On Rey Nabucodonosor otlamachilispoliuij
4
Más sakin, Nabucodonosor okititlan in tlajkuilojli para nochimej tlalikpaktlakamej:"Nejua, rey Nabucodonosor, niknekilia miyek yolseuilistli nochi tlakatl yejuan nemij ipan on kalpanmej, ipan on naciones niman de nochi sesekneka tlatoltin de in tlaltikpaktli. 2 Nikneki xmatikan on uejueyi tlajtlamach* tlen tetlatlachaltij yejuan onechchiuilij on Dios ueyixtikaj.
3 '¡Sanoyej uejueyi señales niman tlamauisoltin yejuan Dios techititia! On iueyixtikaj reino xkaman tlamis, niman ipoder onyas para nochipa.
4 'Nejua, Nabucodonosor, noyolika ninemiya ipan nopalacio niman xitlaj nikonmatstikatka pampa nochi nikpiyaya. 5 Pero ipan se tlayoua, ijkuak nejua nikochiya ipan notlapech, onikpix sen temiktli yejuan sanoyej onechmojtij. On tlen onikitak ipan notemik xok ouel onikelkau, yej sanoyej onechmojkamiktij. 6 Yejua ika, onitlanauatij ma uajlakan nochimej on tlamatkej de Babilonia, para kuajli nechijliskej tlinon kijtosneki on temiktli. 7 Niman ouajlajkej on magos, tetlatejtemouilijkej, on tlamatkej, niman sitlaltlachixkej para ma nechijlikan tlinon kijtosneki on temiktli. Ijkuak yejuamej yonosentlalijkej nixpan, nejua onikintlajtlajtouilij on temiktli, pero yejuamej xouelkej onechijlijkej on tlen kijtosneki. 8 Sa ika nochi, ouajlaj Daniel. (Yejua no itoka katka Beltsasar para itlakaitalis nodios.) Niman oniktlajtlajtouilij notemik, pampa iespíritu Dios yejuan yektli, nemi ipan iyojlo. 9 Onikijlij: 'Beltsasar, akin tiueyi tlayekanki intech on tlamatkej, nejua nikmatstikaj ika iespíritu on Dios yejuan yektli mitsyekana, niman tiueli tikmati tlinon kijtosneki on tlen iyantikaj niman ichtaka onkaj. Xkaki tej, on tlen nejua onikitak ipan notemik, niman xnechijli tlinon kijtosneki. 10 In yejua tlatlachalistli yejuan onikpix chika nejua nikochiya:
'Onikitak ika itlajkotian in tlaltikpaktli ijkaya sen kojtli* yejuan sanoyej uejkapan katka. 11 On kojtli* onoskaltij niman sanoyej otomau, niman ikuatipan on kojtli ajsitoya hasta ixco cielo, niman ueliya kitayaj desde kampa más uejka de in tlaltikpaktli. 12 Ixojyo sanoyej kualtsin katka niman sanoyej tlaktikatka, niman kajxiliaya para tlakuayaj nochimej tlaltikpaktlakamej. On tepeyolkej niyanayaj tlatsintlan de on kojtli kampa notonalseuiyayaj, niman ipan imauan, on totomej kichijchiuayaj intepasol, niman on kojtli kitlakualtiaya nochi tlen yoltikaj.
13 'Kemaj san ijsijkapan onikitak ipan on notlatlachalis, sen ángel tlajpixki yejuan uajtemotiaya ne iluikak, 14 niman ijkin chikauak kijtouaya:
'Xtsontekikan niman xtlajkalikan in kojtli. Xtsojtsontekilikan imauan, xkixtilikan nochi ixojyo, niman xsemanakan itlakyo. Ma uiyan on tepeyolkej yejuan itech notonalseuiyaj, niman ma uiyan on totomej yejuan nemij ipan imauan. 15 Pero xkauakan ijtik tlajli itemetsonyo niman ineluayouan. Ma salijtia ikan teposcadena niman ikan cadena de bronce, niman xkauakan ijtik xojyoj ipan on campo. Ma tlajuichxini ipan on kojtemetsontli yejuan kixnextia sen tlakatl, niman in tlakatl ma kuajkua xojtli ken tlakuajkuaj on tepeyolkej. 16 Ma tlamachilispoliui niman ma nokuepa ken itlaj yolki, niman ijki ma nemi chikome xipan. 17 Ijkin ipan nochiuas pampa, ijki okijtojkej on yejyektin tlajpixkej ángeles, para nochi tlakatl ma kimati ika Dios yejuan más ueyixtikaj, yejua tlamandaroua impan nochimej on reinos de in tlaltikpaktli. Yejua kitlalia para tlamandaroua akin yejua kineki, niman kitlalia tlamandaroua ipan sen nación sen tlakatl yejuan más yolyemanki.'
18 'Nejua akin nirey Nabucodonosor, in yejua temiktli onikpix. Aman tejua Beltsasar, xnechijli tlinon kijtosneki, pampa xakaj tlamatki yejuan nemi ipan noreino kajsikamati. Pero tejua uelis tinechijlis, pampa mopan nemi iespíritu on Dios yejuan Dios."
19 Kemaj Daniel, yejuan no itoka katka Beltsasar, onokau tlanemilijtikaj uejkajtika niman hasta otlamachilispoliu. Pero nejua akin nirey, onikijlij:
—Beltsasar, maka xmomojti ipampa on temiktli yejuan onikpix niman de on tlen kijtosneki.
Niman Beltsasar okinankilij:
—¡Noueyirey, nikneksia para on tlen kijtosneki on motemik impan ma uetsi motlauelikniuan. 20 Noueyirey, ipan motemik otikitak sen ueyikojtli sanoyej uejkapan niman tomauak. Nesiya ajsitikatka hasta ixko on cielo para nochi tlaltikpaktlakatl ueliya kita. 21 On kojtli kipiyaya kualtetsin ixojyo niman kipiyaya miyek itlakyo yejuan kajxiliaya para tlakuayaj nochimej on tlaltikpaktlakamej. Ipan itlaseuajlo noseuiayayaj on tepeyolkej, niman ipan imauan, kichijchiuayaj intepasol on totomej. 22 On kojtli kijtosneki sano tejua noueyirey, yejuan tiueyixtikaj niman tikpiya ueyipoder. Moueyilis tejua noueyirey, sanoyej yonoskaltij, hasta yokajsito on cielo, niman motlanauatilis yonoskaltij nochiuiyan ipan in tlaltikpaktli.
23 'Noueyirey, no ijki otikitak sen ángel yektli tlajpixki, uajtemouaya ne iluikak niman kijtouaya: 'Xtsontekikan niman xtlajkalikan in kojtli, niman xtsojtsontekilikan imauan. Pero xkauakan ijtik tlajli itemetsonyo niman ineluayouan. Ma salijtia ikan teposcadena de hierro niman ikan cadena de bronce, niman xkauakan ijtik xojyoj ipan on campo. Niman ipan ma tlajuichxini niman iminuan ma tlakuajkua on tepeyolkej, chikome xipan.
24 'Yejua in kijtosneki, ika on más ueyixtikaj Dios ijkin yotlanauatij para ijki ma nochiua mopan, noueyirey. 25 Niman tejua noueyirey, mitsejkuaniskej intech on tlakamej niman tichantis iminuan yolkej. Tikuas xojtli kenon uakaxtin, niman on ajuichtli kipatsos motlalnakayo. Ijki tinemis chikome xipan, hasta ijkuak tejua noueyirey timoknelis ixpan Dios, niman tijkitos ika yejua más ueyixtikaj, niman kipiya poder impan on tlaltikpaktlakamej, niman ika yejua kitlalia akin yejua kineki para ma tlamandaro. 26 On tlanauatijli yejuan okitlalijkej para ma kauakan on kojtemetsontli niman ineluayouan ijtik tlajli, kijtosneki ika tejua noueyirey oksejpa titlamandaros ken rey, ijkuak yotimoknelij ixpan Dios niman tikijtos ika san yejua kipiya poder.
27 'Yejua ika noueyirey, xchiua tlinon nimitsijlis: 'Xmoyekana ikan yolmelajkilistli niman makasa xtlajtlako. Makasa xchiua on tlen xkuajli niman yej xkimpaleui on yejuan mayankej. Manin ijki uelis tinemis ikan yolseuilistli niman ikan tlatiochiualistli.' "
28 Nochi in tlajtlamach yejuan Beltsasar okijlij on rey Nabucodonosor, melauak onochiu. 29 Ijkuak yopanok se xipan, chika on rey nejnentinemiya ipani ipalacio ne Babilonia, 30 ijkin okijtoj: "¡Xkitakan ken sanoyej ueyixtikaj Babilonia! Nejua, ikan nopoder oniktlalij ken icapital noreino, para ijki onikteititij ika nikpiya ueyilistli."
31 Saken tlajtojtikatka on rey ijkuak ouajkakistik sen tlajtojli desde iluikak, yejuan ijkin kitouaya: "Xkaki rey Nabucodonosor, moreino yomitskuilijkej. 32 Tejua mitsejkuaniskej intech on tlakamej, niman yej tichantis iminuan yolkej. Chikome xipan tikuas xojtli, no ijki kenon uakaxtin kikuaj, hasta ijkuak tejua tikajsikamatis ika Dios san yejua ueyixtikaj niman kipiya poder impan nochimej on naciones de in tlaltikpaktli, niman ika yejua kitlalia akin yejua kineki para ma tlamandaro."
33 Niman ijkuak otlan ijkon kijliaj, amanaman ipan onochiu ken yokijlijkaj ipan nochiuas. Ijkon tej, Nabucodonosor okejkuanijkej intsajlan on tlakamej. Okikuaj xojtli kenon uakaxtin kikuaj, niman ipan otlajuichxin hasta onoskaltij itsojmiyo, niman istiuan oueueyakiyakej ken istiuan itlaj kuaktli.
Nabucodonosor opajtik niman oksejpa okipix itlamachilis
34 "Ijkuak yopanok on chikome xipan, nejua Nabucodonosor, onajkotlachix iluikak, niman onikmat ika yonipajtik. Oksejpa kuajli katka notlamachilis. Kemaj onikueyilij on Dios yejuan sanoyej ueyixtikaj, niman ijkin onikueyiteneu on yejuan nochipa nemi:
'Iueyipoder xkaman tlamis,
niman yejua tlamandaros para nochipa.
35 Pampa Dios sanoyej ueyixtikaj,
para yejua on tlaltikpaktlakamej xitlaj kijtosnekij.
Yejua kipiya poder para kichiua tlen kineki
inka on ángeles ne iluikak
niman impan in tlaltikpaktlakamej
yejuan nemij ipan in tlaltikpaktli.
Xakaj ueli kixnamiki pampa sanoyej kipiya poder
nion xakaj ueli kitlajtoltia tline ijkon kichiua.'
36 'Nimantsin sano ijkuakon onitlamachiliskuik, niman oksejpa onikselij iueyilis noreino, notetlakaitalis niman on ueyilistli yejuan nikpiyaya. On notlajtolpaleuijkauan niman notlapaleuijkauan ipan noreino oksejpa onechtejtemojkej niman oksejpa opeu nitlamandaroua ipan nonación. Niman onikpix más poder xken achtoj nikpiyaya.
37 'Aman tej, nejua Nabucodonosor, nikueyiteneua, niktlakaita niman nikmauistilia on yejuan Rey ne iluikak, pampa nochi tlen yejua kichiua sanoyej kuajli niman melauak, niman kichiua ma noknelikan on yejuan noueyimatij."