On tlajkuilojli ipan tepantli
5
Belsasar, on rey de Babilonia, okichiu sen ueyiiluitl, niman okinots se mil on uejueyitekiuajkej de on nación. Niman chika tlakuayaj, on rey niman on yejuan okinnots okonikej miyek vino. 2-3 Ijkuak on rey Belsasar ye tlauantikatka, otlanauatij ma kuajkuilikan on copas niman on ajpastin de oro niman de plata yejuan on rey Nabucodonosor yejuan yopanoka rey okuitoya ipan on ueyitiopan de Jerusalén. On copas niman on ajpastin okinuajkikej, niman ika otlaonikej on rey, insiuauan, intlakpasiuauan niman nochimej yejuan nemiyaj ipan on ueyiiluitl. 4 Ijkuak nochimej ye tlauantikatkaj, opeu kinueyiteneuaj iminídolos de oro, de plata, de bronce, de hierro, de kojtli* niman de tetl.5 Nimantsin sano ijkuakon, ouajnonextij ima sen tlakatl, yejuan kuajli nesiya ipan on tepantli ikan itlauil on lámparas. Kemaj opeu tlajkuiloua ikan imajpil ipan on tepantli istak de on kalixko. Ijkuak on rey okitak ika on matli tlajkuiloua, 6 san ouajistaleu pampa sanoyej onomojtij. Niman opeu sanoyej ikxikuekuetlaka, hasta xok kojtik katka.
7 Kemaj opeu tsajtsi niman kiminnotsa on yejuan tetlatejtemouiliaj, on tlamatkej* niman on sitlaltlachixkej yejuan nemiyaj ne Babilonia, niman okinmijlij:
—Yejuan kinomachtis on tlen tlajkuilolnestikaj ipan on tepantli, niman nechijlis tlinon kijtosneki, kitlakentiskej ikan on patioj tlakentli morado, niman kakiltiskej ikechtlan sen koskatl de oro, niman yejua yes ika yeyi tlamandarojketl ipan noreino.
8 Nochimej on tlamatkej yejuan tekitiyaj iuan on rey okalakitoj ne kalixko, pero xakaj ouel okajsikamat tlinon kijtosneki on tlajkuilojli, nion xouel okijlijkej on rey tlinon kijtosneki. 9 Kemaj on rey Belsasar más sanoyej onomojtij niman ixayak más sanoyej oistaleu. On uejueyitlayekankej xkimatiyaj tlinon kichiuaskej.
10 Pero ijkuak inanaj on rey okak ken tsajtsiya ikoneu niman on uejueyitekiuajkej yejuan nemiyaj ne kalixko kampa kichiuayaj on ueyiiluitl, ijkin okijtoj:
—¡Nochipa xueyixtia toueyirey! Maka xmokuaajmana niman maka xistaleui, 11 pampa ipan moreino nemi sen tlakatl yejuan kipiya iespíritu on Dios yejuan yektli. Ijkuak Nabucodonosor, on yejuan opanok rey, yejua rey katka, on tlakatl okiteititij ika kuajli tlanemilia, tlamachilisyej niman tlamatki ken sen dios. Yejua ika, on rey Nabucodonosor yejuan opanok rey, yejua okiteneu más ueyitlamatki xken nochimej on magos, on tetlatejtemouilijkej, on tlamatkej niman on sitlaltlachixkej de in nación. 12 Ijkon okichiu pampa Daniel, yejuan on rey okitokayotij Beltsasar, kipiyaya sen ueyixtikaj espíritu, tlamachilistli, tlamatkilistli para kajsikamati tlinon kijtosneki sen temiktli, kiteijlia on tlen iyantikaj niman ichtaka onkaj, niman kiteijlia on tlajtlamach yejuan xakaj kajsikamati. Noueyirey, xtekuitlani Daniel niman yejua mitsijlis tlinon kijtosneki on tlen tlajkuilolnestikaj ipan on tepantli.
13 Kemaj Daniel okuikakej ixpan on rey, niman on rey okitlajtoltij:
—¿Tejua tiDaniel, on hebreo yejuan teuan omitsajuikakej ken esclavo ijkuak Nabucodonosor, on yejuan opanok rey, okinuajuikak miyekej de ne Judea? 14 Onechijlijkej ika tikpiya iespíritu Dios, ika kuajli titlanemilia, niman ika titlamachilisyej niman titlamatki. 15 Aman tej, in tlakamej yejuan más tlamatkej de in nación ouajlajkej nikan para nomachtiskej on tlaltoltin ipan on tepantli niman nechijliskej tlinon kijtosneki, pero nion yejuamej xkajsikamatij. 16 Nejua yonikak ika tejua tiueli tikajsikamati niman tikteijlia on tlen ojuitikaj. Tla tejua tiuelis timomachtis on tlajtoltin ipan on tepantli, niman tinechijlis tlinon kijtosneki, nitlanauatis ma mitstlakentikan ikan on patioj tlakentli morado, niman ma mitsnakiltikan mokechtlan sen koskatl de oro, niman tejua tiika yeyi yes titlamandarojketl ipan noreino.
17 Kemaj Daniel okinankilij:
—Noueyirey, motech ma nokaua on tetlayokoliltin, niman yakaj okse xmaka on tlakaitalistli para ma tekiti ipan mopalacio. Maski tla xitlaj nikselis, nejua nimitsijlis tlinon kijtosneki on tlajtoltin yejuan onkaj ipan on tepantli.
18 'On ueyixtikaj Dios, okimakak Nabucodonosor yejuan opanok rey, on reino, on poder, on ueyilistli, niman on tlakaitalistli. 19 Ipampa on ueyilistli yejuan Dios okimakak, nochi tlakatl de on kalpanmej, on naciones niman on yejuan tlajtouaj okseki tlajtoltin kitlakaitayaj niman sanoyej kimakajsiyaj. Niman yejua kimiktiaya noso kauiliaya ma nemi akin yejua kinekiya. Niman sekimej kintlakaitaya niman oksekimej kimpinajtiayaj. 20 Pero ijkuak yejua sanoyej onoueyimat niman sanoyej onoyoltechikau, okuilijkej on iueyitekiuajyo niman on ueyilistli yejuan kipiyaya ken rey. 21 Okejkuanijkej intech on tlakamej niman onokuep ken sen yolki. Yejua iminuan ochantik on tepepolokomej niman okikuaj xojtli kenon uakaxtin. Niman ipan oxin ajuichtli hasta kaman okinoyolkuitij ika Dios más ueyixtikaj niman kinmandaroua nochimej on naciones, niman ika yejua kitlalia akin yejua kineki para ma tlamandaro. 22 ''Niman aman, tejua noueyirey Belsasar, maski tikmatstikaj tlinon ipan onochiu Nabucodonosor, on yejuan opanok rey, tejua xtikneki timoyolyemanilis. 23 Yej más yotimoueyimat ixpan on Dios iluikakchanej. Otitlanauatij ma kuajkikan ipan momesa on copas niman on ajpastin yejuan teyaxkauan ipan iueyitiopan Dios. Niman kemaj ika on copas otikonik vino inuan mouejueyitekiuajkauan, inuan nemosiuauan niman nemotlakpasiuauan, niman onenkinmauistilijkej on dioses yejuan tlachijchijtin ikan oro, plata, bronce, hierro, kojtli* niman de temej, dioses yejuan xtlachaj, xtlakakij niman xitlaj kimatij. Niman on yejuan melauak Dios, yejuan imak onkaj monemilis, uej xotikueyilij, maski yejua mitspaleuiya para nochi kuajli kisa tlen tikchiua. 24 Yejua ika tej, yejua otlanauatij para sen matli okijkuiloj in tlajtoltin: 25 MENE, MENE, TEKEL niman UPARSIN. 26 In yejua kijtosneki in tlajtoltin: MENE kijtosneki: Dios yokijtoj sa kech tiempo titlamandaros noueyirey, niman yokijtoj ika xok titlamandaros. 27 TEKEL kijtosneki: Tejua ueyixtikaj rey omitstemachijkej niman xokajxilij kech noneki tiyetik yes. 28 PARSÍN kijtosneki: Noueyirey, moreino yotlajkoxeliu, niman yokinmaktilijkej on reinos de on medos niman on persas."
29 Kemaj on rey Belsasar nimantsin otlanauatij para ma kitlakentikan Daniel ika on patioj tlakentli morado, niman ma kâkiltikan ikechtlan sen koskatl de oro. Niman okitemachistij ika desde ijkuakon, Daniel yejua ika yeyi tlamandarojketl yes ipan on reino.