On tiotlajtojli yejuan kijtoua tlinon ipan nochiuas on rey Gog (38.1 - 39.19)
(Dios kitekitiltia on rey Gog para tecastigaroua)
38
ToTEKO onechnots, niman onechijlij: 2 "Tejua tlaltikpaktlakatl, xontlacha kampaka norte, kampaka nokaua on nación Magog, niman ompaka xkontiotlajtojkanotsa on rey Gog yejuan no tlamandaroua ipan on país Mesec niman Tubal. Xkonijli on rey on tlinon xkuajli ipan nochiuas. 3 Xkijli ika nejua akin niiTEKO Dios Israel, ijkin nikijlia: ‘Tejua Gog, akin más tiueyitlayekanki ne Mesec niman ne Tubal, xmati ika nejua yoninokuep motlauelikniu. 4 Nejua nimitsajkuepas niman nimitstlalilis teposchijkoltin ipan mokamak para nimitskixtis niman nimitsajuikas hasta ipan in tlajli Israel. Nimitsajuikas tejua iminuan nochimej on miyekej mosoldados yejuan caballojyetinemij niman kualtetsin tlakemejkej; yejuan kistinemij ikan iminespadas niman ikan sesentlamantikej iminescudos. 5 No ijki, nemouan uajlaskej on soldados de Persia, de Etiopía niman de Libia. Nochimej yejuamej nemouan yaskej ikan inescudos niman ikan incascos. 6 Niman no, nemouan uajlaskej nochimej on soldados de on país Gomer niman de on país Togarma, yejuan ualeuaj uejka kampaka norte, niman miyekej soldados más de oksekimej naciones. 7 Yejua ika tej, tejua iuan nochimej mosoldados yejuan mouan nemij, xkinyekana para xmotlakuektlalilijtiakan ikan nenmoarmasuan. 8 Ijkon xchiua pampa ijkuak yopanok miyek xipan, nejua nimitsnauatis para xkuijsokiti on país Israel yejuan ichanejkauan yonenkaj miyek xipan ipan nouijsokilistli. Pero ijkuakon, yejuamej ye kuajli nemiskej, niman ijkuakon yokuejkuektlalijkej inuejueyikalpanuan niman xok nemiskej ipan nouijsokilistli. Nimitstitlanis ipan on país yejuan ichanejkauan miyek xipan chajchayajtinemiyaj ipan miyekej naciones niman xok ueliya nokuepayaj ipan impaís. Pero yejuamej oksejpa onosentlalijkej ipan itepeuan on tlajli Israel kampa ye inyolika nemij. 9 Tejua tajsis ken itlaj on ajakakiautli iminuan nochimej mosoldados niman on soldados de oksekimej naciones yejuan iminuan timouika. Tajsis imintech ken itlaj on ueyimoxtli tlilijki para tiktlapachos imimpaís.10 ‘ 'Nejua akin niiTEKO Dios Israel, ijkin nikijtoua: 'Ipan on tonaltin tejua Gog tiknejnemilis ken tikchiuas on tlinon sanoyej xkuajli. 11 Tejua timoijlis: Nosoldados kuijsokiskej on país yejuan xnemi listo para nomauis, yejuan ichanejkuan inyolika nemij pampa xkonmatstokej kinuijsokiskej. Kinuijsokiskej on uejueyikalpanmej yejuan xyeualtsakutokej ikan tepanchinantli niman xkimpiyaj uejueyitsakuijlomej nion tepostrancas para nomanauiskej. 12 On nosoldados kitlachtekiliskej on país niman kikuiliskej nochi on riquezas; kinuijsokiskej on uejueyikalpanmej yejuan yokinkuejkuektlalijkej on yejuan oualejkej ipan miyekej naciones. On chanejkej kimpiyaj miyekej inyolkauan niman okseki tlajtlamach yejuan iminyaxka, niman kinemiliaj chantij ipan on más ueyixtikaj nacion de in tlaltikpaktli. 13 On chanejkej ipan on ueyikalpan Sabá niman Dedán, niman on tlanemakakej chanejkej Tarsis niman ipan oksekimej uejueyikalpanmej, ijkin mitstlajtoltiskej: ¿Otiuajlaj para otitechtlachtekiliko? ¿Otikinsentlalij mosoldados para onentechkuilikoj nochi on oro niman on plata yejuan toyaxka, niman nentechkuiliskej on toyolkauan niman okseki tlajtlamach tlen toyaxka, niman tikitkis on miyek riquezas?’
14 'Yejua ika tej, tejua tlaltikpaktlakatl, xtiotlajtojkanotsa Gog ikan notokatsin, niman xkijli ika nejua akin niiTEKO Dios Israel ijkin nikijtoua: ‘Ijkuak on notlapejpeniluan israelitas chantiskej inyolika ipan imintlal, tejua toneuas tikominuijsokis. 15 Tejua tiualeuas ipan motlal, desde uejka kampaka norte. Mouan uajlaskej on miyekej niman kojtikej soldados niman sanoyej miyekej soldados yejuan caballojyetinemij, 16 niman tikinuijsokis on notlapejpeniluan israelitas. Tejua Gog, inuan on mosoldados nenyaskej ipan on país Israel, niman nemontemiskej ken tlapachiuiskia ikan sen ueyimoxtli tlilijki. Ipan on sa ika nochi tonaltin, nejua nikchiuas para tejua inuan mosoldados nenyaskej niman nenkinuijsokiskej on notlapejpeniluan israelitas. Ipan on tonajli nochimej on naciones kitaskej ken nimitscastigaros tejua niman on mosoldados. Ijkuak ijkon nochiuas, nochimej on naciones motechkopa kimatiskej ika nejua niDios pampa nikintitis noyekchipaualis.
17 ‘Nejua akin niiTEKO Dios Israel, ijkin nikijtoua: Tejua Gog, tejua nimitsteneuaya yeuejkaui ijkuak nitlajtouaya intechkopa on tiotlajtojkej de Israel, yejuan notekipanojkauan. Yejuamej okijtojkej ipan on tonaltin, ika nejua nikchiuas para mosoldados uajlaskej para kuijsokiskej on país Israel.’
(On castigo yejuan kiselis on rey Gog)
18 'Nejua akin niiTEKO Dios Israel, ijkin nikijtoua: Ijkuak tejua Gog iuan mosoldados nenkuijsokiskej on país de Israel, on notlauel sanoyej temojtij yes mouan. 19 Niman pampa sanoyej nikualanis, nejua ninotlajtolmaka ika ipan on tonaltin sanoyej chikauak tlalolinis ne Israel. 20 Niman nochimej on michimej yejuan nemij ijtik mar, nochimej on totomej, on tepeyolkej tekuanimej, on yolkej yejuan noteuilanaj niman nochimej on tlaltikpaktlakamej, sanoyej mojkakuekuetlakaskej nixpan. On tepemej nalauaskej, on teostomej xotoniskej, niman nochimej on tepanchinantin no xoxotoniskej. 21-22 Tejua Gog, nejua nikchiuas para mopan niman impan mosoldados ma uajla nochi on tlen xkuajli para sanoyej xmomojtikan. Nemechcastigaros ikan kualolistin, niman sanoyej temojtij ken nenmikiskej. Nikchiuas para mopan tejua niman impan mosoldados, niman impan on tlakamej de oksekimej naciones yejuan nemouan uajlaskej, imimpan chikauak ma kiaui, imimpan ma tejsiui niman imimpan ma kiaui ikan azufre yejuan tlikuis. Niman no nichiuas para on mosoldados sano yejuamej ma nomiktikan. ¡Nejua akin niiTEKO Dios Israel, ijki nikijtoua nochiuas! 23 Niman ijki, miyekej naciones nechixmatiskej. Nikintitis noueyipoder niman noyekchipaualis, niman yejuamej kimatiskej ika nejua niDios.