On yenkuik país (47.1 – 48.35)
(On atl yejuan meya ipan on ueyitiopan)
47
Más sakin, on tlakatl oksejpa onechuikak ipan ikalakiloyan on ueyitiopan, niman tlatsintlan de on kiauatentli onikitak meya atl yejuan yajtoya kampaka ikisayan tonaltsintli, kampaka ontlachixtikatka on ueyitiopan. Niman on atl temouaya kampaka sur de on ueyitiopan. 2 Kemaj on tlakatl onechkixtij de ikiauakpitentsin on ueyitiopan. Onechkixtij kampaka onkaj on tsakuijlotl yejuan nokaua kampaka norte. Niman kemaj onechyekan iyeualkan on ueyitiopan hasta onajsik itech on kalakiloyan de on kiauakpitentsin yejuan ontlachixtikatka kampaka ikisayan tonaltsintli. Kemaj onikitak ika kampaka sur, itech on kalakiloyan yejuan nokaua kampaka ikisayan tonaltsintli no kuepontikatka atl.3 On tlakatl oyaj kampaka ikisayan tonaltsintli kimapixtiu sen cinta métrica, niman otlatemachiu 500 metros. Kemaj onechnauatij ma nikpano on ayajtok, niman on atl nechtlamiliaya ipan nokxikechtlanuan. 4 Kemaj otlatemachiu okse 500 metros, niman oksejpa onechnauatij ma nikpano on ayajtok, niman on atl kej nechtlamiliaya ipan nokxiteteponuan. Kemaj oksejpa otlatemachiu okse 500 metros, niman oksejpa onechnauatij ma nikpano on ayajtok, niman on atl kej onechtlamilij hasta ipan noxijlan. 5 Niman oksejpa otlatemachiu okse 500 metros, pero ijkuakon on atl ye sen río katka niman xok ouel onikpanok san ijki pampa on atl sanoyej youejkatlaniaka, yej nonekiya nitlanelos para nikpanos. 6 Kemaj yejua onechijlij: “Tejua tlaltikpaktlakatl, kuajli xkixtlalo on tlinon yotikitak.”
Kemaj on tlakatl oksejpa onechuikak itempan on río, 7 niman onikitak ika on okan itempan on río onkatka sanoyej miyek kojtin. 8 Kemaj on tlakatl onechijlij: “Yejua in atl yau ipan on región kampaka ikisayan tonaltsintli, niman ajsi hasta kampa panotok on río Jordán. Niman de ompa, ajsi ipan on Mar Muerto. Niman ijkuak in atl ajsi ipan on Mar Muerto, iau on mar nokuepa tsopelik niman chipauak. 9 San kanon kampa ajsis in atl, uelis nemiskej nochimej on sesentlamantikej yolkej niman sanoyej miyekej michimej, pampa in atl kuepas atsopelik on achichik. Nochiuiyan kampa in atl kueponis, itech in atl uelis kuajli nemiskej nochimej yejuan kipiyaj nemilistli. 10 Desde ne En-gadi hasta ne En-eglaim nemiskej on michajsikej iatempan on Mar Muerto, niman ompa kuajuatsaskej iminmatlauan. Niman ompa nemiskej sanoyej miyekej niman sesentlamantikej michimej ken nemij ipan on mar Mediterráneo. 11 Pero ipan on amanaltin niman ipan on atl yejuan tetoloua, uej xonyas atsopelik; ompa yej onyas apoyek para ompa on tlakamej uelis kixtiskej istatl. 12 Ipan on okan itempan on río, noskaltiskej nochimej on sesentlamantikej kojtlakijlomej yejuan xkaman xojyoxiniskej niman nochipa tlaktiaskej. Cada metstli on kojtin kipiyaskej intlakyo, pampa nochipa kipiyaskej on atl yejuan oneuas ipan on ueyitiopan. Intlakyo on kojtin yejua tlakuajli yes, niman inxojyo ika nopajtiskej.
(On kampa tlantias on país de Israel)
13 'Nejua nemoTEKO Dios, ijkin nikijtoua: Ijkin kixeloskej on tlajli yejuan kiseliskej on majtlaktli uan ome tribus de Israel. Iuejkakoneuan José kiseliskej ome tlaxelojli. Iuejkakoneuan 14 Nejua onikintlajtolmakak on nenmoachtojtajuan ika nikinmakaskia in tlajli. Yejua ika tej, in tlajli yejuan nenkimoxelouiliskej ipan cada tribu, nochi ijichkich nenkiseliskej. In país yejua nenmoherencia yes.
15 'In yejua yes kampa itlamiyan on tlajli: Kampaka norte, itlamiyan on país ompejtos itech on Mar Mediterráneo, niman panotos itech on ueyikalpan Hetlón niman intech on uejueyikalpanmej Zedad, 16 Berot niman Sibraim (yejuan nokauaj ipan iueyitlalpan Damasco niman ipan iueyitlalpan Hamat); niman no, panotos itech on ueyikalpan Hazar-haticón yejuan iuan nonamiki on ueyitlalpan Haurán. 17 Ijki tej, itlamiyan on país kampaka norte ompejtos itech on Mar Mediterráneo niman ontlamis itech on ueyikalpan Hasar-enán, kampaka nokauaj on uejueyitlalpanmej de Damasco niman de Hamat, kampaka norte.
18 'Kampaka ikisayan tonaltsintli, itlamiyan on país ompejtos kampa notlalnamikij on ueyitlalpan Haurán iuan on ueyikalpan Damasco. Niman panotos itech on río Jordán nochi on kech ika ueyak, yejuan kinxelojtias on tlajli de Israel niman on iueyitlalpan Galaad. Niman kemaj, ontlamis hasta ipan on ueyikalpan Tamar yejuan onkaj nisiu on Mar Muerto.
19 'Kampaka sur, itlamiyan on país ompejtos ipan on ueyikalpan Tamar, niman panotos kampaka ikalakiyan tonaltsintli hasta ne Cades kampaka tlaxoxouixtok niman itech iayajtok Egipto, niman ajsis hasta ipan on Mar Mediterráneo.
20 'Kampaka ikalakiyan tonaltsintli, itlamiyan on país, yes nochi on Mar Mediterráneo. Ompejtos kampa iuan notlalnamiki on tlajli Egipto, niman ajsis hasta itenko on mar kampa onkalaki on ojtli yejuan yau ipan on ueyitlalpan Hamat.
21 'In yejua on país yejuan nenmejuamej nenkimoxelouiliskej ipan on tribus de Israel. 22 Yejua yes nenmoherencia para nemejuamej niman para on yejuan xchanejkej yejuan nemij nenmotsajlan iminuan inkoneuan. Yejuamej nenkintaskej no ken israelitas yeskiaj. Ijkuak nenkimoxelouiliskej in tlajli ipan on tribus de Israel, on yejuan xchanejkej no nenkinmakaskej on tlajli yejuan kintocaroua kiseliskej. 23 On tlajli yejuan kiseliskej on yejuan xchanejkej, kiminmakaskej kampa iueyitlalpan on tribu kampa aman chantij. ¡Nejua nemoTEKO Dios, ijki nitlanauatia!