ON IKA NAUI TLAXELOJLI: YOLTLALIJLI NIMAN TLAMACHALISTLI PARA ISRAEL
(33.1 – 48.35)
On tlajtolmakalistli ika on israelitas nokuepaskej ipan imintlal (33.1 – 39.29)
ToTEKO kitlalia Ezequiel ken soldadojtlajpixki
33
ToTEKO oksejpa onechnots, niman onechijlij: 2 “Tejua tlaltikpaktlakatl, xkiminnotsa on mochanejkauan, niman xkinmijli ika nejua ijkin nikijtoua: 'Ijkuak nejua nikontitlani on nouijsokilistli ipan sen país, on chanejkej ipan on país kitlapejpeniaj niman kiteneuaj sen soldadojtlajpixki yejuan san ika nokaua tlajpiya. 3 Niman ijkuak on soldadojtlajpixki kita ika on soldados yejuan intlauelikniuan ye yejkotokej ipan ipaís, kipitsa on tlapitsajli para ika kiminnotsa on ichanejkauan para ma nomanauikan. 4 Tla yakaj kaki on tlapitsajli niman san nokaua, niman xitlaj kichiua para nomanauiya, niman on intlauelikniuan yejkoj niman kimiktiaj, tla ijkon, sano yejua kipiya tlajtlakojli ipampa imikilis. 5 On melauak yejua kipiya tlajtlakojli tla kimiktiaj, pampa maski okak ijkuak okipitskej on tlapitsajli, xokichiu cuenta para onomanauij, pero tla yejua kichiuaskia cuenta uelisia nomanauiskia.6 'Pero tla on soldadojtlajpixki, kita ika ye yejkotokej on soldados yejuan intlauelikniuan, niman xkipitsa on tlapitsajli para ika kiminnotsas on ichanejkauan para ma nomanauikan, niman on intlauelikniuan yejkoj niman yakaj kimiktiaj, tla ijkon, on tlakatl mikis ipampa yejua itlajtlakoluan, pero nejua niktlajtlakolmakas on soldadojtlajpixki ipampa imikilis on tlakatl.'
7 'Tejua tej, tlaltikpaktlakatl, yonimitstlalij ken sen tlajpixki intech on notlapejpeniluan israelitas. Yejua ika tej, kuajli xkaki on tlinon motechkopa nikinmijlis, niman ijki kimatstiaskej tlinon xkuajli impan nochiuas tla xnechtlakamatij. 8 Ijkuak nejua nikijtos ika yakaj tlakatl yejuan xompayejyeua ika onkaj mikis ipampa itlajtlakoluan, niman tla tejua xitlaj tikijlia para ma noyolpatla niman kuajli ma nouika, tla ijkon, on xompayejyeua mikis ipampa yejua itlajtlakol, pero tejua nimitstlajtlakomakas ipampa imikilis on tlakatl. 9 Pero tla tejua tikijlia on tlakatl xompayejyeua para ma noyolpatla niman kuajli ma nouika, niman yejua xkichiua, yejua mikis ipampa yejua itlajtlakol, pero tejua tikmanauis monemilis.
Cada se kiselis itlaxtlauil ken kimelaua
(Ez 18.21-32)
10 'Tejua tlaltikpaktlakatl, xkinmijli on notlapejpeniluan israelitas ika nejua ijkin nikinmijlia: ‘Nemejuamej israelitas nenkinemiliaj semi yonenixpolijkej pampa sanoyej yonenkichijkej tlen xkuajli niman sanoyej yonentlajtlakojkej. Niman nenmotlajtoltiaj tlinon noneki nenkichiuaskej para sanken nennemiskej. 11 Pero nejua nemoTEKO Dios, ijkin nikijtoua: Ijkon ken melauak ninemi, ninotlajtolmaka ika nejua xnikneki ma mikikan on xompayejyeuamej, yej nikneki ma noyolpatlakan niman kuajli ma nouikakan para ijkon xmikiskej. Nemejuamej israelitas xkajkauakan on xkuajli nemilistli yejuan nenkipiyaj, niman ijki xnenkipiyaskej tline nenmikiskej.’
12 'Tejua tlaltikpaktlakatl, xkinmijli on mochanejkauan ika nejua ijkin nikinmijlia: ‘Tla sen tlakatl yejuan kuajli iyojlo peua xok nechtlakamati niman tlajtlakoua, xnomanauis de itechika on castigo maski achtoj kuajli nouikaya; niman tla sen tlakatl xompayejyeua kajkaua on tlinon xkuajli kichiuaya, xmikis ipampa on tlinon xkuajli yokichijka. Tla on tlakatl yejuan kuajli iyojlo peua tlajtlakoua, xitlaj ika kipaleuis maski kuajli nouikaya. Yejua ika, ika onkaj mikis. 13 Tla sen tlakatl yejuan kuajli iyojlo, nikijlia ika kipiyas nemilistli, niman kemaj yejua peua tlajtlakoua pampa kinemilia xmikis pampa achtoj kuajli onouikak, nejua xnikelnamikis on tlinon achtoj kuajli okichiu. Yejua ika tej, ika onkaj mikis ipampa on tlinon sakin xkuajli okichiu. 14-15 Niman tla sen tlakatl xompayejyeua, nikijlia ika mikis ipampa itlajtlakoluan, niman yejua kajkauas on tlajtlakojli, niman peuas kuajli nouikas niman kichiuas tlen melajki, melauak tej yejua nemis, niman xmikis. San ma tikontlalikan tla yejua kitekuepilia on tlen kimakateuaj ijkuak kitetlanejtia itomin noso kitekuepilia on tlinon yokichteka, niman tla kintlakamati on noleyes yejuan kitemakaj nemilistli niman tla xok kichiua on tlen xkuajli, melauak tej yejua nemis, niman xmikis. 16 Pampa yejua peuas kichiuas on tlen kuajli niman tlen melajki, yejua nemis, niman nejua xok nikelnamikis nion se de on tlajtlakoltin yejuan yejua okichijka.'
17 Tejua Ezequiel, on mochanejkauan kijtouaj ika nejua xmelajki tlinon nikchiua, pero yej yejuamej xmelajki tlinon kichiuaj. 18 Oksejpa nijkitoua ika tla yakaj tlakatl yejuan kuajli nouikaya, kajkaua on tlinon kuajli kichiuaya niman kichiua on tlinon xkuajli, yejua mikis ipampa on tlinon xkuajli kichiua. 19 Pero tla on tlakatl yejuan xompayejyeua kajkaua on tlinon xkuajli kichiuaya niman kichiua on tlinon kuajli niman tlen melajki, yejua nemis ipampa on tlinon kuajli kichiua. 20 Pero on israelitas oksejpa kijtoskej: ‘ToTEKO xmelajki tlinon kichiua.’ Pero nejua nemechtlajtlakolmakas cada se de nemejuamej israelitas, ken nemejuamej onenmouikakej.”
Kixoxotoniaj Jerusalén
21 Ipan on ika makuijli tonajli de on ika majtlaktli metstli, ijkuak tikuikayaj majtlaktli uan ome xipan ika otechuikakej ne Babilonia, sen tlakatl yejuan ouajcholojteu ne Jerusalén ouajlaj niman onechtlajtlajtouilij ika on ueyikalpan Jerusalén yokinoyaxkatijkej on totlauelikniuan. 22 On tlayoua ijkuak xe yejkoya on tlakatl yejuan ouajcholojteu, toTEKO nopan okitlalij ipoder; niman on kualkan, ijkuak oyejkok on tlakatl, toTEKO okichiu para oksejpa ma ueli nitlajto, niman xok ninontsin katka.
Intlajtlakoluan on israelitas
23 ToTEKO onechnots, niman onechijlij: 24 “Tejua tlaltikpaktlakatl, on israelitas yejuan chantij ipan on uejueyikalpanmej de ne Israel yokintlaxoxotonilijkej, niman kijtojtonemij: ‘Tla Abraham iselti katka, niman ouel okinoyaxkatij nochi in país, tla ijkon, tejuamej pampa timiyekej, más tiueliskej oksejpa tiktoyaxkatiskej in país.’ 25 Yejua ika tej, tejua xkinmijli ika nejua nemoTEKO Dios ijkin nikinmijlia: ‘Nemejuamej nenkikuaj nakatl yejuan yesyoj, nenkinmauistiliaj ídolos niman nentemiktiaj. ¿Niman ijki nenkinemiliaj nemechkauilis oksejpa xmoyaxkatikan on país? 26 Nenkitlaliaj nemoyojlo ipan on nemoteposuan yejuan ika nenteuijsokij para nenkitekuiliaj tlinon nemejuamej nenkinekij. Nenkichiuaj miyek tlajtlamach yejuan sanoyej nechkualania. Nochimej nemejuamej nensiuapapatlaj noso nentlakapapatlaj. ¿Niman ijki nenkinemiliaj nemechkauilis xmoyaxkatikan on país?’
27 'No ijki, xkinmijli ika nejua nemoTEKO Dios ijkin nikijtoua: ‘Ijkon ken melauak ninemi, ninotlajtolmaka ika on yejuan sanken chantij ipan on uejueyikalpanmej yejuan yokinxoxotonijkej intlauelikniuan, kinmiktiskej; on yejuan chantij ipan campo, nikchiuas para ma kinkuakan on tepeyolkej yejuan nakakuanij, niman on yejuan chantij ipan on uejueyimej kaltin kampa on soldados nomanauiyaj, niman yejuan chantij ijtik teostomej, mikiskej ikan kokolistin. 28 Nejua nikauas on país ken sen xalpatlajkan kampa xitlaj onkaj. Nikixtilis on ipoder yejuan ika on israelitas sanoyej noueyimatij. Niman on tepemej de on país Israel, nokauaskej ken sen xalpatlajkan kampa xitlaj onyas, niman xok yakaj panos ompaka. 29 Ijkuak nejua yonikau ken sen xalpatlajkan on país, niman yonitlaxoxotonij ipampa on sanoyej tetlajyeloj tlajtlakojli yejuan okichijkej on israelitas, ijkuakon kimatiskej ika nejua niiminTEKO.’
30 'Tejua tlaltikpaktlakatl, on mochanejkauan mitsteneuaj ijkuak nonamikij intech on tepanchinantin niman intech intsakuijlouan on kaltin, niman kinojliaj: ‘¡Xuajuiyan! Tiauij tikonkakij on tiotlajtojketl yejuan techijlis on itlajtoltsin toTEKO.’ 31 Kemaj on notlapejpeniluan uajlauij niman notlaliaj mixpan, kitl saman uajlauij ikan nochi iminyojlo para mitskakiskej. Pero yejuamej xkichiuaj on tlinon tejua tikinmijlia ma kichiuakan. Yejuamej kijtouaj ika nechtlajsojtlaj, pero ipan iminyojlo, san kitejtemouaj tomin. 32 Yejuamej mitsitaj ken se yejuan sanoyej kualtsin kinnokuikatia on tetlajsojtlaliskuikamej niman sanoyej kualtsin kitsotsona iarpa. Yejuamej kakij motlajtol, pero xkichiuaj on tlinon tikijtoua. 33 Pero nochi on tlinon yonikijtoj, melauak nochiuas, niman ijkuak nochiuas, yejuamej kimatiskej ika intsajlan nemiya sen tiotlajtojketl.”