On mikatlalnakayoomimej yejuan teuatsaltikej
37
Se tonajli toTEKO onechmakak okse tlatlachalistli yejuan ken notemikpan. Ipan on tlatlachalistli onikmat ipoder toTEKO, niman ikan iEspíritu onechuikak ipan sen ixtlauatl yejuan tentikatka ikan miyek mikatlalnakayoomimej teuatsaltikej. 2 Kemaj iEspíritu toTEKO onechyekan para oniknejnen nochiuiyan on ixtlauatl. Niman ipan on ixtlauatl onikitak ika nochiuiyan sanoyej miyek omitl chayajtoya yejuan sanoyej teuatsaltikej katkaj. 3 Kemaj toTEKO onechtlajtoltij: “Tejua tlaltikpaktlakatl, ¿tikneltoka ika in omimej oksejpa notlalnakayotiskej niman yoliskej?” Nejua oniknankilij: “NoTEKO, on san tejua tikmati.”4 Kemaj toTEKO onechijlij: “Tejua tlaltikpaktlakatl, xkintiotlajtojkanotsa ikan notokatsin yejuamej in omimej, niman xkinmijli: ‘Nemejuamej teuatsalomimej, xkakikan tlinon mechijlis toTEKO.' 5 Xkinmijli tej, ika nejua akin niiTEKO Dios Israel, ijkin nikinmijlia: ‘Nejua nemechijyopitsas para ma kalaki nemopan on ijyotl yejuan teyolitia, para ijki oksejpa nenkipiyaskej nemilistli. 6 New Nejua nikimpepechos nenmotlasasaloltlaluayouan ipan nenmoomiyouan, niman nikchiuas para nenmoomiyouan ma nonakayotikan. Niman no, oksejpa nemechtlalilis nemokuetlaxyo, niman nemechmakas ijyotl yejuan teyolitia para oksejpa nenkipiyaskej nemilistli. Niman ijkuakon, nemejuamej nenkimatiskej ika nejua ninemoTEKO.’ ” 7 Niman nejua Ezequiel, onikinnots on omimej ken toTEKO onechnauatij. Niman chika nikinnotsaya, sanoyej chikauak otlakakalakak pampa on omimej opeu nonajnamikij iminuan oksekimej omimej. 8 Niman kemaj onikitak kenijki impan opeu nonextiaj on tlasasaloltlaluamej niman opeu nonakayotiaj. Niman no, opeu kinnotlaliliaj inkuetlaxyo. Pero yejuamej sanken xe kipiyayaj nemilistli.
9 Kemaj toTEKO onechijlij: “Tejua tlaltikpaktlakatl, xnotsa ikan notokatsin on ijyotl yejuan teyolitia, niman xkijli: ‘Ijkin kijtoua toTEKO Dios: Tejua ijyotl yejuan titeyolitia, xualeua de nochiuiyan imanian in tlaltikpaktli, niman xkalaki ipan in mikatlalnakayomej para oksejpa ma yolikan.’ ”
10 Nejua tej, oniknots on ijyotl yejuan teyolitia ken toTEKO onechnauatij, niman on ijyotl ouajlaj niman okalak impan on mikatlalnakayomej, niman yejuamej oksejpa oyolijkej niman onotelketskej. Yejuamej sanoyej miyekej katkaj, nesiyaj kenon sanoyej tojlamej soldados.
11 Kemaj toTEKO onechijlij: “Tejua tlaltikpaktlakatl, in omimej kinmixnextiaj nochimej on israelitas. Yejuamej kijtouaj: ‘Toomiyouan yoijsolijkej niman youatsalijkej; tejuamej xok tikpiyaj tlamachalistli, niman tonación semi kuajli yoxoxoton.’ 12 Yejua ika tej, tejua tlaltikpaktlakatl, xkiminnotsa on israelitas ikan notokatsin, niman xkinmijli ika nejua nemoTEKO Dios ijkin nikinmijlia: 'Nemejuamej notlapejpeniluan yejuan nenkimatij ken nenmikatsitsimej yeskiaj, nejua nikintlapos on nenmotlalkon ne impan on países kampa ken nentoktiaskiaj, niman nikchiuas para on nenmotlalnakayo oksejpa ma kipiyakan nemilistli. Nejua nemechkixtis impan on países niman nikchiuas para oksejpa xmokuepakan ipan in tlajli Israel. 13 Niman ijkuak nochi in nochiuas, nemejuamej notlapejpeniluan nenkimatiskej ika nejua ninenmoTEKO. 14 Nejua niktlalis nemopan noEspíritu, niman nemejuamej oksejpa nenkipiyaskej nemilistli; niman nejua oksejpa nemechkauilis xmochantlalikan ipan nenmotlal. Niman ijkuakon, nemejuamej nenkimatiskej ika nejua akin ninemoTEKO, nikchiua tlinon nikijtoua. ¡Nejua nemoTEKO, ijki yonikijtoj nikchiuas!’ ”
On tlajli Judá niman Israel oksejpa nosentlaliskej
15 ToTEKO oksejpa onechnots, niman onechijlij: 16 “Tejua tlaltikpaktlakatl, aman xkui sen kojtli niman ijkin xkijkuilo ipan: ‘In kojtli kixnextia on ueyitlalpan Judá niman nochimej on tribus de ne Judá.’ Kemaj xkui okse kojtli niman no ijkin xkijkuilo ipan: ‘In kojtli kixnextia on ueyitlalpan Israel niman nochimej on tribus de ne Israel.’ 17 Niman kemaj, on kojtin xkinkitski san sekan ipan moma, para ijki ma uajnochiua san se. 18 Ijkuak on mochanejkauan mitsijliskej: ‘Xtechijli tlinon kijtosneki in’, 19 tejua xkinmijli ika nejua nemoTEKO Dios ijkin nikijtoua: ‘Nejua nikchiuas para itribus Judá niman itribus Israel ma nochiuakan san se.’ 20 Pero tejua Ezequiel, xkinkitski san sekan on ome kojtin yejuan impan otitlajkuiloj para nochimej ma kitakan. 21 Kemaj xkinmijli ika nejua nemoTEKO Dios ijkin nikijtoua: ‘Nejua nikinkixtis on israelitas impan on naciones kampa okinuikakej ken esclavos; nikinsentlalis de nochiuiyan niman nikchiuas para oksejpa ma nokuepakan ipan imintlal. 22 Nejua nikchiuas para yejuamej ma nochiuakan san se nación ipan on imintlal, ipan on tepemej de Israel. Yejuamej kipiyaskej san se rey, niman xokaman oksejpa xelijtiaskej ken ome nación, nion xok xelijtiaskej ken ome reino. 23 No ijki, yejuamej xokaman oksejpa nijtlakoskej pampa xokaman kinmauistiliskej on tetlajyelojkej ídolos, nion xokaman kichiuaskej on sesentlamantikej tlajtlakoltin. Nejua nikinmakixtis de nochi on tlajtlakoltin yejuan ika onechtlalkauijkej, niman nikinchipauas. Yejuamej notlapejpeniluan yeskej, niman nejua niiminDios yes. 24 On notekipanojkau yejuan yes ken David, yejua iminrey yes, niman san yejua intlajpixkau yes nochimej yejuamej. Niman yejuamej kintlakamatiskej noleyes niman nochi notlanauatiluan. 25 Yejuamej chantiskej ipan on país de Israel yejuan onikmakak notekipanojkau Jacob, kampa no ochantikej iachtojtajuan. Ompa chantiskej nochipa iminuan inkoneuan niman nochimej inuejkakoneuan; niman on notekipanojkau yejuan yes ken rey David, nochipa yejua yes iminrey. 26 Iminuan yejuamej nikchiuas sen pacto de yolseuilistli, para ijki nochipa inyolika nemiskej. On pacto yes para nochipa. Nikinmakas on tlajli, niman nikchiuas para yejuamej sanoyej ma miyekiyakan. Niman intsajlan yejuamej niktlalis noyektiopan para nochipa. 27 Nejua nichantis imintsajlan, niman nejua niiminDios yes niman yejuamej notlapejpeniluan yeskej. 28 Ijkuak on noyektiopan ye onyas intsajlan yejuamej para nochipa, on oksekimej naciones kimatiskej ika nejua yonikintlapejpenij on israelitas niman yonikinchipau para noyaxkauan yeskej.’ ”