On tiotlajtojli yejuan kijtoua tlinon xkuajli ipan nochiuas on tepetl Seir
35
ToTEKO oksejpa onechnots niman onechijlij: 2 “Tejua tlaltikpaktlakatl, xontlacha kampaka onkaj on tepetl Seir, niman ompaka xontiotlajto ikan notokatsin. Xkonijto on tlinon xkuajli impan nochiuas on ichanejkauan. 3 Xkinmijli ika nejua akin niiTEKO Dios Israel ijkin nikijtoua: 'Nejua yoninokuep nemotlauelikniu, nemejuamej chanejkej ipan on tepetl Seir, niman nejua nemechcastigaros; kuajli nemechtlaxoxotonilis, niman on nemotlal nikauas ken sen xalpatlajkan. 4 Nejua nikinxoxotonis on nemouejueyikalpanuan, niman on nemotlal nikauas ken sen xalpatlajkan. Niman ijkuakon nemejuamej nenkimatiskej ika nejua niDios de Israel.5 ' ‘Nemejuamej nochipa onenkintlauelitakej on israelitas, niman onenkinuijsokkej ijkuak nejua otlan nikincastigaroua ipampa intlajtlakoluan. 6 Pero nejua akin niiTEKO Dios Israel, ijkon ken melauak ninemi, ninotlajtolmaka ika nemechtekauilis ma mechmiktikan. Ijkon ken nemejuamej nenkuelitaj nentemiktiaj, no ijki mechmiktiskej. 7 Nejua nemechtlaxoxotonilis, nemejuamej chanejkej ipan on tepetl Seir, niman on nemotlal nikauas ken sen xalpatlajkan, niman xokaman yakaj nikauilis ompa ma kalaki nion ma uajkisa, pampa nenmochimej yejuan ompa nempanoskej, nenmechmiktis. 8 Ipan nemotepeuan niman ipan nemotepetsitsiuan, ipan nemoixtlauayojuan niman ipan nemoríos, nikinchayauas on mikatsitsimej yejuan kinmiktiskej ipan nouijsokilistli. 9 On nemotlal para nochipa nikauas ken sen xalpatlajkan, niman xokaman yakaj chantis impan on nemouejueyikalpanuan. Niman ijkuakon nemejuamej nenkimatiskej ika nejua niDios de Israel.
10 ‘ 'Maski nemejuamej nenkimatstokej ika nejua nichanti ipan on tlajli Israel, onenkijtojkej nenkimoyaxkatiskej on tlajli Israel niman Judá. 11 Pero nejua akin niiTEKO Dios Israel, ijkon ken melauak ninemi, ninotlajtolmaka ika no ijki nemechchiuilis ken nemejuamej onenkinchiuilijkej on israelitas. Nemejuamej sa temojtij ken onekualankej iminuan, onenkinnexikolitakej niman sanoyej onenkintlauelitakej. Niman ijkuak nejua nemechcastigaros, yejuamej kimatiskej ika nejua niiminDios. 12 Ijkuakon, no nenkimatiskej ika nejua akin niDios onikak nochi on tlen xkuajli onenkinmijtouilijkej on tepemej de Israel. Nemejuamej onenkijtojkej: '¡Yokintlaxoxotonilijkej on tlaltin; aman uelis tikintoyaxkatiskej!' 13 ¡Onennechixnamikej ikan noueyimatilistli, niman onikak nochi tlen onenkijtojkej.
14 ' ‘Yejua ika tej, nejua akin niiTEKO Dios Israel ijkin nikijtoua: Nochi tlaltikpaktlakatl sanoyej pakis ijkuak nejua nemechpopolos nemejuamej yejuan nenchantij ipan on tepetl Seir, niman yejuan nenchantij ipan on tlajli Edom. 15 Nemejuamej sanoyej onempakkej ijkuak imintlaluelikniuan on israelitas okinxoxotonilijkej on impaís yejuan okiselijkej ken herencia, pero nemejuamej no ijki nemopan nochiuas. Nemejuamej yejuan nenchantij ipan on tepetl Seir niman nochimej yejuan nenchantij ne Edom, no mechtlaxoxotoniliskej, niman on nemotlal nokauas ken sen xalpatlajkan. ¡Niman ijkuakon nemejuamej nenkimatiskej ika nejua niDios de Israel!'