Tlatlachalistin ken temiktli de kenijki yes on país Israel (40.1 - 48.35)
On yenkuik ueyitiopan
(Ezequiel okitak ipan sen tlatlachalistli ken itemikpan ika okuikakej Jerusalén)
40
1-2 Ipan on ika majtlaktli tonajli de on achtoj metstli, ijkuak peua on yenkuik xipan, toTEKO okitlalij ipoder nopan, niman ipan sen tlatlachalistli ken notemikpan, onechuikak ipan on tlajli Israel. Ijkuakon ye tikajxiltiskiaj sempoajli uan makuijli xipan ika otechuikakej ken esclavos ne Babilonia, niman on ueyikalpan Jerusalén, kuikaya majtlaktli iuan naui xipan ika okixoxotonitoj. Niman ipan on tlajli Israel, toTEKO onechtlalij ipan sen tepetl yejuan sanoyej uejkapan. Kemaj, uejka kampaka sur, onikomintak uejueyimej kaltin yejuan nesiyaj ken de sen ueyikalpan. 3 Niman toTEKO onechuikak ompa, niman ompa onikitak sen tlakatl yejuan nesiya ken de bronce. On tlakatl ijkaya itech sen kalakiloyan, niman kimapixtikatka sen cinta métrica niman sen varajtlatemachiuajli yejuan ika tlatemachiuaya. 4 Niman on tlakatl onechijlij: “Tejua tlaltikpaktlakatl, kuajli xkita, kuajli xkaki niman kuajli xkajsikamati nochi tlinon nejua nimitsititis, pampa Dios omitsajuikak nikan para tikitas nochi tlinon nejua nimitsititis. Kemaj, ika onkaj timokuepas niman tejua tikinmijlis on israelitas nochi on tlinon tikitas.”(On kalakiloyan niman on kaltlajpiyaloyan yejuan nokauaj kampaka ikisayan tonaltsintli de on ueyikiauak)
5 Niman onikitak, iyeualkan ikiauak on ueyitiopan onkatka sen tepanchinantli. On varajtlatemachiuajli yejuan kimapixtikatka on tlakatl kipiyaya yeyi metro ika ueyak. Kemaj on tlakatl okitemachiu on tepanchinantli, niman kipiyaya yeyi metro ika tilauak niman yeyi metro ika uejkapan. 6 Kemaj on tlakatl oyaj itech ikalakiloyan on ueyikiauak yejuan ontlachixtikatka kampaka ikisayan tonaltsintli; otlejkok ipan escaleras niman okitemachiu ikiauaten on ueyitsakuijlotl, niman kipiyaya yeyi metro ika koyauak. 7 Ipan iyekmakopa on kalakiloyan, onkatka yeyi cuartojtlajpiyaloyan, niman ipan iopochmakopa onkatka okseki yeyi cuartojtlajpiyaloyan. On tlakatl okintemachiu on cuartos, niman cada cuarto kipiyaya yeyi metro ika ueyak niman yeyi metro ika patlauak. Itsajlan cada cuartojtlajpiyaloyan onkatka sen tepantli yejuan kipiyaya ome metro uan tlajko ika tilauak. Kampa ontlantikatkaj on cuartostlajpiyaloyan onkatka kampa nojuitiua yejuan kipiyaya yeyi metro ika ueyak yejuan yaya ipan sen kalixkajli yejuan ontlaxixtikatka kampaka onkaj on ueyitiopan. 8-9 Kemaj, on tlakatl no okitemachiu on kalixkajli yejuan ontlachixtikatka kampaka onkaj on ueyitiopan, niman kipiyaya naui metro. Onkatka ome pilar yejuan cada se kipiyaya se metro ika tomauak. 10 (Inajnakastlan on ueyitsakuijlotl yejuan nokauaya kampaka ikisayan tonaltsintli de on ueyitiopan, onkatka yeyi cuartojtlajpiyaloyan yejuan san se tlatemachijtli katkaj, niman on tepantin itsajlan cada cuarto, no san se tlatemachijtli katkaj.)
11 Kemaj on tlakatl okitemachiu on ueyitsakuijlotl, niman kipiyaya makuijli metro ika patlauak niman chikuasen metro uan tlajko ika ueyak. 12 Iyakapan cada cuartojtlajpiyaloyan kampa nemiyaj on tiopantlajpixkej, onkatka sen pitentsin tepantli yejuan kipiyaya tlajko metro ika patlauak niman tlajko metro ika uejkapan. Cada se on cuartojtlajpiyaloyan kipiyaya yeyi metro ika patlauak niman yeyi metro ika ueyak. 13 Kemaj okitemachiu kech ika uejka katka, desde itech on tepantli yejuan nokauaya ikuitlapan on cuartojtlajpiyaloyan hasta ikuitlapan on tepantli de on cuartojtlajpiyaloyan ipan okse ilado on kampa nojuitiua; niman kipiyaya majtlaktli uan ome metro uan tlajko. 14 Kemaj okitemachiu on kalixkajli, niman kipiyaya matlaktli metro ika patlauak. On kaltlajpiyaloyan ipan nochi ilados onkatka on ueyikiauak. 15 Nochi san se ueyak, desde teuan on iueyitsakuijlou hasta on kalixkajli, kipiyaya sempouajli iuan makuijli metro. 16 On cuartostlajpiyaloyan niman on tepantin yejuan onokej intsajlan on cuartos, kipiyayaj ventanas yejuan tsatsastikej katkaj kalijtikkopa. Niman ijtik on kalixkajli, iyeualkan no kipiyaya ventanas yejuan tsatsastikej. Ipan imintepan on cuartos okinmixneskayotijkej palmeras.
(On ueyikiauak yejuan onkaj iyeualkan on ueyitiopan)
17 Kemaj on tlakatl onechuikak ipan iueyikiauak on ueyitiopan. Ompa onkatkaj 30 cuartos yejuan okinchijchijkej itech on tepanchinantli ipan iueyikiauak on ueyitiopan. Nochi iyeualkan on ueyikiauak tepejpechoj katka. 18 On ojtli tepejpechyoj yejuan uajpeuaya desde on tepantin, iuan antoya on ueyikiauak. Niman no ichkich ueyak katka niman patlauak ken on kaltlajpiyaloyan. In yejua ojtli yejuan más tlatsintlan onkatka. 19 Kemaj on tlakatl okitemachiu kech ika uejka katka, desde iueyitsakuijlou on kaltlajpiyaloyan kampa onkaj on ueyikiauak, hasta iueyitsakuijlou on kaltlajpiyaloyan kampa onkaj on pitentsinkiauak. Niman okipix 50 metros.
(On kalakiloyan niman on kaltlajpiyaloyan yejuan nokauaj kampaka norte de on ueyikiauak)
20 Kemaj, on tlakatl okitemachiu kech ika ueyak niman kech ika patlauak on kalakiloyan yejuan onkaj kampaka norte de iueyikiauak on ueyitiopan. 21 On kaltlajpiyaloyan kipiyaya yeyi cuartojtlajpiyaloyan ipan cada lado. On cuartostlajpiyaloyanmej kipiyayaj tepantin intsajtsajlan. On kaltlajpiyaloyan no kipiyaya sen kalixkajli. Niman nochi ichkich tlatemachijtli katka kenon kaltlajpiyaloyan yejuan nokaua kampaka ikisayan tonaltsintli. In kijtosneki, no kipiyaya sempoajli uan makuijli metro ika ueyak niman majtlaktli uan ome metro uan tlajko ika patlauak. 22 On kalixkajli, on ventanas niman on palmeras no ichkich tlatemachijtin katkaj kenon yejuan onkatkaj itech on kaltlajpiyaloyan yejuan nokaua kampaka ikisayan tonaltsintli. Ompa no tlejkouayaj ipan on escaleras yejuan kipiyaya chikomekan kampa tlejtlejkotiuij, niman on kalixkajli onkatka kampa ontlamiya on ueyikiauak. 23 Ipan yejua in lado norte no onkatka sen kalakiloyan, kenon yejuan onkaj kampaka ikisayan tonaltsintli. Niman on kalakiloyan no ajsiya ipan on pitentsinkiauak de on ueyitiopan, imelajkan itsakuijlou on ueyitiopan. On tlakatl okitemachiu kech ika uejka notstikatkaj in ome kaltlajpiyaloyan, niman notstikatkaj 50 metros.
(On kalakiloyan niman on kaltlajpiyaloyan yejuan nokauaj kampaka sur de on ueyikiauak)
24 Kemaj on tlakatl onechuikak kampaka sur, kampa onkatka sen kalakiloyan de on ueyikiauak. Ompa okintemachiu on cuartostlajpiyaloyanmej, on tepantin yejuan onokej intsalan on cuartos niman on kalixkajli. Niman no ichkich tlatemachijtin katkaj kenon oksekimej. 25 On cuartostlajpiyaloyanmej de on kaltlajpiyaloyan niman on kalixkajli kampa onkatka on kalakiloyan de on ueyikiauak, no kipiyayaj inventanas inyeualkan, ken on oksekimej kalixkaltin. Nochi san se ueyi kipiyaya sempoajli uan makuijli metro ika ueyak, niman majtlaktli uan ome metro uan tlajko ika patlauak. 26 On kalixkajli no nokauaya ipan on ueyikiauak. Niman ompa ajsiyaj ikan sen escalera yejuan kipiyaya chikomekan kampa tlejtlejkotiuij. Ipan on tepantin yejuan onokej intsajlan on yeyi cuartojtlajpiyaloyan, no okinmixneskayotijkej palmeras. 27 On pitentsinkiauak no kipiyaya sen kalakiloyan niman kaltlajpiyaloyan kampaka sur. On tlakatl okitemachiu kech ika uejka notstikatkaj in ome kalakiloyan yejuan onkatkaj kampaka sur, niman notstikatkaj 50 metros.
(On kalakiloyan niman on kaltlajpiyaloyan yejuan nokauaj kampaka sur de on pitentsinkiauak)
28 Kemaj on tlakatl kej onechuikak itech on kalakiloyan yejuan nokaua kampaka sur de on pitentsinkiauak. Okitemachiu on kalakiloyan iuan on kaltlajpiyaloyan, niman no ichkich tlatemachijtin katkaj kenon oksekimej kalakiloyanmej. 29-30 On cuartos, on kalixkajli niman on tepantin yejuan onokej intsajlan on yeyi cuartos, nochi ichkich tlatemachijtin katkaj kenon oksekimej. On kalixkajli no kipiyaya ventanas iyeualkan, niman nochi san se ueyi kipiyaya sempoajli iuan makuijli metro ika ueyak niman majtlaktli uan ome metro uan tlajko ika patlauak. 31 On kalixkajli ajsiya itech iueyikiauak on ueyitiopan. Ipan ipilares okinmixneskayotijkej palmeras. Ipan in kalakiloyan, ajsiyaj ikan sen escalera yejuan kipiyaya chikueyikan kampa tlejtlejkotiuij.
(On kalakiloyan niman on kaltlajpiyaloyan yejuan nokauaj kampaka ikisayan tonaltsintli de on pitentsinkiauak)
32 Kemaj on tlakatl no onechuikak itech on tsakuijlotl yejuan nokaua kampaka ikisayan tonaltsintli de on pitentsinkiauak. Okintemachiu on kalakiloyan niman on kaltlajpiyaloyan, niman no ichkich tlatemachijtin katkaj kenon oksekimej. 33 On cuartos de on kaltlajpiyaloyan, on tepantin yejuan onokej intsajlan on yeyi cuartos niman on kalixkajli, no ichkich tlatemachijtin katkaj kenon oksekimej. On kalixkajli no kipiyaya ventanas iyeualkan, niman kipiyaya sempoajli uan makuijli metro ika ueyak niman majtlaktli uan ome metro uan tlajko ika patlauak. 34 On kalixkajli no ajsiya itech on ueyikiauak yejuan onkaj iyeualkan on ueyitiopan. Ipan ipilares okinmixneskayotijkej palmeras. Ipan in kalakiloyan, no ajsiyaj ikan sen escalera yejuan kipiyaya chikueyikan kampa tlejtlejkotiuij.
(On kalakiloyan niman on kaltlajpiyaloyan yejuan nokauaj kampaka norte de on pitentsinkiauak)
35 Sakin, on tlakatl kej onechuikak itech on kalakiloyan yejuan nokaua kampaka norte, ipan on pitentsinkiauak. Okitemachiu on kalakiloyan iuan on kaltlajpiyaloyan, niman no ichkich tlatemachijtli katkaj kenon oksekimej. 36 On cuartos kampa nemij on tiopantlajpixkej, on tepantin yejuan onokej intsajlan on yeyi cuartos niman on kalixkajli, no ichkich tlatemachijtin katkaj kenon oksekimej. On kalixkajli no kipiyaya ventanas iyeualkan, niman kipiyaya sempoajli uan makuijli metro ika ueyak niman majtlaktli uan ome metro uan tlajko ika patlauak. 37 Niman on kalixkajli no ajsiya itech on ueyikiauak yejuan onkaj iyeualkan on ueyitiopan. Ipan on pilares no okinmixneskayotijkej palmeras ipan cada lado. Ipan in kalakiloyan, no ajsiyaj ikan sen escalera yejuan kipiyaya chikueyikan kampa tlejtlejkotiuij.
(On cuartos yejuan onokej itech on kalakiloyan yejuan nokaua kampaka norte)
38 No onkatka sen kaltlajpiyaloyan yejuan nokauaya kampaka norte ipan on pitentsinkiauak. Ompa kampa on tiopixkej kalakiyaj ipan on kaltlajpiyaloyan, onkatka sen tsakuijlotl itech on cuarto yejuan onkatka inakastlan. Ompa kimpajpakayaj on yolkej yejuan kinmiktiayaj para uentli yejuan nochi tlatla. 39 Ipan on kalixkajli kampa kalakoua, onkatka naui mesa, ome mesa ipan cada lado. Niman ompa kinmiktiayaj on yolkej para uentli yejuan nochi tlatla ipan on tlaixpan, uentin ipampa tlajtlakojli niman uentin para ijkuak se itlaj xkuajli kitechiuilia. 40 Ikiauakkopa on kalixkajli kampaka norte, itech on escalera kampa tlejtlejkotiuij, no onkatka naui mesa, ome mesa ipan cada lado. 41 Kijtosneki, ipan on kalixkajli onkatka naui mesa, niman ikiauak on kalixkajli no onkatka naui mesa. Tla ijkon, san se ueyi uajnochiuaya chikueyi mesa. Impan on mesas kinmiktiayaj yolkej. 42-43 No ijki, onkatka okseki naui mesas de canterajtetl, kampa kuektlaliayaj on nakatl para on uentli yejuan nochi tlatla. On mesas kipiyayaj 75 centímetros de on naukan inlados niman 50 centímetros ika uejkapan. Niman iyeualkan ikalijtik on cuarto ipan itepan, kipiyaya ken repisa yejuan kipiyaya chikuasen centímetro ika patlauak. Ompa kimpipilouayaj nochi on tlajtlamach yejuan kintekitiltiaj ijkuak kinmiktiaj on yolkej para on uentli yejuan nochi tlatla niman de okseki uentli.
(Imincuartos on tiopixkej yejuan tekitij ipan on ueyitiopan niman ipan on tlaixpan)
44 Ipan on kiauakpitentsin, kampa onokej on kaltlajpiyaloyanmej yejuan nokauaj tlaijtikkopa, onkatka ome cuarto. Se onkatka itechika on kalakiloyan yejuan onkaj kampaka norte, niman ontlachixtikatka kampaka sur, niman on okse onkatka itech on kalakiloyan yejuan onkaj kampa sur, niman ontlachixtikatka kampaka norte.
45 On tlakatl onechijlij: “On cuarto yejuan ontlachixtikaj kampaka sur, iminyaxka on tiopixkej yejuan tekitij ipan on ueyitiopan, 46 niman on cuarto yejuan ontlachixtikaj kampaka norte, iminyaxka on tiopixkej yejuan tekitij ipan on tlaixpan. Yejuamej iminuejkakoneuan Sadoc, niman san yejuamej yejuan levitas yejuan ueliskej nonisiuiskej itech toTEKO para kitekipanoskej.”
(On kiauakpitentsin niman on ueyitiopan)
47 Kemaj on tlakatl okitemachiu ikiauakpitentsin on ueyitiopan: kipiyaya 50 metros cada lado. In kijtosneki cuadrado katka. On tlaixpan onkatka ixpan on ueyitiopan. 48 Kemaj on tlakatl onechuikak ipan ikalixkal on ueyitiopan, niman okintemachiu ipilares on kalixkajli: cada se kipiyaya ome metro uan tlajko ika tomauak. On kalakiloyan kipiyaya chikome metro ika patlauak, niman on tepantin kampa salijtikatka itsakuijlou on kalixkajli, kipiyaya se metro uan tlajko ika tilauak cada se. 49 On ikalixkal on ueyitiopan, kipiyaya majtlaktli metro ika patlauak niman chikuasen metro ika ueyak. Ipan in kalixkajli ajsiyaj ikan sen escalera yejuan kipiyaya majtlaktlikan kampa tlejtlejkotiuij. Niman ipan cada lado de on kalakiloyan onkatka sen pilar.