(Oksejpa ouajlaj iueyilis toTEKO ipan on ueyitiopan)
43
Kemaj on tlakatl oksejpa onechuikak itech on kalakiloyan yejuan nokauaya kampaka ikisayan tonaltsintli de on ueyitiopan. 2 Niman san ijsijkapan, onikitak kampaka ikisayan tonaltsintli uajlaya on petlankatlauijli yejuan kixnextia on Dios de Israel ikan iueyilis. Ijkuak uajlaya, sanoyej chikauak uajkakistitiaya ken itlaj iakoxonajlo miyek atl, niman ipan on tlajli sanoyej otlauilpantiak ikan iueyilis. 3 In tlatlachalistli ken ipan temiktli, katka kenon yejuan onikitak ijkuak toTEKO ouajlaj okixoxotoniko on ueyikalpan Jerusalén niman kenon yejuan onikitak itech on río Quebar. Niman nejua oninotlakuantelkets niman oninopachoj hasta ipan tlajli. 4 Niman on petlankatlauijli yejuan kixnextia Dios ikan iueyilis, okalakito ipan on ueyitiopan. Yejua okalak kampaka onkaj on kalakiloyan yejuan nokaua kampaka ikisayan tonaltsintli de on ueyitiopan.5 Kemaj, on ipoder Dios onechkuiteu niman onechuikak ipan ikiauakpitentsin on ueyitiopan, niman onikitak ika iueyilis toTEKO okitemiltij on ueyitiopan. 6 Chika on tlakatl ijkaya notech, onikak ika toTEKO onechajnots desde ijtik on ueyitiopan. 7 Niman nechijliaya: “Tejua tlaltikpaktlakatl, ipan in ueyitiopan, nikan in kampa onkaj notrono. Nikan nejua nitlamandaros, nikan nichantis para nochipa intsajlan on israelitas. Nion yejuamej nion iminreyes, xokaman oksejpa kijtlakoskej noyektlakaitalis pampa xokaman kinmauistiliskej oksekimej dioses, nion kinmauistiliskej inmixneskayouan on iminreyes yejuan yomikkej. 8 Nion xokaman kinchijchiuaskej imimpalacios itech noueyitiopan kampa san sen tepantli techxelojtias. Yejuamej okijtlakojkej noyektlakaitalis pampa okichijkej tlinon nejua sanoyej nechkualania. Yejua ika, nejua sanoyej onikualan iminuan yejuamej niman onikchiu para ma mikikan. 9 Pero aman, nikinnauatia ma kitlalkauikan nochi on tlinon xkuajli okichijkej nixpan, niman makasa ma kinmauistilikan inmixneskayouan on iminreyes yejuan yomikkej, niman nejua iminuan nichantis para nochipa.
10 Niman tejua tlaltikpaktlakatl, xkintlajtlajtouili on israelitas kenijki tlachijchijtli yes on ueyitiopan yejuan yonimitsititij niman kech ika tlatejtemachijtli yes, para ijki yejuamej ma pinauakan pampa on ueyitiopan de Jerusalén oxoxoton impampa yejuamej intlajtlakoluan. 11 Niman tla yejuamej pinauaj ipampa nochi on tlinon xkuajli yokichijkej, tejua kuajli xkintlajtlajtouili kenijki tlachijchijtli yes on ueyitiopan niman nochi on tlinon kipiyas. Xkintlajtlajtouili kenemej tlajtlamatis niman kech ika tlatejtemachijtli yes. Xkinmijli ika kipiyas ikisaloyanuan niman ikalakiloyanuan niman nochi okseki tlajtlamach. Niman no, xkinmijli nochi on noleyes kampa nitlanauatia ika noneki melajki nechmauistiliskej. Tejua xkinchijchiuili sen dibujo de on ueyitiopan, para ijki más kuajli kajsikamatiskej kenijki yes niman ijki kichijchiuaskej. No ijki, xkinmijkuilouili nochi on noleyes, para ijki uelis kintlakamatiskej. 12 In yejua ley de on ueyitiopan yejuan onyas ikuapan on tepetl: Nochi on tlajli yejuan kiyeualojtias on ueyitiopan, sanoyej tlatiochijtli niman yektli yes.”
(On tlaixpan)
13-17 On tlaixpan yejuan onikitak ipan on tlatlachalistli, achi ken kuapitsauak katka, pampa tlachijchijtli katka ikan yeyi cuadrados yejuan nejnepanijtikatkaj niman sesentlamantikej tlatemachijtin katkaj. On cuadrado kampa tlatsintlan, kipiyaya chikome metro ipan on naukan ilado niman se metro ika tlakpak. On cuadrado kampa itlajkotian on tlaixpan, kipiyaya chikuasen metro ipan on naukan ilado niman ome metro ika tlakpak. Niman on cuadrado kampa más tlakpak de on tlaixpan, kampa kitlatiayaj on uentin, kipiyaya ome metro ipan on naukan ilado niman ome metro ika tlakpak. Niman ikuatipan on tlaixpan ipan cada esquina, kipiyaya ken itlaj ikuakuautsitsiuan. On iescaleras on tlaixpan nokauayaj kampaka ikisayan tonaltsintli. Niman iyeualkan on tlaixpan onkatka sen apantli yejuan kipiyaya tlajko metro ika uejkatlan niman tlajko metro ika koyauak. Niman in apantli iyeualkan kipiyaya iten yejuan kistikatka 25 centímetros.
18 Kemaj toTEKO Dios onechijlij: “Tejua tlaltikpaktlakatl, ijkuak on tlaixpan yokichijchijkej, in yejua tlanauatiltin yejuan ika onkaj nenkichiuaskej: Ipan on tlaixpan kiuentlaliskej on uentli yejuan nochi tlatla, niman ipan nochi ilados kajuichiskej ikan yestli. “Tejua tlaltikpaktlakatl, in yejua tlanauatiltin para on tlaixpan yejuan kichijchiuaskej: Ipan on tlaixpan kiuentlaliskej on uentli yejuan nochi tlatla, niman ipan nochi ilados kajuichiskej ikan yestli. 19 On tiopixkej levitas yejuan teuejkakoneuan itech Sadoc, yejuan uajlaskej nixpan para nechtekipanoskej, tikinmakas sen becerro para kiuentlaliskej ken uentli ipampa tlajtlakojli. ¡Nejua nemoTEKO Dios, ijki nitlanauatia! 20 Kemaj tikuis achijtsin iyesyo on becerro, niman ika tikinajuichis on naui ken itlaj ikuakuautsitsiuan on tlaixpan. Niman no tikajuichis on naukan iesquina on tlaixpan, kampa itlajkotian niman ipan itenyeualkan. Ijkon tikchipauas de tlajtlakojli niman tinechyaxkatis para niuelis nikselis on uentin yejuan ipan kiuentlaliskej. 21 Kemaj on becerro yejuan okiuentlalijkej ipampa tlajtlakojli, tikixtis de ikiauakpitentsin on ueyitiopan, niman tikontlatis kampa onitlanauatij kitlatiskej. 22 Uajmostla, tejua tikuentlalis ken sen uentli ipampa tlajtlakojli sen chivito yejuan xkanaj tlakokojli ipan itlakayo, niman ikan iyesyo tikchipauas on tlaixpan, no ijki ken otikchipau ikan iyesyo on becerro. 23 Ijkuak tejua yotlan tikchipaua on tlaixpan niman yotinechyaxkatij, kej tikonanas sen becerro niman sen borrego yejuan xkanaj tlakokoltin ipan intlakayo, 24 niman tinechinuentlalilis. On tiopixkej ma kimpoyelikan on yolkej niman ma kintlatikan ken sen uentli yejuan nochi tlatla para nejua notlakaitalis. 25 Mojmostla, chikome tonajli, tikuentlalis sen chivito ken uentli ipampa tlajtlakojli, niman no, tikuentlalis sen becerro niman sen borrego, nochimej xkanaj tlakokoltin yeskej ipan intlakayo. 26 Mojmostla, chikome tonajli, on tiopixkej kuajli kichipauaskej on tlaixpan, niman ijki nokauas tlatiochijtli para ipan kinuentlaliskej uentin yejuan yektli. 27 Ijki kichiuaskej ipan nochi on chikome tonajli, niman kampa ika chikueyi tonajli, ijkuakon peuas ika on israelitas mojmostla kuajkiskej uentin, niman on tiopixkej peuas kiuentlaliskej on uentli yejuan nochi tlatla ipan on tlaixpan niman on uentli yejuan kichiuas para on israelitas kipiyaskej yolseuilistli nouan. Niman ijkuakon, nejua nemechselis ikan paktli. ¡Nejua nemoTEKO Dios, ijki yonikijtoj nochiuas!”