On nauimej temojmojtijkej yolkej
7
Ipan on achtoj xipan ijkuak Belsasar tlamandarouaya ne Babilonia, ipan sen tlayoua Daniel okipix sen tlatlachalistli ken itemikpan. Ijkuak otlachix, okijkuiloj on tlen màs okitlatlachaltij ipan itemik. In yejua okijkuiloj de on itemik: 2 "Nejua onikitak ipan notemik sen sanoyej chikauak ajakatl yejuan ouajleu de nochiuiyan ipan in tlatikpaktli, niman sanoyej chikauak koxoniaya on ueyi mar. 3 Kemaj, nauimej uejueyimej niman temojmojtijkej yolkej, yejuan sesekneka tlajtlachayaj, uajkistiayaj ijtik on mar.
4 'On achtoj yolki, tlajtlachaya ken itlaj león, pero kipiyaya imastlakapaluan ken itlaj kuaktli. Chika nejua nikitstikatka, okixtilijkej imastlakapaluan. Okajkokukej niman okitelketskej ikan ikxiuan ken yakaj tlakatl, niman itlamachilis onochiu ken itlamachilis sen tlakatl.
5 'Yejuan ika ome yolki, tlajtlachaya ken sen oso yejuan se lado de on inakastlan màs uejkapan katka, niman on okse lado de on inakastlan màs tlaltech katka. Ipan itlauan . . Ipan itlauan kipiyaya yeyi omiyelchikijtin. Niman onikak ijkin kijliaj: '¡Xuiya niman xkua nochi kech nakatl tiknekis!'
6 'Yejuan ika yeyi yolki, tlajtlachaya ken sen leopardo, pero ipan itlakayo kipiyaya naui imastlakapal. No ijki, onikitak ika kipiyaya naui itsontekon niman kimakayaj poder para tlamandaros.
7 'Yejuan ika naui temojmojtij yolki onikitak ipan on tlatlachalistli, sanoyej temojmojtij katka niman sanoyej kojtik katka. Kipiyaya itlauan de on tepostli hierro, niman sanoyej ueueyakej katkaj. Nochi kuejkuechtiliaya niman kitekojkotonaya on tlen kinkuaya. Niman ijkuak seki kixuikauaya, sa ipan chojcholouaya. In temojmojtij yolki oksekneka katka xken on oksekimej yejuan yonikintaka, pampa ipan itsontekon kipiyaya majtlaktli ikuakuauuan.
8 'Chika nikinmixtlalojtikatka ikuakuauuan, onikitak itsajlan ikuakuauuan okis okse ikuakuau más pitentsin. Niman kemaj yeyi ikuakuau okiyopeuilijkej para ompa onoskaltij on yejuan sakin okis. In ikuakuau kipiyaya ixtololojuan ken de sen tlakatl, niman no kipiyaya ikamak yejuan ika sanoyej noueyiteneuaya.
Ijkuak Dios teyolkuitis
9 'Chika sanken nikitstikatka, onikitak okintlalijkej keskimej tronos
niman sen Ueuentsin yejuan yeuejkaui nemi, ompa onotlalij.
Itlaken istak katka ken nieve,
niman itson ken lana chipauak.
On trono niman iruedas, nochi kauankikatka ikan tlitl,
10 niman sen río de tlitl kisaya ixpan.
Sanoyej tojlanmej hasta miles kitekipanouayaj.
Niman sanoyej miyekej millones ijkatikatkaj ixpan.
Kemaj on ueyixtikaj teyolkuitijketl iuan itlapaleuijkauan opeu tekitij,
niman okintlapojkej on amamoxtin.
11 'Nejua nikonitstikatka on pitentsin kuakuautli yejuan tlajtojtikatka ikan noueyimatilistli, niman chika nikitstikatka, okimiktijkej on temojmojtij yolki niman okitsojtsontekej. Kemaj okontlajkalkej tliko para ma tlatla. 12 No ijki on oksekimej temojmojtijkej yolkej okinkuilijkej poder, pero okinkauilijkej ma nemikan hasta ijkuak yejkos on tonajli para mikiskej.
13 'Nejua sanken nikitstikatka in tlatlachalistli ipan notemik on tlayoua.
'Kemaj san amanaman, onikitak yakaj uajlau ipan moxtli
yejuan tlajtlachaya ken se yejuan onochiu tlakatl.
Yejua oyaj nisiu ne kampa nemi on Ueuentsin yejuan yeuejkaui nemi
niman okuikakej hasta ixpan on Uejuentsin.
14 Niman okimakakej poder para tlamandaros,
yekteneualistli niman sen reino.
Niman nochi tlakatl de nochimej naciones,
niman nochimej on yejuan tlajtlajtouaj sesekneka tlajtoltin,
kimauistiliayaj.
Ipoder nochipa ijki yes,
xkaman nopatlas,
niman ireino xkaman kixoxotoniskej.
15 'Nejua Daniel, onikmat ika opeu sanoyej ninomojtia ipampa on tlatlachalistli; niman sa nikonmatstikatka on tlen onikitak. 16 Kemaj oniknisiuij se yejuan ompa ijkaya, niman oniktlajtlotij para ma nechijli tlinon kijtosneki on tlajtlamach. Yejua onechijlij on tlinon kijtosneki: 17 'In nauimej temojmojtijkej yolkej, yejuamej yeskej on nauimej reyes yejuan kimandaroskej in tlaltikpaktli. 18 Pero sakin, on reino kinmakaskej on yolchipajkej yejuan on ueyixtikaj Dios yokintlapejpenij, niman yejuamej tlamandaroskej para nochipa.'
19 'Kemaj nejua niknekiya más nikmatis tlen melauak itechkopa on ika naui temojmojtij yolki, yejuan sanoyej oksekneka tlajtlachaya de on oksekimej, pampa tlajtlachaya más temomojtij: kipiyaya itlauan de hierro niman istiuan de bronce. Nochi tlen kinkuaya, kintekojkotonaya niman kintolouaya. Niman nochi tlen kixuikauaya sa ipan chojcholouaya. 20 No niknekiya nikmatis más de on majtlaktli ikuakuauan, niman no de on ikuakuau pitentsin yejuan más sakin okis niman kipiyaya ixtololojuan niman ikamak yejuan ika sanoyej noueyiteneuaya. Tej, hasta nesiya ika yejua más ueyi kuakuautli katka xken on oksekimej, niman yeyi kuakuautin oyopejkej para okauilijkej ompa ma noskalti kampa okis. 21 Kemaj onikitak ika in kuakuautli pitentsin kinuisokiya on yolchipajkej itlapejpeniluan Dios, niman kintlaniya. 22 Pero kemaj oyejkok on Ueuentsin yejuan yejuekaui nemi niman okimpaleuij ikan melajkilistli on iyektlapejpeniluan on ueyixtikaj Dios. Aman yoyejkok on tonajli para itlapejpeniluan Dios tekiuajtiskej ipan on reino. 23 Niman yejua onechijlij:
'On ika naui temojmojtij yolki
sano yejua on ika naui reino
yejuan onyas ipan in tlaltikpaktli.
Yejua sanoyej oksekneka yes,
xijki yes kenon oksekimej.
Yejua kixoxotonis nochi in tlaltikpaktli;
kemaj kichojcholos niman kikuejkuechtilis.
24 On majtlaktli kuakuautin,
kijtosneki majtlaktli reyes
yejuan tlamandaroskej ipan on reino.
Sakin de yejuamej okse peuas tlamandaros,
yejuan sanoyej oksekneka yes
xken on yejuan ye nemiyaj achtoj.
Niman yejua kintlanis yeyimej de on reyes.
25 Yejua in rey kuijuikaltis on ueyixtikaj Dios.
Yejua kinuijsokis
niman kintlanis iyolchipajkatlapejpeniluan Dios;
kinekis kipatlas itlanauatiluan Dios
niman on iluimej yejuan Dios otlanauatij.
Niman on iyolchipajkatlapejpeniluan Dios kintlankapiyas
yeyi xipan uantlajko.
26 Pero on ueyixtikaj Teyolkuitijketl
iuan itlapaleuijkauan kitlajtlakolmakaskej,
niman kikuiliskej on ireino,
niman nochi kuajli kipopoloskej.
27 Niman on reino, on poder
niman on ueyilistli de nochimej on reinos
yejuan onokej ipan in tlaltikpaktli,
kinmakaskej on yolchipajkej
yejuan okintlapejpenij on ueyixtikaj Dios.
Ireino Dios onyas para nochipa,
niman nochimej in tlaltikpaktlayekankej,
kitekipanoskej niman kitlakamatiskej.'
28 'Ijkin otlan onechtlajtlajtouilij on tlajtlamach. Niman nejua Daniel, sanoyej* onimojkatlanemilij niman hasta onistaleu, pero xakaj onikijlij in tlajtlamach."