(Imincuartos on tiopixkej yejuan nokauaj kampaka norte de on ueyitiopan)
42
Sakin, on tlakatl onechuikak ipan on kalakiloyan yejuan onkatka kampaka norte de on ueyitiopan, niman otajsikej ipan on ueyikiauak de on ueyitiopan. Ompa onkatkaj ome tlatekpantin de incuartos on tiopixkej. On cuartos nokauayaj nisiu on tepantli de ikiauakpitensin on ueyitiopan. 2 On tlatekpantli de on cuartos yejuan ontlachixtikatka kampaka norte niman yejuan onkatka itech on tepantli de ikiauakpitentsin on ueyitiopan, san se ueyi kipiyaya 50 metros ika ueyak, niman ika patlauak kipiyaya sempoajli uan makuijli metro. 3 On achtoj tlatekpantli de on cuartos yejuan onkatka itech on tepantli de ikiauakpitentsin on ueyitiopan, katka matlaktli metro ika patlauak. On ika ome tlatekpantli de on cuartos yejuan onkatka ixpan on achtoj tlatekpantli, ajsiya kampa onkaj on tepejpechyoj ipan on ueyikiauak de on ueyitiopan. On tlatekpantin de on cuartos nejnepanjtikatkaj yeyi piso para tlakpak, niman on ome tlatekpantli de on cuartos nijixnamiktikatkaj. 4 Intsajlan on ome tlatekpantin de on cuartos onkatka kampa nojuitiua yejuan kipiyaya makuijli metro ika patlauak niman 50 metros ika ueyak. Nochimej intsakuijlouan on cuartos tlapouiyaj kampaka norte. 5 On cuartos de on piso yejuan más tlakpak, más pipitikej katkaj xkenon cuartos de on piso tlajkotian. Niman on cuartos de on piso tlajkotian, no más pipitikej katkaj xkenon cuartos de on piso tlatsintlan. Ijkon onkatkaj para kipiyayaj on kampa nojuitiua. 6 On cuartos yejuan ika ome niman ika yeyi piso, xkimpiyayaj pilares ken kimpiyayaj on cuartos de on achtoj piso. On cuartos yejuan onkatkaj ipan on piso yejuan más tlakpak, más kalaktoyaj xken on cuartos de on ika ome piso, niman on cuartos de on ika ome piso no más kalaktoyaj xken on cuartos de on achtoj piso. 7-8 On tlatekpantin de on cuartos yejuan nokauayaj itech itepan on ueyitiopan, kipiyayaj 50 metros, niman on tlatekpantin de makuijli cuartos yejuan nokauayaj itech on kiauak tepejpechyoj, kipiyayaj 25 metros. Nochi on kampa nojuitiua yejuan nokaua ixpan on makuijli cuartos, kipiyaya 50 metros. 9 Ipan on achtoj piso de on cuartos, onkalakiyaj kampaka ikisayan tonaltsintli de iueyikiauak on ueyitiopan.
(Imincuartos on tiopixkej yejuan nokauayaj kampaka sur de on ueyitiopan)
10 Kampaka sur de iueyikiauak on ueyitiopan niman itech on tepantli de ikiauakpitentsin on ueyitiopan, no onkatka ome tlatekpantli de cuartos. 11 Yejuamej no ijkej katkaj niman ichkich tlatemachijtin katkaj kenon yejuan onkatkaj kampaka norte, niman no ijki kipiyayaj inkalakiloyan niman intsakuijlouan. Niman intsajlan on ome tlatekpantin de on cuartos, no onkatka kampa nojuitiua. 12 Ipan in cuartos yejuan onkatkaj kampaka sur, san ueliya onkalakij kampaka ikisayan tonaltsintli, kampaka ompeua on kampa nojuitiua yejuan nokaua ixpan on tepantli.
13 On tlakatl onechijlij: “On cuartos yejuan nokauaj kampaka norte niman kampaka sur de on ueyitiopan, on cuartos tlatiochijtin. On tiopixkej yejuan nonisiuiyaj niman tlauentlaliaj ixpan toTEKO, ompa kikuaj on uentin yejuan sanoyej tlatiochijtin. Niman no, ompa keuaj on uentin yejuan sanoyej tlatiochijtin, kenon uentli de trigo, on uentli ipampa tlajtlakojli, niman on uentli yejuan kiuentlaliaj ijkuak se itlaj xkuajli okitechiuilij. Ompa keuaj on uentin pampa ompa tlayekkan. 14 Ijkuak xe uajkisaj on tiopixkej de on ueyitiopan, achtoj notlakenpatlaskej para uajkisaskej ipan on ueyikiauak de on ueyitiopan. On intlaken yejuan kitlaliaj ijkuak tlauentlaliaj, ompa noneki nokauaskej pampa on tlakentin yektlakentin. Yejuamej ika onkaj kitlaliskej okse intlaken para yaskej teixpan.”
(Itlatemachiualis on tlajli kampa onkaj on ueyitiopan)
15 Ijkuak on tlakatl otlan kitemachiua nochi on tlajli kampa ijkak on ueyitiopan, onechuikak kampaka onkaj on kaltlajpiyaloyan, itech on kalakiloyan yejuan nokauaya kampaka ikisayan tonaltsintli, para okitemachiu nochi on tlajli yejuan onkaj iyeualkan on ueyitiopan. 16 Okikuik on varajtlatemachiuajli niman okitemachiu on lado kampaka ikisayan tonaltsintli, niman kipiyaya 250 metros ika ueyak. 17 Kemaj okitemachiu on lado kampaka norte, niman no kipiyaya 250 metros. 18 Kemaj kej okitemachiu on lado kampaka sur, niman no ijki kipiyaya 250 metros. 19 Niman sa ika nochi, okitemachiu on lado kampaka ikalakiyan tonaltsintli, yejuan no kipiyaya 250 metros. 20 On tlakatl okitemachiu on naui lado de iueyikiauak on ueyitiopan, niman ipan cada ilado kipiyaya 250 metros ika ueyak. Iyeualkan on kiauak kipiyaya tepanchinantli para kixelouaya on kampa tlayekkan de on kampa xtlayekkan.