On tiotlajtojli yejuan kijtoua ika sankin kuajli nemis on país Israel
36
'Tejua tlaltikpaktlakatl, xontlacha impan on tepemej de on tlajli Israel, niman xkintiotlajtojkanotsa ikan notokatsin on ichanejkauan. Xkinmijli ma kakikan notlajtoltsin. 2 Nejua nemoTEKO nikijtoua, intlauelikniuan on israelitas, sanoyej inka uetskaj on israelitas, niman ijkin kinmijtouiliaj: 'On tepemej yejuan desde yeuejkaui inyaxkauan on israelitas, aman tejuamej toyaxkauan.' 3 Yejua ika tej, tejua tlaltikpaktlakatl, xtiotlajto ikan notokatsin niman xkinmijli on chanejkej ipan on tepemej ika nejua akin niiminTEKO Dios ijkin nikinmijlia: 'Nochiuiyan oualejkej yejuan omechuijsokej niman omechtlaxoxotonilijkej; nochimej on yejuan xchanejkej yomechkuepkej iminesclavos, niman mechuijuikaltiaj niman mechtontojmatij. 4 Yejua ika tej, nemejuamej chanejkej ipan on tepemej de Israel, xkakikan on tlinon nejua nemoTEKO Dios nikinmijlia on chanejkej ipan on tepemej, impan on tepetsitsimej, intech on ríos niman impan on ixtlauamej. Niman no, xkakikan tlinon nikinmijlia on tlaltin niman on uejueyikalpanmej de Israel kampa xok chantiua, kampa otlaxoxotonijkej niman otlachtekej on naciones yejuan onokej nisiu nemopaís, niman sanoyej inka ouetskakej. 5 Nejua nemoTEKO Dios, no nikijtoua: Nejua sanoyej nikualantikaj iminuan on naciones. Niman más nikualantikaj iminuan nochimej on edomitas, pampa yejuamej hasta okuejuelitakej ijkuak okinoyaxkatijkej on nopaís niman pampa sanoyej inka onajauiltijkej on israelitas ijkuak okinmichtekilijkej on tlakyotl de on intlatôkuan.'6 ''Tejua tlaltikpaktlakatl, xtiotlajto ikan notokatsin niman xteneua on tlajli Israel, niman xkinmijli on israelitas ika nejua nemoTEKO Dios ijkin nikinmijlia on chanejkej impan on tepemej, impan on tepetsitsimej, intech on ríos niman impan on ixtlauamej: 'Nejua yonitlajtoj ikan notlauel pampa nemejuamej sanoyej tlamach xkuajli yomechteneuilijkej on naciones yejuan onokej nisiu de nemopaís. 7 Yejua ika tej, nejua nemoTEKO Dios ninotlajtolmaka ika on naciones sanoyej nopinajtiskej. 8 Pero nemejuamej chanejkej impan on tepemej de Israel, uej nenkipiyaskej miyek kojtin yejuan sanoyej noskaltiskej niman sanoyej tlakiskej; niman on intlakijlo kikuaskej on notlapejpeniluan israelitas yejuan saniman uajnokuepaskej de Babilonia niman ajsiskej ipan intlal. 9 Nejua nemechcuidaros nemejuamej chanejkej ipan on tepemej de Israel, niman nenmejuamej oksejpa nentlaxoponiskej niman nentlatôkaskej ipan nenmotlaluan. 10 Nejua nikchiuas para nemejuamej israelitas chanejkej impan on tepemej, xmiyekiyakan. On uejueyikalpanmej oksejpa nenkintemiltiskej, niman nochi on tlen omechxoxotinilijkej oksejpa nenkichijchiuaskek. 11 Nejua nichiuas para nemejuamej israelitas sanoyej xtojlantikan niman on nenmoyolkauan no sanoyej ma miyekiyakan. Nemejuamej sanoyej nentojlantiskej ken yeuejkaui katka, niman más nenkipiyaskej riquezas xken achtoj katka. Niman ijkuakon, nenkimatiskej ika nejua ninemoTEKO. 12 Nejua nikchiuas para nemejuamej notlatlapejpeniluan israelitas oksejpa xmojuitijtinemikan impan on tepemej de Israel. Nemejuamej nenkinmoyaxkatiskej on tepemej, niman yejuamej nenmoherencia yes. Niman on nenmokoneuan xokaman mikiskej ikan apistli pampa tla xtlatlaki impan on tepemej.
13 'Nejua nemoTEKO Dios, no nikijtoua: 'Nemejuamej israelitas xkuajli mechteneuaj impan on naciones pampa semi xtlatlaki impan nenmotepeuan niman pampa nenmikij ikan apistli. 14 Yejua ika tej, nejua nikijtoua ika nenmejuamej israelitas xok nenmikiskej ikan apistli. ¡Ijki nochiuas pampa nejua akin niiTEKO Dios Israel ijki yonikijtoj nochiuas! 15 Nejua nikchiuas para makasa tlamach xkuajli ma mechijtouilikan on oksekimej naciones, pampa nemejuamej xok nenmikiskej ikan apistli. pampa on nemochanejkauan xok mikiskej ikan mayantli. ¡Ijki nochiuas pampa nejua akin ninemoTEKO Dios, ijki yonikijtoj nochiuas!' "
Dios kimanuiya iyektlakaitalis
16 ToTEKO oksejpa onechnots, niman onechijlij: 17 “Tejua tlaltikpaktlakatl, nimitsijlia ika ijkuak on israelitas chantiyaj ipan intlal, okijtlakojkej on intlal ikan on tlinon sanoyej xkuajli okichijkej. Nejua nikita ika yejuamej sanoyej okijtlakojkej intlal kenon totontli yejuan sen siuatl kijtlakoua ijkuak yestemoua. 18 Yejua ika, nejua imimpan oninotlauelkixtij pampa yejuamej sanoyej otemiktijkej ipan on país, niman no, pampa okijtlakojkej on país ijkuak okinmauistilijkej ídolos. 19 Niman pampa sanoyej xkuajli tlinon okichijkej, onikinchajchayau ipan oksekimej naciones para onikincastigaroj. 20 Pero nochiuiyan ipan on naciones kampa ajsiyaj, yejuamej okichijkej para on tlakamej xonechpiyalijkej yektlakaitalistli, pampa on tlakamej kijtouayaj: ‘In yejuamej itlapejpeniluan Dios, pero xouel okinmanauij ipan on país yejuan yokinmakaka.’ 21 Yejua ika sanoyej onechajman, pampa nikitaya ika impampa on israelitas xonechpiyalijkej yektlakaitalistli impan on naciones kampa yejuamej ajsiyaj.
22 'Yejua ika tej, tejua tlaltikpaktlakatl xkinmijli on israelitas ika nejua nemoTEKO Dios ijkin nikinmijlia: 'Nejua oksejpa nemechajuikas para oksejpa nenchantiskej ipan nemotlal. Pero on tlinon nejua nikchiuas, xnikchiuas pampa mechmelaua nemejuamej israelitas, yej nikchiuas ipampa noyektokatsin yejuan nemejuamej xonenkitlakaitakej impan on naciones kampa omechuikakaj ken esclavos. 23 Ipampa noueyitlakaitalis, nejua nikteititis ika niyektli; nikteititis impan on naciones kampa nemejuamej xonennechtlakaitakej. Niman ijkuakon, on naciones nemotechkopa kimatiskej ika nejua niDios. ¡Ijki nochiuas pampa nejua akin ninemoTEKO Dios ijki yonikijtoj nochiuas! 24 Nejua nemechkixtis impan nochimej on naciones; nemechsentlalis niman nikchiuas para oksejpa xmokuepakan ipan nenmotlal. 25 Nejua nemechchipauas ken nemechpajpakaskia ikan atl yejuan chipauak, niman ijki nenchipauiskej de nochi on tlen xkuajli. Niman on nemoídolos xok nenkinmauistiliskej. 26 Niman nejua nemechmakas sen yenkuik nemoyojlo niman sen yenkuik tlamachilistli para nenkinekiskej san nenkichiuaskej tlen kuajli niman tlen melajki. Nemechkixtilis on nemoyoltechikaualis yejuan sanoyej chikauak kenon tetl, niman nenmechtlalilis sen nenmoyojlo yejuan yemanki para ijki nennechtlakamatiskej. 27 Nejua niktlalis noEspíritu nemopan, niman nikchiuas para xkintlakamatikan noleyes niman notlanauatiluan. 28 Nemejuamej nenchantiskej ipan on país yejuan yeuejkaui onikinmakak on nemoachtojtajuan, niman nemejuamej nennotlapejpeniluan yeskej niman nejua ninemoDios yes. 29 Nejua nemechmanauis de nochi on tlinon uelis mechijtlakos. Nikchiuas para sanoyej ma tlaki on nemotrigo, niman nejua xokaman oksejpa nemechtitlanilis on mayantli. 30 No nikchiuas para ipan on nemotlatôkuan más ma tlatlaki niman on kojtlakijlomej más ma kipiyakan intlakyo, para ijki nemejuamej xok oksejpa nenmopinajtiskej intech on oksekimej naciones ipampa on mayantli. 31 Niman ijkuak nemejuamej nenkelnamikiskej ika xkuajli ken onenmouikakej niman xkuajli tlen onenkichijkej, nempinauaskej sano impampa nemotlajtlakoluan niman pampa xkuajli tlen onenkichijkej. 32 Nejua nemoTEKO Dios, ijkin nikijtoua: Kuajli xmatikan nemejuamej israelitas, ika nochi in tlen nikchiua, xpampa tla nemejuamej kuajli onenmouikakej. ¡Nemejuamej yej sanoyej xpinauakan niman xmajmanakan pampa sanoyej xkuajli ken onenmouikakej!
33 'Nejua nemoTEKO Dios, no nikijtoua: Ijkuak nejua yonemechchipau de nochi on nemotlajtlakoluan, oksejpa nemechajuikas ipan nemotlal para nenchantiskej ipan on nemouejueyikalpanuan, niman nochiuiyan kampa tlaxoxotontok oksejpa nentlakuejkuektlaliskej. 34 Nochimej on yejuan nojuitiaj ipan nemopaís, kitaskej ika impan on nemotlaluan oksejpa yonentlatôkakej, niman xok tlatetsotsolkan yes. 35 Niman ijkuakon nochi tlakatl kijtos: 'In tlajli yejuan xkitlatôkiliayaj, aman tlajtlamati kenon xochitlan Edén; on uejueyikalpanmej yejuan yokinxoxotonijkaj niman xok yakaj chantiya imimpan, aman oksejpa impan chantiwa niman yokintepanchinantijkej para ika nomanauiyaj.' 36 Ijkuakon, on yejuan xomikkej yejuan chanejkej nisiu nemopaís, kimatiskej ika nejua nemoTEKO onemechkauilij oksejpa xkuejkuektlalikan on tlen yokixoxotonijkaj, niman no, onemechkauilij oksejpa xtôkakan kampa xokuitlaj noskaltiaya. ¡Nejua nemoTEKO nikijtoua ika nochiuas on tlen yonikijtoj!
37 ' 'Nejua nemoTEKO Dios, no nikijtoua: Nejua nikchiuas okseki tlajtlamach más. Nikchiuas on tlinon on israelitas nechtlajtlaniliskej ma nikchiua impampa; nejua sanoyej nikinmiyekilis ken nomiyekiliaj on borregos. 38 Impan on uejueyikalpanmej kampa xakaj chantiya, sanoyej tojlantiskej on yejuan ompa chantiskej. Nesiskej kenon miyekej borregos yejuan tentiuij ipan iojuiuan Jerusalén ijkuak kinuikaj ipan on iluimej para kinuentlaliskej. Niman ijkuakon, nenkimatiskej ika nejua niDios de Israel.' ”