On tiotlajtojli yejuan kijtoua tlinon impan nochiuas on tekiuajkej de ne Israel
34
ToTEKO oksejpa onechnots, niman onechijlij: 2 “Tejua tlaltikpaktlakatl, xtiotlajto ikan notokatsin, niman xkijto tlinon sanoyej xkuajli impan nochiuas on tekiuajkej de ne Israel yejuan nonekiya kincuidaroskej on notlapejpeniluan kenon tlajpixkej kincuidarouaj inborregos. Xkinmijli ika nejua nemoTEKO Dios ijkin nikinmijlia: '¡Sanoyej nentlajyouiskej nemejuamej tekiuajkej de ne Israel, yejuan sano nemejuamej nenmocuidarouaj niman on israelitas uej xnenkincuidarouaj! 3 Nenmejuamej sanoyej xkuajli nentlajpixkej, pampa maski xnenkincuidarouaj on borregos, nenkoniliaj inleche on borregas, nenkinximaj para ika on inichkayo nenkimochijchiuiliaj nemotlaken niman nenkinmiktiaj on borregas yejuan más tojtomajkej para nentlakuaj. 4 Xnenkimpaleuiyaj on yejuan xkojtikej, xnenkimpajtiaj on yejuan kualoj, nion xnenkintejkuiliaj kampa nokokouaj. No ijki, xnenkintejtemouaj on yejuan nopojpolouaj, nion xnenkinuajkuepaj on yejuan nejkuaniaj ipan inojui, yej sanoyej nenkintlajyouiltiaj niman nenkinmajmailiaj. 5 On notlapejpeniluan, ken itlaj borregos yeskiaj yejuan yonochajchayajkej pampa xok kipiyaj intlajpixkau, niman kinmajsij on tepeyolkej yejuan nakakuanij. 6 Yonochajchayajkej ipan on tlajtlakpakmej tepetsitsimej, niman no, impan nochimej on uejueyimej tepemej. Yejuamej yonopojpolojkej ipan nochi on tlajli niman xakaj kominmatstikaj para komintejtemos.7 ' 'Yejua ika tej, nemejuamej tlajpixkej de on noborregos, kuajli xkakikan tlinon nikijtoua. 8 Nejua akin ninemoTEKO Dios, ijkon ken melauak ninemi, ijkin ninotlajtolmaka: Nemejuamej yejuan nonekiya nenkincuidaroskej on notlapejpeniluan kenon kuajli tlajpixkej kincuidarouaj inborregos, san nemejuamej nenmocuidarouaj. On kuajli tlapixkej kintejtemouaj inborregos ijkuak poliuij niman kinmanauiyaj de on tepeyolkej ijkuak kinmajsij para maka kinmiktiskej niman kinkuaskej. Pero nemejuamej uej ximpan nentlachaj on noborregos. Yejua ika kinmajsij niman sanoyej kintlajyouiltiaj pampa xkipiyaj akinonmej kinmanauiskej. 9 Yejua ika tej, nemejuamej tlajpixkej, xkakikan in tlajtojli 10 yejuan nejua nemoTEKO Dios nemechijlia: Nejua yoninokuep nemotlauelikniu, niman nemejuamej nenmechtlajtlakoltis de on tlen xkuajli impan yonochiu on noborregos. Nemechkuilis on tekiuajyotl yejuan onemechmakak para nenkincuidaroskiaj yejuamej. Ijki tej, xok nenmocuidaroskej san nemejuamej nion yejuamej nenkinmayanaltiskej. Nemechinkuilis on noborregos niman nejua nikincuidaros para nemejuamej xok nenkintlajyouiltiskej.
On kuajli tlajpixki
11 'Nejua nemoTEKO Dios ijkin nikijtoua: Nejua, sano nejua nikomintejtemos on noborregos niman nikincuidaros. 12 Ijkon ken sen tlajpixki komintejtemoua iborregos ijkuak yonochajchayajkej, nejua no ijki nikomintejtemos on notlapejpeniluan israelitas yejuan ken noborregos yeskiaj. Nikominnanas kampaka onochajchayajkej niman onopojpolojkej ipan on tonajli ijkuak ken impan otlamoxten niman impan otlayouatiak. 13 Nejua nikinkixtis ipan on países kampa ximinchan, nikinsentlalis niman oksejpa nikinuikas ipan imintlal. Kemaj nikintlajpiyas ipan itepeuan on país Israel, nikinuikas intech on ayajtokmej niman nochiuiyan ipan on país kampa chantiua. 14 Nikintlakuajkualtis kampa onkaj más kuajli sakatl, ipan isakayoj iuejueyitepeuan Israel. Ompa ueliskej noseuiskej niman kikuaskej on más kuajli sakatl. 15 Nejua, sano nejua nikintlajpiyas on noborregos; sano nejua nikinuikas kampa notejtemaskej niman noseuiskej. ¡Nejua nemoTEKO Dios, ijki yonikijtoj nikchiuas! 16 Nikintejtemos on noborregos yejuan yonopojpolojkej niman nikinuajkuepas on yejuan okse ojtli okajsikej; nikintejkuilis kampa nokokouaj niman nikimpaleuis yejuan xkojtikej. Pero on yejuan tojtomajkej niman yejuan kojtikej nikinmiktis pampa nejua nitlajpixketl yejuan nikchiua tlen melajki.
17 'Nemejuamej israelitas yejuan ken nennoborregos yeskiaj, nemechijlis akinonmej kuajli nenmouikaj niman akinonmej xkuajli nenmouikaj. Nikchiuas ken ijkuak kinxelouaj on borregos intech on chivos. 18 Nemejuamej yejuan xkuajli nenmouikaj xnenyolpachiuij maski nenkikuaj on más kuajli sakatl; yej no, ipan nenchojcholojteuaj on yejuan nenkixuikauaj. Niman ijkuak yonenkonikej on achipauak, no nenkimoyajteuaj para moyauak ma konikan on borregos yejuan kuajli nouikaj. 19 On noborregos yejuan kuajli nouikaj nenkinchiualtiaj ma kikuakan on sakatl yejuan yonenkichojcholojkej, niman konij on atl yejuan yonenkimoyajkej. 20 Yejua ika, nejua nemoTEKO Dios ijkin nemechijlia nemejuamej israelitas yejuan ken nennoborregos yeskiaj: nejua, sano nejua nemechyolkuitis niman nemechijlis akinonmej kuajli nenmouikaj niman akinonmej xkuajli nenmouikaj. Nejua nemechxelos nemejuamej yejuan nentojtomajkej niman nenkojtikej borregos de on yejuan tejteuakej niman xkojtikej borregos. 21 Nemejuamej yejuan nentojtomajkej niman nenkojtikej, nenkintejteuiyaj niman nenkinmajmapeuaj on noborregos yejuan tejteuakej, yejuan kualoj niman yejuan apismikij, hasta kaman nosejsemoyauaj ipan on tlaltin yejuan uejka nokauaj. 22 Pero nejua nikinmanauis on noborregos yejuan kuajli nouikaj. Xok niktekauilis ma kimichtekilikan on tlen inyaxka. Nejua sesentemej nikinyolkuitis on noborregos. On borregos yejuan kuajkualtin, nikinxelos intech on borregos yejuan xkuajkualtin. 23 Nejua nikchiuas para oksejpa ma uajla sen notekipanojkau yejuan yes ken rey David, niman san yejua yes notlajpixkau yejuan kincuidaros on noborregos. Yejua intlajpixkau yes. 24 Nejua nemoTEKO, niiminDios yes, niman on notekipanojkau yejuan yes ken rey David, yejua yes iminrey. ¡Nejua nemoTEKO, ijki yonikijtoj nochiuas! 25 Nejua nikchiuas sen pacto iminuan, para yejuamej nemiskej inyolika niman xakaj intlauelikniu kimpajsolos. Ipan on pacto nikintlajtolmakas ika ne Israel nikimpopolos on tepeyolkej yejuan nakakuanij, para ijki on noborregos uelis nemiskej inyolika maski kampa tlakauyan niman uelis kochiskej kampa kojyoj.
26 'On noborregos nikinchantis iyeualkan noyektepeu, niman sanoyej nikintiochiuas. Niman nikintiochiuas ikan kiautli yejuan nikinuajtitlanilis ijkuak ye noneki kiauis. 27 On kojtlakijlomej yejuan onkaj ipan on tepetitlan, sanoyej tlakiskej, niman on tlajli sanoyej tlatlakitis ipan itlatôkuan. Ijki tej, on noborregos chantiskej inyolika ipan intlal kampa xakaj kimpajsolos. Ijkuak nejua nikinmanauis on notlapejpeniluan intech on yejuan kimpiyaj esclavos, yejuamej kimatiskej ika nejua niiminTEKO. 28 Yejuamej xokaman oksejpa kinuikaskej ken esclavos ipan oksekimej países, niman xokaman oksejpa kinkuaskej on tepeyolkej yejuan nakakuanij. Yejuamej chantiskej inyolika, niman xok yakaj kinmomojtis. 29 Nejua nikchiuas para oksekimej naciones sanoyej ma kinmixmatikan pampa sanoyej tlatlakis ipan imintlal. Niman on notlapejpeniluan xokaman oksejpa ajapismikiskej; niman on oksekimej naciones xokaman inka nauiltiskej. 30 Niman ijkuakon, yejuamej kimatiskej ika nejua akin niiminTEKO Dios ninemi iminuan, niman kimatiskej ika yejuamej yejuan israelitas, yejuamej notlapejpeniluan. ¡Ijki nochiuas pampa nejua akin niDios ijki yonikijtoj nochiuas! 31 Nemejuamej israelitas ken nennoborregos yeskiaj yejuan nentlakuajkuaj ipan nosakayoj, niman nejua ninenmoDios. ¡Nejua nemoTEKO, ijki nikijtoua!”