(Isoldados on rey Gog mikiskej)
39
'Niman tejua tlaltikpaktlakatl, xtiotlajto ikan notokatsin de on tlinon xkuajli ipan nochiuas on rey Gog. Xkijli ika nejua akin niiTEKO Dios Israel, ijkin nikijlia: ‘Tejua Gog, akin tiueyixtikaj, yejuan titlamandaroua impan on países Mesec niman Tubal, nejua yoninokuep motlauelikniu. 2 Niman nejua nimitsajkuepas tejua iuan nochimej mosoldados; nemechkixtis desde neka uejka kampaka norte, niman nemechajuikas para nentlauijsokiskej ipan itepeuan Israel. 3 Kemaj nejua nimitskuilis on moarcojtlaminal yejuan tikimpiya ipan momaopoch niman nikchiuas para xkinxini on flechas yejuan tikpiya ipan moyekma. 4 Niman tejua iminuan nochimej mosoldados niman insoldados on oksekimej naciones yejuan mouan uajlaskej, nenmikiskej ipan itepeuan on tlajli Israel. Ompa nikintemakas nemomikatlalnakayouan intech on totomej yejuan nakakuanij niman intech on tepeyolkej yejuan tekuanimej para ma mechkuakan. 5 Nenxintoskej kampa tepek. Nejua akin niiTEKO Dios Israel, ijki yonikijtoj nemopan nochiuas, niman nicumpliros tlinon yonikijtoj. 6 Nejua nikuajtitlanis tlitl ipan on ueyikalpan Magog niman impan on yejuan inyolika chantij impan on países yejuan onokej itenko mar. Niman ijkuakon, nochimej kimatiskej ika nejua niDios de Israel. 7 Nejua niknoteititis intsajlan on notlapepeniluan israelitas ika sanoyej niyektli, niman xokaman yakaj nikauilis noka ma uetska. Niman on oksekimej naciones kimatiskej ika nejua akin niDios de Israel, sanoyej niyekchipauak. 8 Saniman yejkos on tonajli ijkuak nochiuas on tlen yonikijtoj. ¡Nejua akin niiTEKO Dios Israel, ijki yonikijtoj nochiuas ken yonimitsijli!'9 'Nochimej on chanejkej impan on uejueyikalpanmej de ne Israel, yaskej konsentlaliskej inarmasuan on intlauelikniuan para kintlatiskej. Konsentlaliskej on sesentlamantikej iminescudos, iminarcostlaminaluan, iminflechas, iminvaras yejuan kuayakapitstikej niman iminlanzas. Yejuamej kipiyaskej miyek kojtli yejuan kinmajxilis para ika tlatlatiskej chikome xipan. 10 Ijkuakon, yejuamej xok nonekis yaskej ipan tepetl para konkuiskej kojtlatijli, nion xok kintsontekiskej kojtin ipan on kojyoj, pampa nochi on armastin yejuan kinsentlaliskej yejua ika tlatlatiskej. Ijki tej, kinkuiliskej itlauelikniuan on tlinon yejuamej achtoj yokinkuilijkaj. ¡Ijki nochiuas pampa nejua akin niiTEKO Dios Israel, ijki yonikijtoj nochiuas!
(On kampa kitlaltôkaskej on rey Gog)
11 ‘Ipan on tonajli, ne Israel niktlalis sen camposanto kampa kitlaltôkaskej on rey Gog iuan nochimej isoldados. On camposanto nokauas kampaka ikisayan tonaltsintli de on Mar Muerto kampa itoka Iminixtlauayo on Nejnenkej. Niman ompaka xok yakaj uelis panos, pampa on ojtli onteliuis ipan on camposanto. Niman on ixtlauatl kipatiliskej itoka, yej kitokayotiskej Iminixtlauayoj on Sanoyej Miyekej Isoldados on Rey Gog. 12 On israelitas uejkauiskej chikome metstli para tlamis kintlaltôkaskej on mikatsitsimej niman kauaskej chipauak on país. 13 Niman nochimej on israelitas tlapaleuiskej ijkuak kintlaltôkaskej on mikatsitsimej, niman ipampa on tlen kichiuaskej, kintlakaitaskej ijkuak nikpiyas tetlanilistli. ¡Nejua akin niiTEKO Dios Israel, ijki nikijtoua nochiuas! 14 Kemaj ijkuak yopanok on chikome metstli, kintlaliskej keskimej tlakamej yejuan yaskej ipan nochi on tlajli Israel para kontejtemoskej tla nemij más mikatsitsimej para kintlaltôkaskej. Yejua ika tej, ijki kauaskej chipauak on país Israel. 15 Ijkuak semej de on tlakamej yejuan tlatejtemouaj kinextis sen iomiyo yakaj tlakatl, inakastlan on omitl kitlalis sen neskayotl. Niman on yejuan ika nokauaj tetlaltôkaj, kiktiskej on omitl niman kitlaltôkaskej ipan on ixtlauatl yejuan itoka Iminixtlauayo on Sanoyej Miyekej Isoldados on Rey Gog. 16 (No ijki, ompa nisiu onyas sen ueyikalpan itoka Hamona yejuan kitosneki Miyekej Soldados.) Ijki tej, kauaskej chipauak on país.”
17 ToTEKO Dios oksejpa onechijlij: “Tejua tlaltikpaktlakatl, xkiminnotsa nochimej on totomej yejuan nakakuanij niman nochimej on tepeyolkej yejuan tekuanimej yejuan nemij nochiuiyan. Xkinmijli ma nosentlalikan niman ma uajlakan ipan itepeuan on tlajli Israel kampa nejua nitlamiktis para yejuamej ma tlakuakan. Ompa nakakuaskej niman koniskej yestli. 18 Kikuaskej iminnakayo on soldados yejuan yolchikajkej, niman koniskej inyesyo on iminuejueyitekiuajkauan in tlaltikpaktli, ken kinkuaskiaj on borregos, on borreguitos, on chivos noso on tojtomajkej becerros yejuan nemij ne Basán. 19 On yejuan nikinmiktis, para nikinkualtis on yolkej, kinkualiskej inchajka hasta kaman yolajsiskej niman kinoniliskej inyesyo hasta kaman kintlauantis. 20 Nikinmakas on tlakuajli de innakayo on caballos niman innakayo on soldados yejuan caballojyetinemij. Niman no nikinmakas innakayo nochimej on sesentlamantikej yolchikajkej soldados; nikinmakas para ma tlakuakan hasta kaman ma yolajsikan. ¡Ijki nochiuas, pampa nejua akin niiTEKO Dios Israel, ijki yonikijtoj nochiuas!
(On israelitas oksejpa chantiskej ipan on tlajli Israel)
21 'Ijki nikintitis noueyilis nochimej on oksekimej naciones, niman kitaskej kenijki yejuamej yonikintlajtlakolmakak niman yonikincastigaroj. 22 Niman desde ijkuakon on israelitas kimatiskej ika nejua niiminTEKO Dios. 23 Niman on chanejkej ipan on oksekimej naciones, no kimatiskej ika on israelitas okinuikakej ken esclavos ipan oksekimej naciones ipampa yejuamej intlajtlakoluan niman pampa onechtlalkauijkej. Niman no kimatiskej ika yejua ika onikintlalkauij niman onikinkauilij on intlauelikniuan ma kintlanikan niman miyekej ma kinmiktikan ipan nouijsokilistli. 24 Kimatiskej ika nejua onikincastigaroj ken okinmelau ipampa intlajtlakoluan niman pampa xipan onechitakej; yejua ika nejua onikintlalkauij.
25 'Yejua ika tej, nejua akin niiTEKO Dios Israel, ijkin nikijtoua: Aman nejua nikinmiknelis nochimej on notlapejpeniluan israelitas, iuejkakoneuan Jacob. Nikchiuas para oksejpa ma kipiyakan pakilistli, niman ijki nikselis tlakaitalistli niman nechixmatiskej ika niyektli. 26-27 Nejua oksejpa nikinsentlalis on yejuan chajchayajtokej impan oksekimej naciones kampa ximinchan, kampa nemij intlauelikniuan. Niman ijkuakon, chantiskej inyolika ipan intlal kampa xok yakaj kinmomojtis. Niman ijki, on miyekej naciones nikintitis noyekchipaualis. Pero on israelitas pinauaskej pampa onechtlalkauijkej. 28 Kemaj on notlapejpeniluan israelitas kimatiskej ika nejua niiminTEKO Dios. Niman ijki kimatiskej pampa maski nejua onikintekauilij para ma kinuikakan ken esclavos ipan oksekimej naciones, oksejpa onikinsentlalij ipan intlal. Niman xakaj israelita nokauas ipan okse país kampa xichan. 29 Nejua xokaman oksejpa nikintlalkauis on notlapejpaniluan israelitas, pampa nejua imimpan yoniktlalij noEspíritu yejuan kipiya poder. ¡Nejua akin niiTEKO Dios Israel, ijki yonikijtoj nochiuas!”