On yenkuik mauistilistli (44.1 - 46.24)
(Kenijki notekitiltis on kalakiloyan yejuan nokaua kampaka ikisayan tonaltsintli de on ueyitiopan)
44
Kemaj on tlakatl oksejpa onechuikak itech on kalakiloyan yejuan onkatka ipan iueyikiauak on ueyitiopan, on ueyikiauak yejuan ontlachixtikatka kampaka uajkisa tonaltsintli, pero itech on kalakiloyan tlatsakutoya.2 Niman toTEKO onechijlij: “Ipan in kalakiloyan nochipa tlatsakutos, niman xakaj tlatlapos. Xakaj kalakis ompa, pampa ompa onikalak nejua nemoTEKO, akin niDios de Israel. Yejua ika tej, ompa nochipa tlatsakutos. 3 Ompa san uelis kalakis on ueyitekiuaj, irey Israel, para kikuas on yektlakuajli nixpan nejua nemoTEKO. Niman yejua kalakis kampaka onkaj on kalixkajli, niman sano ompaka uajkisas.”
(On yejuan ueliskej kalakiskej ipan on ueyitiopan)
4 Kemaj on tlakatl onechuikak niman otipanokej ipan on kalakiloyan yejuan nokauaya kampaka norte de on ueyitiopan. On kalakiloyan onkatka ixpan on ueyitiopan. Niman ijkuak nejua onikitak ika iueyilis toTEKO yokitemiltij on ueyitiopan, oninotlakuantelkets niman oninopachoj hasta ipan tlajli. 5 Kemaj toTEKO onechijlij: “Tejua tlaltikpaktlakatl, kuajli xkita niman kuajli xkaki nochi on tlinon nimitsijlis de on leyes niman de on tlanauatiltin yejuan noneki nochiuas ipan on noueyitiopan. Kuajli xkita akinonmej on yejuan ueliskej kalakiskej niman kisaskej ipan on ueyitiopan niman on yejuan xueliskej kalakiskej niman kisaskej ipan on ueyitiopan.
6 'Xkinmijli on xipanteitanij israelitas ika nejua nemoTEKO Dios ijkin nikinmijlia: ‘Nemejuamej israelitas, sanoyej yonennechyolajxitijkej ipampa on tlinon sanoyej xkuajli nenkichiuaj. 7 Nemejuamej nenkijtlakouaj on noueyitiopan, pampa nenkinkauiliaj on yejuan xchanejkej ma kalakikan ompa maski xkipiyaj on neskayotl de on nopacto ipan intlalnakayo, nion nechtlakaitaj ipan iminyojlo nejua akin niDios. Nenkijtlakouaj on noueyitiopan ijkuak nenkinkauiliaj on xchanejkej nechuentlaliliaj inchajka niman inyesyo on yolkej, niman ijki, ipan nencholouaj on nopacto pampa nenkichiuaj nochi on tlen sanoyej tetlajyeloj. 8 Niman nemejuamej xok nenkichiuaj on yektekitl ken onemechnauatij, yej nochi yonenkinkauilijkej ma kichiuakan on yejuan xchanejkej.
9 'Yejua ika, nejua nemoTEKO Dios ijkin nikijtoua: Ipan noueyitiopan xakaj kalakis yejuan xchanej, yejuan xkipiya on neskayotl de on nopacto ipan itlalnakayo nion yejuan xnechtlakaita ipan iyojlo nejua akin niDios. Nion on yejuan xchanej yejuan chanti intsajlan on israelitas, xuelis kalakis ipan noueyitiopan. 10 On levitas yejuan onechtlalkauijkej ijkuak on israelitas xok okintlakamatkej notlanauatiluan niman okinmauistilijkej on ídolos, ika onkaj kiseliskej castigo ipampa intlajtlakoluan. 11 Yejuamej ueliskej tekitiskej ipan on noueyitiopan ken tsakuijlotlajpixkej, niman uelis kichiuaskej okseki tekitl ipan on noueyitiopan. Yejuamej ueliskej kinmiktiskej on yolkej para on uentli yejuan nochi tlatla niman on yolkej yejuan on israelitas kintemakaj para uentli; niman no, ueliskej notekimakaskej para kimpaleuiskej on israelitas. 12 Pero pampa yejuamej okinyolejkej on israelitas para okinmauistilijkej on ídolos, niman ijki okinchiualtijkej ma tlajtlakokan, ika onkaj kiseliskej castigo ipampa intlajtlakol. ¡Nejua akin nemoTEKO Dios, ijki yonikijtoj nochiuas! 13 Yejuamej xok ueliskej nechtekichiuiliskej ken tiopixkej. Yejuamej xueliskej kimatokaskej on tlajtlamach yejuan tlatiochijtin ipan on ueyitiopan, nion kimatokaskej on yekuentin, pampa noneki nochipa nemiskej ikan impinaualis ipampa on tlen sanoyej tetlajyeloj okichijkej. 14 Pero nikintekimakas ipan on okseki tlajtlamach tekitl yejuan noneki nochiuas ipan on noueyitiopan.
(On tiopixkej)
15 'Pero on tiopixkej levitas yejuan teuejkakoneuan itech Sadoc, yejuan sanken onechtekichiuilijkej ipan noueyitiopan ijkuak on israelitas okintlalkauijkej notlanauatiluan, yejuamej kemaj ueliskej nonisiuiskej notech para nechtekichiuiliskej. Yejuamej ueliskej uajlaskej notech para nechuentlaliliskej inchajka niman inyesyo on yolkej yejuan kinuentlaliaj. ¡Nejua nemoTEKO Dios, ijki nitlanauatia! 16 San yejuamej ueliskej kalakiskej ipan noueyitiopan; san yejuamej ueliskej nonisiuiskej itech notlaixpan para nechtekichiuiliskej, niman yejuamej kichiuaskej on tekitl yejuan nikinmaka. 17 Ijkuak yejuamej kalakiskej ipan on kalakiloyan para yaskej ipan ikiauakpitentsin on ueyitiopan, noneki san kitlalijtiaskej on tlakentli tlachijchijtli ikan on tela de lino. Ijkuak yejuamej nechtekichiuiliskej ipan on kiauakpitentsin noso ipan on noueyitiopan, xnotlakentiskej ikan on tlakentli tlachijchijtli ikan tela de lana. 18 Ipan intsontekon kitkiskej sen kuatlakentli tlachijchijtli ikan tela de lino, niman on intsintlaken niman inxijlanilpika, no tlachijchijtli yes ikan tela de lino. Yejuamej xitlaj kinotlaliltiskej yejuan ika nitoniskej. 19 Niman ijkuak on levitas ye uajkisaskej ipan iueyikiauak on ueyitiopan kampa nemij on israelitas, noneki notlakempatlaskej. On intlaken yejuan kitlaliskej ijkuak tekichiuaskej ipan on ueyitiopan, noneki kixtiskej niman kauaskej ipan icuartos on ueyitiopan. Kemaj kitlaliskej okse tlakentli, para ijkon, on israelitas yejuan xtiopixkej, xkinmatokaskej on yektlakentin niman ijki xkiseliskej castigo.
20 'Yejuamej xnokuatexikaloskej nion xkauiliskej ma ueueyakiya intson, yej san pitentsin kinokauiliskej. 21 Nion se tiopixki konis vino ijkuak ye kalakis ipan ikiauakpitentsin on ueyitiopan. 22 Niman yejuamej xnonamiktiskej iuan sen siuakaualtsintli noso iuan sen siuatl yejuan onoxotonij iuan iueuentsin. Yej san uelis nonamiktiskej iuan sen siuatl israelita yejuan ichpochtli, yejuan xe kaman noteka iuan yakaj tlakatl. Noso no, yejuamej ueliskej nonamiktiskej iuan isiuakaualtsin okse tiopixki.
23 'On tiopixkej noneki kinmachtiskej on notlapejpeniluan israelitas para ma uelikan ma kimatikan on tlinon yektli niman on tlinon xyektli, niman no, ma kimatikan on tlinon chipauak nixpan niman on tlinon xchipauak nixpan. 24 Ijkuak onyas tlauejli intech on israelitas, on tiopixkej yejuamej nochiuaskej ken teyolkuitijkej itech yejuamej. Niman ijkuak teyolkuitiskej, ika onkaj kichiuaskej ken nejua nitlanauatia ipan noleyes. Yejuamej ika onkaj kintlakamatiskej nochi noleyes niman notlamachtiluan de on ken kichiuaskej on yekiluimej para notlakaitalis, niman kintlakaitaskej nosábados ken yektonaltin.
25 'On tiopixkej xkaman kimatokaskej sen mikatlalnakayotl para maka nijtlakoskej. Pero san uelis kimatokaskej imikatlalnakayo imintataj, iminnanaj, iminkoneu yejuan tlakatl noso siuatl, noso inmikniu yejuan tlakatl noso yejuan siuatl yejuan xononamiktij. 26 Niman tla saman onijtlakojkej, noneki nochipauaskej ijkon ken nejua akin ninemoTEKO yonikinnauatijka, niman kemaj nochaskej chikome tonajli. Niman sakin uelis nokuekpaskej niman tekitiskej ipan on ueyitiopan. 27 Ijkuak oksejpa kalakiskej ipan ikiauakpitentsin on ueyitiopan para konchiuaskej intekiu, noneki nechmakaskej sen uentli ipampa intlajtlakol. ¡Nejua nemoTEKO Dios, ijki nitlanauatia!
28 'On tiopixkej xkiseliskej itlaj tlajli ken herencia ipan on tlajli Israel pampa nejua nikintekipanos. 29 Yejuamej kikuaskej on trigo niman cebada yejuan on israelitas nechuentlaliliskej, niman no, yejuamej ueliskej kinkuaskej on yolkej yejuan kinuentlaliskej ipampa tlajtlakoltin niman ipampa ijkuak se itlaj xkuajli okitechiuilij. Niman nochi on tlen on israelitas nechyaxkatiaj, iminyaxka yes on tiopixkej. 30 On tiopixkej kiseliskej on tlen más kuajli de on achtoj pixkilistli, niman no, kiseliskej on tlen más kuajli de nochi on uentin. Niman ijkuak on israelitas kuektlaliskej on tixtli para on pan, on yejuan más kuajli tixtli kinmakaskej on tiopixkej. Niman ijki notlatiochiualis onyas ipan iminchan on israelitas. 31 On tiopixkej maka kikuaskej itlaj yolki yejuan patlani noso san katlejua yolki yejuan san ijki miki noso yejuan okimiktij itlaj tepeyolki tekuani.