On babilonios kimauistiliaj on ixneskayotl de oro
3
On rey Nabucodonosor otlanauatij ma kichijchiuakan ixneskayo sen tlakatl ikan oro, yejuan kipiyaya treinta metros ika uejkapan niman yeyi metro ika tomauak. Niman otlanauatij ma kitlalikan ipan on tlamanko itoka Dura, ipan iueyitlalpan Babilonia. 2 Kemaj okintekuitlan nochimej on gobernadores de on uejueyitlalpanmej ipan on país Babilonia, on soldadostlayekankej, on intlapaleuijkauan on gobernadores de on uejueyitlalpanmej, on tetlakanonotskej, on tominyejyejkej, on yejuan teyolkuitiaj, on uejueyitekiuajkej niman nochimej on yejuan tlamandarouayaj ipan on uejueyitlapanmej, para ma uajlakan ipan on ueyiiluitl de on ixneskayotl yejuan otlanauatij ma kichijchiuakan. 3 Nochimej on uejueyitlayekankej ipan on nación onosentlalijkej ixpan on ixneskayotl para otlaluichijkej ipampa. 4 On tlayekanki ipan on iluitl ijkin otlanauatij chikauak: "Xkakikan, tlakamej yejuan nenualeuaj de nochi naciones niman de nochi tlajtoltin: 5 Ijkuak nemejuamej nenkakiskej kimpitsaj on tlapitsaltin, on akatlapitsaltin niman kitsotsonaj on lira, salterio, niman nochi on tlatsotsonaltin, nenmotlankuatelketsaskej niman nenkimauistiliskej on ixneskayotl de oro yejuan okichijchiu on rey Nabucodonosor. 6 San akinon yejuan xnotlakuantelketsas niman xkimauistilis on ixneskayotl, nimantsin kontlajkaliskej ipan on horno kampa kauantikaj tlitl."7 Ijki tej, ijkuak on tojlamej yejuan onosentlalijkej okakkej on tlatsotsonaltin, onotlankuatelketskej niman okimauistilijkej on ixneskayotl de oro.
8 Pero sekimej babilonios okinteixpanuijkej on judíos itech on rey Nabucodonosor. 9 Yejuamej okijlijkej:
—¡Nochipa xueyixtia toueyirey, niman motoka nochipa ma kelnamikikan! 10 Tejua toueyirey, otitlanauatij para nochi tlaltikpaktlakatl ma notlakuantelketsa niman ma kimauistili on ixneskayotl de oro ijkuak kakiskej on tlatsotsonaltin, 11 niman on yejuan xkichiuas kontlajkaliskej ijtik on horno kampa kauantikaj tlitl. 12 Maski ijki otitlanauatij, nemij keskimej judíos, yejuan tejua toueyirey otikintlalij ipan on uejueyitekiuajyotl ipan iueyitlalpan Babilonia, yejuan xkichiuaj on tlen tejua otitlanauatij, nion xkinmauistiliaj modioses, nion on ixneskayotl de oro yejuan otitlanauatij ma kichijchiuakan. Yejuamej imintoka: Sadrac, Mesac niman Abed-nego.
13 Ijkuak Nabucodonosor ijkin okak, sanoyej okualan, niman otlanauatij para ixpan ma kinuajuikakan Sadrac, Mesac niman Abed-nego. Niman ijkuak yejuamej ye nemiya ixpan, 14 yejua okintlajtoltij:
—¿Tlen melauak xnenkinekij nenkinmauistliskej nodioses, nion on ixneskayotl de oro yejuan onitlanauatij ma kichijchiuakan? 15 Aman tej, nemechtlajtoltia: "¿Nenkinekij nemotlakuantelketsaskej ixpan on ixneskayotl yejuan onitlanauatij ma kichijchiuakan, niman nenkinekij nenkimauistiliskej ijkuak nenkakiskej on tlatsotsonaltin?" Pampa tla xnenkimauistiliaj, nimantsin mechonxiniskej ijtik on horno yejuan kauantikaj, niman ijkuakon, ¿katlejua dios uelis mechmanauis?
16 On yeyimej telpokamej ijkin okinankilijkej:
—On xsano tejuamej titomanauiskej de tejua. 17 Yej, toDios, akin tikmauistiliaj, yejua techmanauis ipan on tlitl de on horno. Niman de nochi on tlen xkuajli titechchiuilisneki, tejua toueyirey, yejua techmanauis. 18 Pero maski tla yejua xtechmanauis, kuajli xmati tejua toueyirey ika xtikinmauistiliskej modioses nion xtitotlakuantelketsaskej ixpan on ixneskayotl de oro.
Dios kinmanauiya on yeyimej telpokamej ipan on horno kauantikaj
19 Ijkuak Nabucodonosor okak in tlajtoltin, nimantsin ones ixko ken sanoyej okualan iminuan in yeyimej telpokamej. Yejua ika, otlanauatij ma kixotlaltikan on horno chikomepa más totonki. 20 Kemaj okinnauatij isoldados yejuan más kojtikej para ma kinmasasalokan Sadrac, Mesac niman Abed-nego, niman ma kominxinikan ijtik on horno yejuan kauantikaj. 21 On yeyimej telpokamej, sanken* kitlalijtiayaj intekiuajtlaken yejuan ika kiteititiayaj ika yejuamej uejueyitekiuajkej, okinsalojkej niman ijki okominxinijkej ijtik on horno yejuan kauantikaj. 22 Pampa on rey otlanauatij para ma kixotlaltikan on horno sanoyej totonki, itlimilinajlo okintlatij niman okinmiktij on soldados yejuan okominxinijkej on yeyimej telpokamej ijtik on horno. 23 Niman on telpokamej oxinitoj sajsalijtiuij itik on horno.
24 Kemaj Nabucodonosor amanaman onotelkets, niman ika inemojtil okinmijlij itlajtolpaleuijkauan:
—¿Tlen xokominxinijkej yeyimej telpokamej sasalijtiuij ijtik on tlitl?
Yejuamej okinankilijkej:
—Kemaj toueyirey.
25 Niman on rey okijtoj:
— Pero nejua nikinta nauimej tlakamej yejuan xok sasalijtokej, niman nejnentinemij ijtik on tlimilinajli niman nion xtlatlaj. Niman on yejuan ika naui tlakatl nesi ken sen dios.
26 Niman chika Nabucodonosor ijkin kijtojtikatka, okinisiuij itempan on horno niman ontsajtsik:
— ¡Sadrac, Mesac niman Abed-nego, itekipanojkauan on Dios yejuan más ueyixtikaj, xkisakan niman xuajlakan nikan!
On yeyimej ouajkiskej ijtik on tlitl, 27 niman nochimej on tekiuajkej de on nación yejuan ompa nemiyaj, okintatoj on telpokamej yejuan intlalnakayo xitlaj okinchiuilij on tlitl. Yejuamej okitakej ika nion se intson xochichinau, nion intlakeuan xotlatlakej, niman nion xijnekuistiyaj ika nemiyaj tliko.
28 Kemaj Nabucodonosor okijtoj: "¡Ma kiueyiteneuakan iDios Sadrac, Mesac niman Abed-nego, yejuan okuajtitlan iángel para okinmakixtiko itekipanojkauan yejuan itech okitlalijkej nochi inyojlo. Yejuamej xokichijkej on tlen nejua akin nirey onitlanauatij. Yej okijtojkej maski ma mikikan xnotlakuantelketsaskej niman xkimauistiliskej okse dios tla xyejua iminDios! 29 Yejua ika, nejua nitlanauatia ika san akinon yejuan kijtouilis itlaj tlen xkuajli iminDios in telpokamej, ma kitsojtsontekikan niman ikal ma kixoxotonilikan. Xkichiuilia kanon ualeua noso tlinon itlajtol, pampa xnemi okse dios yejuan ijkin temakixtia."
30 Kemaj on rey okinmakak in yeyimej telpokamej on más uejueyitekiuajyotl ipan iueyitlalpan Babilonia.