Daniel okontlajkalkej kampa nemij leones
6
On rey Darío okitak ika noneki para kitlalis 120 gobernadores ipan on uejueyitlalpanmej kampa yejua tlamandaroua. 2 No okitlalij yeyimej yejuan más uejueyitekitlachixkej para kintaskej on gobernadores ma kuajli kichiuakan intekiu, para ijkon itekiu on rey nochi kuajli kisas. Daniel katka semej de on yeyimej uejueyitekitlachixkej. 3 Pero Daniel kintlaniya on oksekimej pampa yejua más kuajli kichiuaya itekiu. Yejua ika, on rey kinemiliaya yejua kitlalis para tlamandaros ipan on nación. 4 Kemaj on oksekimej uejueyitekitlachixkej niman on gobernadores opeu kitejtemouiliaj Daniel tla itlaj xkuajli kichiua para ijki uelis kiteixpanuiskej itech on rey, pero xitlaj okinextilijkej pampa Daniel nochi kuajli kichiuaya itekiu. Yejua ika, xouelkej okiteixpanuijkej itech on rey. 5 Ijkon tej, yejuamej más kitejtemouiliayaj kenijki kiteixpanuiskej, niman ijkin okinemilijkej: "Daniel xkaman tiknextiliskej itlaj tlen xkuajli kichiua, niman ijki xuelis tikteixpanuiskej. Yej san uelis tikteixpanuiskej ika on ken yejua noueyikatsajtsilia niman kimauistilia iDios."6 Ijkon tej, on más uejueyitekitlachixkej niman on gobernadores onotlajtolmakakej para yaskej itech on rey Darío niman iuan tlajtoskej. Ijkuak oajsikej itech okijlijkej:
—¡Nochipa xueyixtia toueyirey! 7 Tinochimej tejuamej yejuan tiuejueyitekitlachixkej niman tigobernadores yejuan titlamandarouaj ipan in nación otitosentlalijkej, niman san sekan otikijtojkej para tejua ueyixtikaj rey xchayaua sen amatlanauatijli kampa kijtos ika sempoajli uan majtlaktli tonajli maka yakaj noueyikatsajtsilis itech sen dios noso itech yakaj tlakatl, yej san tejua motech noueyikatsajtsiliskej toueyirey. Yejuan xtetlakamatis, kontlajkaliskej yoltikaj kampa nemij leones. 8 Yejua ika tej, tejua toueyirey, xkijkuilo niman xfirmaro on amatlanauatijli para ijki xuelis kipatlaskej, ijkon ken tlanauatia intlanauatil on reyes de Media niman de Persia, para xakaj ueli kipopoloua.
9 Yejua ika, on rey okichijchiu, niman okifirmaroj on amatlanauatijli.
10 Ijkuak Daniel okimat ika on rey yokifirmaroj on amatlanauatijli, oyaj ichan, okitlapoj iventana yejuan ontlapojtikaj imelajkan Jerusalén, niman onotlakuantelkets para onoueyikatsajtsilij niman okimauistilij Dios. In kichiuaya yexpa mojmostla, ijkon ken nochipa nouikaya.
11 Kemaj on uejueyitekiuajkej san sekan oyajkej ichan Daniel, niman okinextitoj noueyikatsajtsilijtikaj niman kimauistilijtikaj iDios. 12 Yejuamej nimantsin onokuepkej itech on rey niman okijlitoj de on amatlanauatijli. Ijkin okijlijkej:
—Toueyirey, tejua otikchayau sen amatlanauatijli, kampa kijtoua ika sempoajli uan majtlaktli tonajli, tla yakaj noueyikatsajtsilia itech sen dios noso itech sen tlakatl, niman xtejua motech toueyirey, ika onkaj kontlajkaliskej yoltikaj kampa nemij leones. ¿Xmelauak ijki otitlanauatij?
On rey otenankilij:
—Kemaj melauak ijki. Niman on amatlanauatijli onochiu ijkon ken tlanauatia intlanauatil on reyes de Media niman de Persia, para xakaj ueli kipopoloua.
13 Kemaj okijlijkej:
— Daniel yejuan teuan okuajuikakej de Judá, xmitstlakaita toueyirey, nion xkitlakamati on amatlanauatijli yejuan otiktlalij. Tejuamej otikitakej ika yejua mojmostla yexpa noueyikatsajtsilia itech iDios.
14 Ijkuak on rey ijkin okak, sanoyej onajman, niman okichiu kanika para kenijki kimanauis Daniel. Hasta ijkuak ye kalaktikaj tonaltsintli okichiu kanika para kimakixtisnekiya. 15 Pero on tlakamej oksejpa okitatoj on rey niman okijlijkej:
— Toueyirey, tejua kuajli tikmatstikaj ken kijtoua intlanauatiluan on reyes de Media niman de Persia, ika ijkuak itlaj amatlanauatijli ye onkaj firmado ika onkaj nochiua niman xakaj ueli kipopoloua.
16 Kemaj on rey otlanauatij para ma kuajuikakan Daniel niman ma kontlajkalikan kampa nemij leones. Pero ijkuak ye nisiu para kontlajkaliskiaj, on rey okijlij Daniel:
— ¡MoDios, akin tikmauistilia ika nochi moyojlo, yejua ma mitsmanaui!
17 Ijkuak Daniel yokontlajkalkej kampa nemij on leones, okuajkikej sen ueyi tetl, niman ika okitentsakukej on tlaltekontli, niman on rey okisellaroj ikan isello niman insellos on uejueyitekiuajkej, para ijki xakaj uelis kixtis Daniel kampa nemij on leones. 18 Kemaj on rey oyaj ipan ipalacio, niman onotekatajsik ipan itlapech. Niman on tlayoua xotlakuaj nion xokinek itlaj ika ma kipaktikan, niman no, xouel okoch nochi on tlayoua.
19 Uajmostla san ouajtlanes, on rey onokuiteu niman totoka oyaj itech on tlaltekontli kampa nemij on leones. 20 Ijkuak on rey oajsik nisiu, okonisijkatsajtsilij Daniel ikan ajmantli, niman okijlij:
—Daniel, itekitkau on Dios yejuan melauak nemi, ¿ouel moDios akin tiktekipanoua ika nochi moyojlo, omitsmanauij de on leones?
21 Niman Daniel okinankilij:
—¡Nochipa xueyixtia noueyirey! 22 NoDios okuajtitlan iángel, niman okinkamatsaku on leones para maka itlaj ma nechchiuilikan, pampa Dios kimatstikaj ika xnikpiya tlajtlakojli, niman ika xitlaj xkuajli nimitschiuilia noueyirey.
23 Kemaj on rey sanoyej opak niman otlanauatij para ma kixtikan Daniel kampa nemij on leones. Ijkuak okixtijkej, okitakej ika nion xtlakokojli katka, pampa okineltokak Dios ikan nochi iyojlo. 24 Kemaj on rey otlanauatij para ma kinuajuikakan on tlakamej yejuan okiteixpanuijkej Daniel, niman iminuan insiuauan niman inkoneuan okominxinijkej kampa nemij on leones. Niman ijkuak xe kuajli ajsiyaj kampa nemij on leones, on leones nimantsin okomintilankej niman okintekojkotonkej.
25 Kemaj on rey Darío okintlajkuiluij nochimej on gobernadores ipan nochi on naciones kampa yejua tlamandarouaya niman tlajtouaj okseki tlajtoltin, niman ijkin okinmijlij: "Niknekilia miyek yolseuilistli nochi tlakatl. 26 Nejua nikneki niman nitlanauatia para nochiuayan kampa nitlamandaroua ma kimakajsikan niman ma kitlakaitakan iDios Daniel,
'pampa yejua sen Dios yejuan melauak nemi,
niman yejua nemi para nochipa.
Niman ireino xkaman yakaj kixoxotonis,
niman ipoder xkaman tlamis.
27 Yejua temakixtia niman temanauiya,
yejuan kichiua uejueyi milagros
ne iluikak niman ipan in tlaltikpaktli.
Yejua okimanauij Daniel intech on leones.'"
28 Niman Daniel onokau ken ueyitekiuaj katka ipan ireino on rey Darío, niman no, ijkuak otlamandaroj Ciro, on rey de Persia.