij san kechika kojtik. 7 Okintepojpostekilij ikuakuauuan, niman on borrego xouel okixnamik on chivo. Más sankin on chivo ijkuak yokitlajkal on borrego, ipan ochojcholoj, niman xakaj ouel okimanauij.
8 'On chivo mojmostla nochijtiaya más kojtik. Pero ijkuak yejua yokajsika más poder, on ueyak ikuakuau otepostek, niman kampa kipiyaya on ikuakuau, okiskej naui ikuakuauuan yejuan ontlachixtikatkaj tlajtlaluis: se ontlachixtikatka kampaka norte, okse kampaka sur, okse kampaka ikisayan tonaltsintli niman okse kampaka ikalakiyan tonaltsintli. 9 Ipan semej on kuakuautin okis okse kuakuautli más pitentsin. Pero yejua sanoyej onoskaltij, niman ontlachixtikatka kampaka sur niman kampa ikisayan tonaltsintli, niman no ontlachixtikatka kampaka onkaj on kualtetsin tlajli de Israel. 10 Yejua in kuakuautli sanoyej onoskaltij, hasta oajsik intech on iluikaksoldados yejuan itekitkauan Dios niman okinuijsok, niman miyekej on sitlalimej okinuajxinij niman okinchojcholoj. 11 Niman in kuakuautli okixnamik on más ueyi iluikak soldadojtlayekanketl. No ijki, xokitekauilij ma tlauentlalikan mojmostla, niman okijtlakoj on yektiopan. 12 Sanoyej xkuajli tlen okichiu pampa okinnauatij isoldados ma kitlalikan incampamento ixpan on ueyitiopan kampa tlauentlaliua, niman xok okitlakaitak on tlen melauak. Okichiu nochi tlen yejua okinek, niman nochi tlen kichiuaya kuajli kisaya ken yejua kinekiya.
13 'Kemaj onikak ika sen ángel ijkin kitlajtoltiaya okse angel: '¿Hasta kamanon tlamis in tlajtlamach yejuan nochiua ipan in tlatlachalistli? ¿Keski tonajli poliui para tlamis on ika xkitekauiliaj ma tlauentlaliua mojmostla? ¿Hasta kamanon tlamis ika on iluikaksoldados niman on yektiopan kinchojcholoua?'
14 'Niman yejua ijkin okinankilij: 'Nochi yejua in xtlamis, yej hasta tla yopanok 1,150 tonaltin, ijkuak on tlaneltokaj xuelis tlauentlaliskej kualkan niman tiotlak. Hasta ijkuakon, kemaj, on yektiopan kichipauaskej.'
15 'Chika nejua Daniel, nitlanemilijtikatka de on tlatlachalistli niman niknekiya nikajsikamatis tlinon kijtosneki, san isijkapan notech ouajnonextij akinonon, yejuan nesiya ken sen tlaltikpaktlakatl. 16 Kemaj, onikak sen tlajtojli yejuan ualeuaya ijtik on río Ulai. Ijkin kijtouaya: 'Gabriel, xkijli in tlakatl tlinon kijtosneki on tlatlachalistli yejuan okitak.'
17 'Yejua onechnisiuij niman nejua sanoyej oninomojtij, kemaj oninotlakuantelkets niman oninopachoj hasta ipan tlajli, pero yejua onechijlij: 'Tlaltikpaktlakatl, kuajli xmati ika in tlatlachalistli yejuan otikitak, nochiuas ipan on sa ika nochi tonaltin.'
18 'Chika yejua tlajtojtikatka, onisotlau niman oniuetstiaj ipan tlajli. Pero yejua nopan okontlalij ima, niman onechpaleuij para oninotelkets. 19 Niman onechijlij: 'Nejua nimitsijlis tlinon nochiuas ijkuak tlamis on tiempo de itlauel Dios. Tej, on tlen otikitak kijtosneki nochiuas ipan on tonajli ijkuak tlamis in tlaltikpaktli.
20 'On borrego yejuan kipiya ome ikuakuau kijtosneki on reyes de on país Media niman de on país Persia. 21 On chivo kijtosneki on ireino Grecia, niman on ueyak ikuakuau yejuan kipiyaya itsajlan ixtololojuan kijtosneki on achtoj rey. 22 On naui kuakuautin yejuan okiskej kampa otepostek on achtoj kuakuautli, kijtosneki ika ipan on nación kisaskej naui reinos, pero xijki kojtikej yeskej kenon achtoj.
23 'Ijkuak tlamiskej tlamandaroskej in reyes, niman on tlajtlakojli sanoyej yomiyekiyak, nokuiteuas okse rey yejuan sanoyej noueyimatis niman sanoyej kimatis kenijki tlakajkayauas. 24 On rey sanoyej kipiyas poder, pero on ipoder ualeuas okse lado. Sanoyej tlaxoxotonis niman nochi tlen kichiuas kuajli kisas ken yejua kinekis. Kinmiktis miyekej on uejueyitlayekankej niman no miyekej on yejuan kineltokaj Dios. 25 Pampa sanoyej kimatis kenijki tlakajkayauas, itlakajkayaualis tetlanis. Yejua sanoyej noueyimatis, niman miyek tlakatl yejuan kinemiliaya kuajli nemi, yejua kinmiktis. On rey hasta kinekis kixnamikis on más ueyixtikaj Tlayekanki de nochimej tlayekankej, pero on ueyixtikaj Tlayekanki kitlanis.
26 'On tlatlachalistli ken temiktli yejuan otikpix de on tlen nochiuas ipan on sa ika nochi tonaltin, yomitspanextilij tlinon kijtosneki, niman on melauak, pero maka xkimijli oksekimej, pampa poliui miyek xipan para nochiuas.'
27 'Nejua Daniel, onikmat xok nikojtik niman onikualok keski tonajli. Kemaj oninokuiteu niman oksejpa onitekit ipan itekiu on nación. Pero nejua sa nikonmatstikatka on tlatlachalistli ken temiktli yejuan onikpix, pampa nejua xniueliya nikasikamati.