(On tlinon noneki kichiuas on rey niman on israelitas impan on iluimej)
46
‘Nejua nemoTEKO Dios, ijkin nikijtoua: On ueyitsakuijlotl yejuan nokaua kampaka ikisayan tonaltsintli de on ipitentsinkiauak on ueyitiopan, ika onkaj tsakutias on chikuasen tonajli ijkuak nochi tlakatl tekiti, niman ika onkaj kitlaposkej ipan on tonajli sábado niman ipan on tonajli ijkuak yenkuik metstli. 2 On rey ualeuas ipan on kiauakpitentsin niman onkalakis ipan on kalixkajli, niman onnoteltis itech ikiauaten on ueyitsakuijlotl. Chika ijkuakon, on tiopixkej kiuentlaliaj on uentli yejuan kitkis on rey. Kiuentlaliskej on yolki yejuan nochi tlatla ipan on tlaixpan niman on uentli yejuan kichiuas para nemejuamej israelitas nenkipiyaskej yolseuilistli nouan. Kemaj on rey notlakuantelketsas niman nopachos hasta ipan tlajli ixpan on kiauatentli para nechmauistilis, niman kemaj yejua uajkisas de ompa. Pero on ueyitsakuijlotl xkitsakuaskej niman, yej kitsakuaskej hasta ijkuak ye tiotlak. 3 Ijkuak sábados niman ijkuak peua cada yenkuik metstli, nochimej nemejuamej israelitas nennechmauistiliskej nejua nemoTEKO sano ompa ixpan on kiauatentli. 4 On yolkej yejuan on rey kintemakas ijkuak sábado para uentli yejuan nochi tlatla ipan on tlaixpan para nejua nemoTEKO, yes chikuasen borreguitos niman sen borrego. Nochimej in yolkej xkanaj tlakokoltin yeskej ipan intlakayo. 5 Iuan cada borrego kitemakas sempoajli litro trigo noso cebada, niman iminuan on borreguitos uelis kitemakas trigo noso cebada san kech on rey kinekis. Niman iuan cada sempoajli litro trigo noso cebada, kitemakas yeyi litro uan tlajko aceite de oliva. 6 Ipan on tonajli ijkuak peua yenkuik metstli, on rey kitemakas sen becerro, chikuasen borreguitos niman sen borrego. Nochimej in yolkej xkanaj tlakokoltin yeskej ipan intlakayo. 7 Iuan cada becerro kitemakas sempoajli litro trigo noso cebada, niman iuan cada borrego no ichkich kitemakas. Niman iminuan on borreguitos uelis kitemakas trigo noso cebada san kech on rey kinekis. Niman iuan cada sempoajli litro trigo noso cebada, kitemakas yeyi litro uan tlajko aceite de oliva.8 'Ijkuak on rey yas ipan ikiauakpitentsin on ueyitiopan, noneki onkalakis kampaka onkaj on kalixkajli, niman oksejpa ompaka uajkisas. 9 Niman ipan on iluimej ijkuak nemejuamej israelitas nenuajlaskej nixpan para nennechmauistiliskej nejua nemoTEKO, ijkin nenkichiuaskej: on yejuan kalakiskej ipan on kalakiloyan yejuan nokaua kampaka norte de on ueyikiauak, uajkisaskej ipan on kalakiloyan yejuan nokaua kampaka sur, niman on yejuan kalakiskej ipan on kalakiloyan yejuan nokaua kampaka sur de on ueyikiauak, uajkisaskej ipan on kalakiloyan yejuan nokaua kampaka norte. Xkaman uajkisaskej ipan on kalakiloyan kampa yejuamej kalakiskej, yej ika onkaj uajkisaskej ipan on kalakiloyan yejuan nokaua inmixpan. 10 On rey ika onkaj nenmouan kalakis nemejuamej israelitas, niman no, nenmouan uajkisas. 11 Ipan on ikatlakajtin sesentlamantikej iluimej, on rey nechmakas sempoajli litro trigo noso cebada iuan cada becerro, niman iuan cada borrego, no ichkich trigo noso cebada nechmakas. Niman iminuan on borreguitos uelis nechmakas trigo noso cebada san kech yejua kinekis. Niman iuan cada sempoajli litro trigo noso cebada, nechmakas yeyi litro uan tlajko aceite de oliva.
12 ‘Ijkuak on rey kixtis ipan iyojlo para nechmakas sen uentli nejua nemoTEKO, sen uentli yejuan nochi tlatlas ipan on tlaixpan noso sen uentli yejuan kichiuas para nemejuamej israelitas nenmoyoltlaliskej nouan, yejua kitlatlapouiliskej ipan on ueyitsakuijlotl yejuan onkaj kampaka ikisayan tonaltsintli ipan on kiauakpitentsin para kuajkauas on iuen. On iuen no ijki kiuenchiuas kenon yejuan kiuenchiua ijkuak sábados. Niman ijkuak yejua uajkisas, kitsakuaskej on ueyitsakuijlotl.
(On uentli yejuan notlalis mojmostla)
13 ‘Mojmostla ijkuak kualkan, nejua nemoTEKO nennechmakaskej sen uentli yejuan nochi tlatla ipan on tlaixpan, on uentli yes sen borreguito de sexijkayotl yejuan xkanaj tlakokojli ipan itlakayo. 14 No ijki, mojmostla ijkuak kualkan nennechmakaskej nejua nemoTEKO chikome litro trigo noso cebada niman se litro aceite de oliva yejuan kineloskej iuan on harina. Nejua nemoTEKO ijki nitlanauatia para in uentli nochipa nennechmakaskej. 15 Yejua ika tej, nochipa mojmostla ijkuak kualkan ika onkaj nennechuentlaliliskej on borreguito yejuan nochi tlatla ipan on tlaixpan iuan on uentli de trigo noso de cebada niman iuan aceite de oliva.
(Kenijki on rey kitemakas itlal)
16 ‘Nejua nemoTEKO Dios, ijkin nikijtoua: Tla on rey seki kimaka itlal on ikoneu, tla ijkon, on tlajli iyaxka yes on ikoneu niman para iuejkakoneuan para nochipa. 17 Pero tla on rey seki kimaka itlal semej on itekitkauan, tla ijkon, on itekitkau uej san iyaxka yes on tlajli hasta on xipan de tlamakaualistli. Ijkuakon, on tlajli oksejpa iyaxka yes on rey. San on tlajli yejuan kiminmakas ikoneuan, intech yejuamej nokauas para nochipa. 18 On rey xuelis kikuilis itlal yakaj israelita. On tlajli yejuan yejua kinmakas ikoneuan, ika onkaj kinmakas yejuan yejua iyaxka, niman ijki xakaj nokauas xikan itlal, niman on notlapejpeniluan israelitas xkinkixtiskej ipan imintlal."
(On hornos kampa tlakxitiskej ipan on ueyitiopan)
19 Kemaj on tlakatl yejuan nechititiaya itlal on ueyitiopan, onechuikak kampaka onkaj on kaltlajpiyaloyan niman kampaka onkaj ikalakiloyan on ueyikiauak. Niman otajsikej inakastlan on kaltlajpiyolouan yejuan ontlachixtikatka kampaka norte, kampaka onokej on cuartos yejuan san ikatlakajtin para on tiopixkej. Niman on tlakatl onechontlachaltij inkuitlapan on cuartos kampaka ikalakiyan tonaltsintli, 20 niman onechijlij: “Nikan yes kampa on tiopixkej kikxitiskej innakayo on yolkej ikan iyayo, yejuan kinuentlaliaj ipampa tlajtlakojli noso pampa tla se itlaj xkuajli okitechiuilij. Niman no, nikan yes kampa on tiopixkej kikxitiskej on pan para uentli de trigo noso de cebada. Niman ijki, xnonekis kinkixtiskej on uentin ipan iueyikiauak on ueyitiopan, niman on israelitas no xkitskiskej on uentin para ijki xkiseliskej castigo.”
(On tlakxitiloyanmej kampa kikxitiaj innakayo on yolkej para uentli)
21-22 Kemaj on tlakatl onechuikak ipan iueyikiauak on ueyitiopan niman onechtlajtlaititij nochiuiyan ipan on naukan iesquinas. Niman ipan cada esquina onikitak onkatka sen pitentsin kiauak, niman cada pitentsin kiauak kipiyaya sempoajli metro ika ueyak niman majtlaktli uan makuijli metro ika patlauak, niman nochimej sano ijki ichkich tlatemachiualtin katkaj. 23 Inyeualkan nochimej on pipitikej kiauakmej, onkatka itlaj ken sen mesita de tetl yejuan pepechijtikatka ipan on kiauak. Niman tlatsintlan de on ken mesita, ipan nochi iyeualkan on tepantli, okitlachijchiuilijkej kampa tlatlatiskej. 24 Kemaj on tlakatl onechijlij: "Nikan yes kampa on yejuan tlapaleuijkej ipan on ueyitiopan tlakxitiskej. Nikan kuakualatsaskej innakayo on yolkej yejuan on israelitas kintemakaskej para uentli."