(Kenijki on tribus kinxelouiliskej on país)
48
1-7 'In yejua lista de on tribus de Israel yejuan kinxelouiliskej on país, desde norte hasta sur. Niman ompeuas desde ipeuyan on país, kampaka norte, yejuan uajpeua itech on Mar Mediterráneo niman ontlami hasta sur de on tlajli Damasco niman on tlajli Hamat. Niman no, panoua itech on ueyikalpan Hetlón niman nisiu on ojtli yejuan yau ipan on ueyikalpan Hamat niman Hasar-enán. Cada tribu kiselis iueyitlalpan. Desde kampaka ikisayan tonaltsintli hasta kampaka ikalakiyan, ijkin kintenejtiaskej para kinmakaskej on intlal:Dan
Aser
Neftalí
Manasés
Efraín
Rubén niman
Judá
(On tlajli yejuan ikatlakajtli para toTEKO)
(Ez 45.1-6)
8 'Niman kampaka sur de Judá, desde kampaka ikisayan tonaltsintli hasta kampaka ikalakiyan, onyas on tlajli ikatlakajtli para nejua nemoTEKO. On tlajli kipiyas majtlaktli uan ome kilómetro uan tlajko ika patlauak, niman ika ueyak no ichkich yes kenon oksekimej tlaltin yejuan kinmakaskej on tribus. Itlajkotian on tlajli ompa kichijchiuaskej on ueyitiopan.
9 'No ijki, nenkauaskej para nejua nemoTEKO sen tlajli yejuan kipiyas majtlaktli uan ome kilómetro uan tlajko ika ueyak niman majtlaktli kilómetro ika patlauak. 10 Sano ipan in tlajli, onyas okse tlajli yejuan yes san para on tiopixkej; kampaka norte niman kampaka sur, in tlajli kipiyas majtlaktli uan ome kilómetro uan tlajko ika ueyak, niman kampaka ikisayan tonaltsintli hasta kampaka ikalakiyan, kipiyas makuijli kilómetro ika patlauak. Itlajkotian in tlajli kichijchiuaskej noueyitiopan. 11 Yejua in tlajli, yes san para on tiopixkej yejuan iuejkakoneuan Sadoc, yejuan ika tlakajtin para nechtekipanouaj nejua nemoTEKO. In tiopixkej nochipa onechtekichiuilijkej niman xkaman okintlalkauijkej notlanauatiluan; yejuamej xijki okichijkej ken okichijkej on levitas niman on oksekimej israelitas yejuan onechtlalkauijkej. 12 Ijkuak noxelos on tlajli, yejua on parte noneki kinmakaskej yejuamej on tiopixkej; yejua on tlajli yejua sanoyej yektli. On tlajli nokauas inakastlan on tlajli yejuan kiminmakaskej on oksekimej iuejkakoneuan Leví. 13 Itech intlal on tiopixkej, on levitas kipiyaskej intlal yejuan kipiyas majtlaktli uan ome kilómetro uan tlajko ika ueyak, niman makuijli kilómetro ika patlauak. Tla ijkon tej, on yektlajli, san se ueyi uajnochiua majtlaktli uan ome kilómetro uan tlajko ika ueyak niman majtlaktli kilómetro ika patlauak. 14 In tlajli yejua yektlajli yes ipan on país, niman ikatlakajtli yes para nejua nemoTEKO. Nion pitentsin xuelis nonemakas noso ika tlapatlaskej, nion xuelis kipanoltiliskej okse tlakatl, pampa in sen yektlajli yes.
15 'On okseki tlajli yejuan nokaua kipiya majtlaktli uan ome kilómetro uan tlajko ika ueyak niman ome kilómetro uan tlajko ika patlauak. Niman in tlajli xtlatiochijkatlajli. Yejua ika uelis kitekitiltis san akinon para nochantis, niman no, ompa kintlakuajkualtiskej inyolkauan. Itlajkotian on tlajli onyas on ueyikalpan 16 yejuan itlal kipiyas 2,250 metros ipan cada lado. 17 Niman iyeualkan on ueyikalpan onyas sakayoj yejuan kipiyas 125 metros ika patlauak ipan cada lado de on ueyikalpan. 18 Inajnakastlan on ueyikalpan, on tlajli para on mijlajtekitkej kipiyas makuijli kilómetro ika ueyak. On lado kampaka ikisayan tonaltsintli niman kampaka ikalakiyan tonaltsintli nochiuiyan ichkich yes. Yejua in tlajli kitôkaskej, niman on tlinon ompa tlakis kikuaskej on tlakamej yejuan tekitij ipan on ueyikalpan. Yejua in tlajli nokaua inakastlan on tlajli yejuan ikatlakajtli para nejua nemoTEKO. 19 On yejuan chantij ipan on ueyikalpan yejuan tekitkej niman yejuan tlatôkaskej ipan in tlajli, ualeuaskej ipan san katlejua tribu de Israel. 20 Nochi on tlajli yejuan ikatlakajtli para nejua nemoTEKO iuan itlal on ueyikalpan, san se ueyi uajnochiua sen cuadrado yejuan kipiya majtlaktli uan ome uan tlajko kilómetro ipan cada lado.
(Iueyitlalpan on rey)
(Ez 45.7-8)
21 'On rey kimakaskej on tlajli yejuan nokaua kampaka ikalakiyan tonaltsintli de on yektlajli, niman no kimakaskej on tlajli yejuan nokaua kampaka ikisayan tonaltsintli de on yektlajli. On tlajli yejuan nokaua kampaka ikisayan tonaltsintli, ajsitos hasta kampa tlami on tlajli kampaka kisa tonaltsintli, niman on tlajli yejuan nokaua kampaka kalaki tonaltsintli uej ajsitos hasta kampa onkaj on mar Mediterráneo. Ijkon tej, cada se de on ome tlaltin yejuan iuan nonamikij innajnakastlan on yektlajli iuan itlal on ueyikalpan, kipiyas majtlaktli uan ome kilómetro uan tlajko ika patlauak. 22 On rey kimakaskej on ueyitlalpan yejuan nokaua intsajlan on uejueyitlalpanmej de Judá kampaka norte niman de Benjamín kampaka sur. On rey san xkimakaskej on tlajli yejuan ikatlakajtli yes para yektlajli niman kampa onyas on ueyikalpan.
(On uejueyitlalpanmej para on oksekimej tribus)
23-27 'On uejueyitlalpanmej yejuan on oksekimej tribus kiseliskej, kinmakatiaskej más tlatsintlan kampaka sur de on país. Cada tribu kiselis iueyitlalpan desde ipeuyan on país, kampaka ikisayan tonaltsintli, niman ontlamis hasta kampaka ikalakiyan tonaltsintli. Niman ijkin kintenejtiaskej para kinmakaskej on intlal:
Benjamín
Simeón
Isacar
Zabulón niman
Gad
28 'Kampaka sur de iueyitlalpan Gad, itlamiyan on país tlantias desde ne Tamar, niman panotos ne Cades kampa tlaxoxouixkan, niman no, panos itech iayajtok Egipto, niman ontlamis hasta itech on Mar Mediterráneo.
29 'In yejua on tlajli yejuan kiseliskej ken herencia on itribus Israel, niman ijkin nenkixeloskej ken yonikijtoj. ¡Nejua nemoTEKO Dios, ijki nitlanauatia!
(Iuejueyitsakuijlouan on ueyikalpan Jerusalén)
30-34 'On ueyikalpan yejuan cuadrado yes, yeualtsakutias ikan sen tepanchinantli yejuan kipiyas 2,250 metros ipan cada lado. Niman ipan cada lado de on tepanchinantli, onyas yeyi ueyitsakuijlotl yejuan cada se kipiyas itoka sen tribu de Israel. On tokayomej ijkin notekpantiaskej: kampaka norte kitlaliskej itoka Rubén, Judá niman Leví; kampaka ikisayan tonaltsintli kitlaliskej itoka José, Benjamín niman Dan; kampaka sur kitlaliskej itoka Simeón, Isacar, niman Zabulón; niman kampaka ikalakiyan tonaltsintli kitlaliskej itoka Gad, Aser niman Neftalí. 35 On tepanchinantli san se ueyi kipiyas 9 mil metros, niman desde ijkuakon, on ueyikalpan itoka yes: ‘ToTEKO nikan nemi’.”