(On tlajli yejuan ikatlakajtli yes para toTEKO)
(Ez 48.9-20)
45
“Ijkuak nenkixeloskej on tlajli ikan sorteos, para cada tribu de Israel kimakaskej on tlajli yejuan kitocaros kipiyas ken herencia, nenkauaskej seki tlajli yejuan yes san para nejua nemoTEKO. On tlajli kipiyas majtlaktli uan ome kilómetro uan tlajko ika ueyak niman majtlaktli kilómetro ika patlauak, niman nochi on tlajli yektlajli yes. 2 Niman ipan on tlajli yejuan nenkauaskej para nejua, no nenkauaskej sen tlajli kampa nenkichijchiuaskej noueyitiopan; on tlajli cuadrado yes yejuan kipiyas 250 metros ipan on naukan ilado. Iyeualkan on tlajli kampa onyas on ueyitiopan, kipiyas kampa kajtos sempoajli uan makuijli metro ika patlauak. 3 On tlajli yejuan nenkauaskej para nejua nemoTEKO, nenkitlajkoxeloskej. Kijtosneki, cada tlaxelojli kipiyas majtlaktli uan ome kilómetro uan tlajko ika ueyak niman makuijli kilómetro ika patlauak. Ipan on achtoj tlaxelojli de on tlajli, ompa más tlayekkan yes pampa ompa onias noueyitiopan. 4 No ijki, on achtoj tlaxelojli de on tlajli, yes para on tiopixkej yejuan tekitiskej ipan on ueyitiopan niman yejuan nonisiuiyaj notech para nechtekipanoskej. Ompa ipan on tlajli, on tiopixkej kinchijchiuaskej inkaluan, niman no ompa onias noyektiopan. 5 Niman on okse tlaxelojli de on tlajli yejuan no kipiyas majtlaktli uan ome kilómetro uan tlajko ika ueyak niman makuijli kilómetro ika patlauak, kiminmakaskej on levitas yejuan tekichiuaskej ipan on ueyitiopan. Niman ompa, yejuamej kinkauiliskej kinchijchiuaskej inuejueyikalpanuan. 6 Niman sa ika nochi, itech on tlajli yejuan kiminmakaskej on levitas, onyas sen tlajli yejuan kipiyas majtlaktli uan ome kilómetro uan tlajko ika ueyak niman ome kilómetro uan tlajko ika patlauak. In tlajli yes para sen ueyikalpan kampa san akinon yejuan israelita uelis ompa chantis.(On tlajli yejuan iyaxka yes on rey)
(Ez 48.21-22)
7 'No ijki, onyas ome tlajli yejuan ikatlakajtli yes para on rey. In ome tlajli iuan nonamikiskej inajnakastlan on yektlajli iuan on tlajli yejuan ikatlakajtli para on ueyikalpan. On tlajli yejuan teuan nonamikis kampaka ikalakiyan tonaltsintli, ajsis hasta itech on mar Mediterráneo; niman on tlajli yejuan teuan nonamikis kampaka ikisayan tonaltsintli ajsis hasta itech on río Jordán. Kampaka ikisayan tonaltsintli niman kampaka ikalakiyan, no ichkich ika ueyak yes ken itlal yes cada tribu. 8 On irey Israel kipiyas itlal yejuan yejua iyaxka yes, para ijki, on tekiuajkej xok kintlalkuilijtinemiskej on notlapejpeniluan israelitas. Cada tribu de Israel kipiyas itlal.
(Tlanauatiltin para on rey)
9 'Nejua nemoTEKO Dios ijkin nikijtoua: ¡Nemejuamej reyes de on tlajli Israel, makasa xtetlajyouiltikan niman makasa xtetekitiltikan san ijki xikan tlaxtlauijli! ¡Xtekiuajtikan ikan yolchipaualistli niman ikan yolmelajkilistli! ¡Makasa xkinmichtekilikan intlal on notlapejpeniluan israelitas! ¡Nejua nemoTEKO Dios, ijki nitlanauatia!
10 'Xkintekitiltikan on pesas niman on tlatemachiualtin yejuan kuajli kajxitiaj on tlen nenkitemachiuaj. 11 On tlatemachiuajli yejuan ika nenkitemachiuaj trigo noso san tlinon tlakyotl yejuan uaki, no ma ichkich kenon tlatemachiuajli para on tlajtlamach tlen atki. On tlatemachiuajli yejuan ipan nenmouikaskej noneki yes yejuan kipiya 220 litros, niman no nenkixexeloskej majtlaktlikan niman hasta cien partes. Yejua in kijtosneki, ipan on 220 litros kisas 22 litros.
12 'No ijki, para on tlen yetik, yejua in tlatemachiuajli nenkuiskej: sempoajli geras uajnochiua se siclo yejuan kipiya majtlaktli iuan se gramo; yeyipouajli siclo uajnochiua se mina. a
13 'Niman nemejuamej israelitas nemechijlia: In yejua yes on uentli yejuan noneki nenkimakaskej on rey para kiuentlalis: Nochi on tlen tlakis ipan nemotlatok de trigo niman de cebada, noneki nenkixexeloskej yeyipouajlikan, niman nenkimakaskej san se tlaxelojli de nochi on yeyipouajlikan. 14 No ijki, on nemoaceite de oliva noneki nenkixexeloskej. Ipan cada 100 litros nenkimakaskej se litro on rey, 15 niman ipan cada 200 borregos yejuan tlakuajkuaskej ipan isakayoj on tlajli Israel, nenkixtiskej sentetl borrego yejuan más tomauak para uentli. Nochi yejua in uentin de trigo noso de cebada, uentin yejuan nochi tlatla ipan on tlaixpan niman uentin yejuan kichiuas para nenkipiyaskej yolseuilistli nouan, kichiuaskej para nemechtlapojpoluilis nenmotlajtlakoluan. ¡Nejua nemoTEKO Dios, ijki nitlanauatia!
16 'Nochimej nemejuamej israelitas ika onkaj nenkimakaskej in uentin on rey de Israel. 17 Niman on rey yejua itekiyo yes para kintemakas on yolkej para on uentli yejuan nochi tlatla. Niman no, yejua kitemakas nochi on tlinon nonekis para on uentli de trigo, de cebada niman de vino. Yejua in uentin kinuentlaliskej ipan on yenkuik metstli niman ijkuak sábados, niman no, ipan nochimej on yekiluimej yejuan nemechnauatia nenkichiuaskej. No ijki, on rey kitemakas uentli ipampa tlajtlakojli, on uentli de trigo niman de cebada, on uentin yejuan nochi tlatla ipan on tlaixpan niman on uentin de yoltlalilistli para nemejuamej israelitas nemechtlapojpoluilis nenmotlajtlakoluan.
(On iluitl Pascua)
18 'Nejua nemoTEKO Dios, ijkin nitlanauatia: Ipan on achtoj tonajli de on achtoj metstli ipan cada yenkuik xipan, nemejuamej nenkiuentlaliskej sen becerro yejuan xkanaj tlakokojli ipan itlakayo, para nenkichipauaskej de tlajtlakojli on ueyitiopan. 19 On ueyitlayekankitiopixki kikuis achijtsin iyesyo on yolki yejuan yokiuentlalijkej ipampa tlajtlakojli niman kinalauilis on kuamantin yejuan onokej inajnakastlan itsakuijlou on ueyitiopan. No ijki, kalauilis ikuatipan on tlaixpan ipan on naukan iesquinas niman ipan itenyeualkan on tlaixpan. Niman no, kinalauilis on kuamantin yejuan onokej inajnakastlan on ueyitsakuijlotl de ikiauakpitentsin on ueyitiopan. 20 Ipan on ika chikome tonajli de on metstli, on ueyitlayekankitiopixki no ijki tlauentlalis ipan on tlaixpan ipampa on yejuan otlajtlakoj maski xkimatiya ika otlajtlakoj noso xonomakak cuenta ika otlajtlakoj. Niman ijki chipauis on ueyitiopan. 21 Ipan on ika majtlaktli uan naui tonajli sano ipan on achtoj metstli ipan on yenkuik xipan, nenkichiuaskej on iluitl Pascua yejuan kuikas chikome tonajli. Niman on chikome tonajli san nenkuaskej on pan yejuan xkipiya tlaxokolilistli. 22 Ipan on tonajli on rey kitemakas sen becerro para se uentli ipampa yejua itlajtlakoluan niman ipampa nenmotlajtlakoluan nemochimej nemejuamej israelitas. 23 Niman mojmostla, on chikome tonajli ijkuak nentlaluichiuaskej, on rey kintemakas para uentin chikome becerro niman chikome borrego yejuan xkanaj tlakokoltin ipan intlakayo, ken uentli yejuan nochi tlatla para nejua nemoTEKO. Niman no, mojmostla kitemakas sen chivo para uentli ipampa tlajtlakojli. 24 Iuan cada becerro niman iuan cada borrego, on rey kitemakas 20 litros harina niman yeyi litro uan tlajko aceite de oliva.
(On iluitl de Kalmatsitsimej)
25 'No ijki, ipan on iluitl de Kalmatsitsimej yejuan nochiua ipan on ika kaxtojli tonajli de on ika chikome metstli, on rey noneki mojmostla chikome tonajli kitemakas uentin ipampa tlajtlakojli. On yolkej yejuan nenkinuentlaliskej, no ichkich yes ken on uentli yejuan onenkintemakakej ipan on ika majtlaktli uan naui tonajli de on achtoj metstli, niman no ijki iuan kiuentlaliskej on uentli de trigo noso de cebada niman iuan aceite de oliva.