41
Kemaj on tlakatl onechuikak ikalijtik on ueyitiopan kampa Tlayekkan, niman okintemachiu on ome pilares yejuan nokauayaj inajnakastlan ikalakiloyan on kalijtik, niman cada se, kipiyaya yeyi metro ika tomauak. 2 Ikalakiloyan on kalijtik kipiyaya makuijli metro ika patlauak, niman on tepantin kampa salijtikatka itsakuijlou, kipiyaya ome metro uan tlajko ika tilauak cada se. Kemaj kej okitemachiu on más ueyikalijtik de on ueyitiopan, kampa itoka Tlayekkan. Niman ompa kipiyaya sempoajli metro ika ueyak niman majtlaktli metro ika patlauak. 3 Sakin, on tlakatl kej oyaj ipan on kalijtik kampa itoka Más Tlayekkan. Niman ompa okintemachiu on pilares yejuan onkatkaj ipan ikalakiloyan on kalijtik, niman cada se kipiyaya se metro ika tomauak. Ikalakiloyan on kalijtik kipiyaya yeyi metro ika patlauak, niman on pilares yejuan kipiyaya inajnakastlan, cada se kipiyaya yeyi metro uan tlajko ika tomauak. 4 Kemaj kej yejua okitemachiu on kalijtik kampa Más Tlayekkan, niman kipiyaya majtlaktli metro ipan on naukan ilado. Kemaj on tlakatl onechijlij: “In yejua kalijtik kampa Más Tlayekkan.”(On cuartos yejuan tekpaniyaj iyeualkan itepan on ueyitiopan)
5 Kemaj on tlakatl okitemachiu itepan on ueyitiopan yejuan kipiyaya iyeualkan, niman kipiyaya yeyi metro ika tilauak. Iyeualkan on ueyitiopan itech itepan, onkatkaj cuartos yejuan kipiyayaj ome metro ika ueueyakej. 6 Yejua in cuartos nejnepanijtikatkaj niman katkaj de yeyi piso, niman ipan cada piso onkatkaj 30 cuartos. On ikuitlapan itepan on ueyitiopan, más kanauak katka ipan cada piso de on cuartos xken on piso yejuan tlatsintlan, niman ijki, on cuartos semi kuajli ijkayaj itech on tepantli maski xsasalijtikatkaj ipan on ueyitiopan. 7 Ipan cada piso de on cuartos, más okimpatlajtiajkej on cuartos. Tlatsintlan ipan on achtoj piso, on cuartos más pipitikej katkaj. Inakastlan on ueyitiopan onkatkaj escaleras yejuan ika ajsiyaj ipan cada piso de on cuartos, niman ijki ajsiyaj ipan on cuartos yejuan más tlakpak. 8 No ijki, nejua onikitak ika iyeualkan on ueyitiopan otlaixmankej ika tlajli. On tlaixmanajli kipiyaya yeyi metro ika tlakpak; ipan on tlaixmanajli okinchijchijkej on cuartos yejuan onkatkaj itech on ueyitiopan.
(On kampa kajtok yejuan kinxelouaya on cuartos yejuan onkatkaj inakastlan on ueyitiopan niman on cuartos kampa nokauayaj on tiopixkej)
9-10 On intepan on cuartos de inyeualkan, kipiyaya ome metro uan tlajko ika tilauak. Niman on cuartos xelijtikatkaj de incuartos on tiopixkej yejuan no onkatkaj iyeuakan on ueyitiopan, niman on kampa xelijtikatkaj, kajtikatka majtlaktli metro ika patlauak. 11 Intsakuijlouan on cuartos yejuan onkatkaj kampaka norte de on ueyitiopan, tlapouiyaj kampaka norte; niman intsakuijlouan on cuartos yejuan onkatkaj kampaka sur de on ueyitiopan, tlapouiyaj kampaka sur. Imixpan on tsakuijlomej kampa se uelis panos, kipiyaya ome metro uan tlajko ika patlauak.
(On kajli yejuan onkatka kampaka kalaki tonaltsintli de on ueyitiopan)
12 Ixpan on kiauak kampaka kalaki tonaltsintli, onkatka sen ueyikajli yejuan kipiyaya 35 metros ika patlauak niman 45 metros ika ueyak. Niman on itepan kipiyaya ome metro uan tlajko ika tilauak.
(Itlatemachiualis on ueyitiopan)
13 Kemaj on tlakatl okitemachiu on ueyitiopan, niman nochi kech ika ueyak kipiyaya 50 metros. Niman on kiauak kampa tlatsakutoya, teuan on ueyikajli niman itepan, no kipiyaya 50 metros ika ueyak. 14 Ixko on ueyitiopan, teuan on kiauak kampa tlatsakutoya yejuan nokauaya kampaka ikisayan tonaltsintli, kipiyaya 50 metros ika patlauak. 15 Kemaj on tlakatl okitemachiu on ueyikajli yejuan onkatka ikuitlapan on ueyitiopan, ixpan on kiauak kampa tlatsakutoya. Niman teuan okintemachiu on itepanuan de inajnakastlan. Niman kipiyaya 50 metros ika ueyak.
(Kenijki tlachijchijtli katka on ueyitiopan)
Nochiuiyan ipan intepanuan on kampa Tlayekkan, on kampa Más Tlayekkan niman ikalixkal on ueyitiopan, 16-17 tlapachijtikatka ikan tablas yejuan kanauak. Nochiuiyan intech on ventanas yejuan kipiyayaj tsatsastli, itech on kiauatempan kampa kalakoua, niman desde on piso hasta on ventanas, no tlapachijtikatka ikan tablas. Ipan itepanuan on ueyitiopan, tlaijtikkopa niman kiauakkopa, 18 tentikatka ikan inmixneskayouan querubines* niman palmeras. Cada querubín ixnestikatka intsajlan ome palmeras. Niman cada querubín kipiyaya ome ixayak; 19 se inxayak, katka de sen tlakatl yejuan ontlachixtikatka kampaka onkatka se palmera, niman on okse inxayak katka de sen león yejuan ontlachixtikatka itech on okse palmera. Niman ijki, iyeualkan nochi on ueyitiopan 20 onkatkaj inmixneskayouan on querubines niman on palmeras, desde tlatsintlan ipan piso, hasta inkuatipan on tsakuijlomej. 21 Ipan itepan on kalijtik kampa Tlayekkan, iyeualkan on kiauatentli kampa pepechijtika on tsakuijlotl, kipiyaya kojtin yejuan cuadrados katkaj.
(On tlaixpan tlachijchijtli ikan tabla)
Ixpan on kalakiloyan kampa Más Tlayekkan, onkatka itlaj yejuan tlajtlamatiya ken 22 sen tlaixpan tlachijchijtli ikan tablas. Yejua cuadrado katka, yejuan kipiyaya se metro cada lado niman se metro uan tlajko ika uejkapan. On iesquinas, on itsinkaxyo niman inajnakastlan, nochi de tablas katka. Niman on tlakatl onechijlij: “In yejua mesa yejuan onkaj ixpan toTEKO.”
(On tsakuijlomej)
23-24 Sanken ikalakiloyan on kalijtik kampa Tlayekkan niman on kampa Más Tlayekkan, kipiyayaj ome tsakuijlotl. Cada kiauatempan kipiyaya ome itsakuijlou yejuan tlapouiyaj hasta ipan tepantli ijkuak kintlapouayaj. 25 Ipan itsakuijlouan on kampa Tlayekkan, ixnestikatkaj querubines niman palmeras, no ijki kenon yejuan ixnestikatkaj ipan itepan on Tlayekkan. Niman on kalixkajli okuapachojkej ikan tablas. 26 Nochiuiyan inajnakastlan on kalixkajli, kipiyaya ventanas yejuan inajnakastlan kipiyayaj ixneskayouan palmeras. On cuartos yejuan onkatkaj itech on ueyitiopan, no okinkuapachojkej ikan tablas.