On ajmankachokistli ipampa irey Egipto
32
Ipan on achtoj tonajli de on ika majtlaktli uan ome metstli, ijkuak tikuikayaj majtlaktli uan ome xipan ika otechuikakej ne Babilonia, toTEKO oksejpa onechnots, niman onechijlij: 2 “Tejua tlaltikpaktlakatl, xajmankachoka ipampa on rey de Egipto niman ijkin xkijli:‘Tejua rey de Egipto, timomatiya ika tinemi ken sen kojtik león, intsajlan on naciones;
pero tejua, yej ken tisen temojmojtij ayolki
yejuan titlakoxonia ijtik on río Nilo.
Ikan mokxiuan tiktlajlotia on atl, niman tikmoyaua on ayajtok.’ ”
3 Ijkin kijtoua toTEKO Dios: “Maski tejua tinemi intsajlan on kalpanmej kampa tojlan, nejua timitschapanilis nomatlau niman nimitsajtsis. 4 Nimitstejchiuilanas ipan tlajli niman ompa nimitstlajkalteuas para xmiki. Nikchiuas para nochimej on totomej yejuan patlantinemij ipan cielo ma notlalikan mopan, niman nikchiuas para on tepeyolkej ma tekitlakuakan ikan on momikatlalnakayo. 5 On monakayo yejuan yopalan de momikatlalnakayo, nikchajchayauas ipan on tepemej niman ipan on ixtlauamej. 6 Nejua nikapalos on tlajli ikan moyesyo, niman on moyesyo ajsis hasta ipan on tepemej, niman ika temiskej on atlautin. 7 Ijkuak nejua nimitspopolos, nikchiuas para ipan on cielo ma tlayouatia, niman makasa ma petlanikan on sitlalimej; niktlapachos on tonaltsintli ikan tlilijki moxtli, niman on metstli xok oksejpa petlanis. 8 San tejua mopampa nikchiuas para makasa ma petlanikan on sitlalmej yejuan petlanij ipan cielo, niman nikchiuas para ma tlayouatia ipan mopaís. ¡Nejua akin niiTEKO Dios Israel ijki yonikijtoj nochiuas!
9 'Ijkuak impan on países yejuan xtikinmixmati onmachiyas ika yonimitspopoloj, nejua nikchiuas para miyekej ipan on kalpanmej ma nomojtikan. 10 Mopampa tejua nikchiuas para miyekej kalpanmej sanoyej ma nomojtikan; iminreyes sanoyej kuekuetlakaskej ijkuak kitaskej inmixpan nikayakachoua noespada. Ijkuak timikis, yejuamej sanoyej mojkakuekuetlakaskej pampa xkinekiskej no ijki mikiskej.”
11 ToTEKO Dios, ijkin okijlij on rey de Egipto: “Iespada on rey de Babilonia mitsmiktis. 12 Nejua nikchiuas para on soldados de Babilonia yejuan nion xteiknelianij, ma kinmiktikan on miyekej mosoldados. Yejuamej kipopoloskej on moueyilis niman on moueyimatilis tejua Egipto, niman nochiuiyan kampa titlamandaroua miyek tlakatl mikis. 13 Nejua nikinmiktis nochimej on moyolkauan yejuan konij atl ipan moríos; nion yolkej nion tlakamej, xokaman oksejpa kichojcholoskej on moau para kimoyauaskej. 14 Ijkuakon, nikchiuas para on moau nochipa ma chipauak niman yolik ma yajto ken itlaj on aceite. ¡Ijki nochiuas pampa nejua akin niiTEKO Dios Israel, ijki yonikijtoj nochiuas! 15 Ijkuak nikauas Egipto kenon xalpatlakan, niman xok yakaj chantis ipan on país, ijkuakon kimatiskej ika nejua niDios.
16 'On siuamej yejuan chantij ipan on sesentlamantikej naciones nokuikatiskej in ajmankakuikatl yejuan nokuikatiaj ijkuak yakaj miki. Nokuikatiskej ipampa Egipto niman impampa on tojlamej egipcios yejuan mikiskej. ¡Nochi on melauak nochiuas, pampa nejua akin niiTEKO Dios Israel, ijki yonikijtoj nochiuas!"
Egipto nemi kampa nemij on yejuan yomikej
17 Ipan on kaxtojli tonajli de on ika majtlaktli uan ome metstli, ijkuak tikuikayaj majtlaktli uan ome xipan ika otechuikakej ne Babilonia, toTEKO oksejpa onechnots, niman onechijlij: 18 “Tejua tlaltikpaktlakatl, xmokuikati in kuikatl yejuan nokuikatiaj ijkuak yakaj miki. Ijkin xkinkuikatlali on tojlamej egipcios:
‘On egipcios yejuan uejueyixtokej, onxinij tlatsintlan ijtik in tlajli,
niman ajsij ipan on tlalkontin kampa ye nemij on mikatsitsimej de oksekimej naciones.
19 Nemejuamej egipcios,
¿nenkinemiliaj nemejuamej más sanoyej kualtetsin nemonación, xken on oksekimej naciones?
Melauak tej ika ka. Yejua ika tej, xontemokan ijtik nemotlalkon, niman no xmotemakan kampa xintitemij on yejuan xokineltokakej Dios.'
20 'On egipcios mikiskej iminuan on yejuan kinmiktiskej ipan nouijsokilistli. On espada ye kuajli yokitentijkej para kinmiktiskej nochimej on tojlamej egipcios. 21 Kampa nemij on mikatsitsimej ne miktlan, on uejueyitlayekankej de oksekimej naciones inka uetskaskej on egipcios iminuan on yejuan iminuan nopaleuiyaj. Ijkin kijtoskej: '¡Yotitemoko para nikan touan tinemis tejuamej yejuan xtikneltokaj Dios, on yejuan on totlauelikniuan okinmiktijkej ipan on nouisokilistli.'
22 'Ompa ne miktlan no nemi on rey de Asiria iminuan nochimej isoldados yejuan tlalpachijtokej iyeualkan yejua itlalkon. Nochimej yejuamej omikkej ipan nouijsokilistli. 23 Okintlaltôkakej ipan on tlalkontin kampa más uejkatlan. On iminsoldados, miyekej sanoyej kinmakajsiyaj ijkuak nemiyaj, pero omikkej ipan on nouijsokilistli, niman aman kiyejyeualojtokej itlalkon on rey asirio.
24 'No, ompa okitlaltôkakej on rey de Elam, iminuan nochimej isoldados yejuan kiyejyeualojtokej yejua itlalkon. Nochimej yejuamej omikkej ipan nouijsokilistli, niman oxinitoj kampa más uejkatlan de in tlajli. Ijkuak yejuamej nemiyaj, oksekimej naciones sanoyej kinmakajsiyaj, pero aman xok kintlakaitaj intsajlan on mikatsitsimej yejuan xonechneltokakej nejua akin niDios. 25 Imikatlalnakayo on rey de Elam, onkaj intsajlan nochimej on isoldados yejuan no mikatsitsimej. Nochimej yejuamej xonechneltokakej nejua akin niDios niman omikkej ipan nouijsokilistli, niman aman kiyejyeualojtokej itlalkon on rey Elam. Ijkuak yejuamej nemiyaj, oksekimej naciones sanoyej kinmakajsiyaj, pero aman xok kintlakaitaj intsajlan on mikatsitsimej. Onokajkej intsajlan on yejuan okinmiktijkej.
26 'No ijki, ompa okitlaltôkakej on rey Mesec niman on rey Tubal iminuan nochimej insoldados yejuan kiyejyeualojtokej intlalkon on iminreyes. Nochimej yejuamej xonechneltokakej nejua akin niDios niman omikkej ipan nouijsokilistli. Ijkuak yejuamej nemiyaj, no sanoyej kinmakajsiyaj miyekkan. 27 Yejuamej xokintlaltôkakej ikan tlakaitalistli ken on yejuan okintlaltôkakej iminuan iminteposuan de nouijsokilistli ijkuak oyajkej miktlan. Xokintlaltôkakej kenon yejuan okintlalilijkej iminespadas tlatsintlan de imintsontekon niman iminescudos okintlalilijkej tlapani ipan inmikatlalnakayo, niman no sanoyej kinmakajsiyaj miyekkan.
28 'Niman tejua rey de Egipto, no ompa tinemis iminuan on yejuan xonechneltokakej nejua akin niDios. Tejua mitsmiktiskej niman mitstlaltôkaskej intsajlan on yejuan okinmiktijkej ipan nouijsokilistli.
29 'No, ompa nemi on rey de Edom iminuan iuejueyitekiuajkauan. Maski yejuamej sanoyej uejueyixtikatkaj ikan ueyi poder, aman nemij intsajlan on yejuan omikkej ipan nouijsokilistli; tlaltoktôkej intsajlan on mikatsitsimej yejuan xonechneltokakej nejua akin niDios.
30 'Ompa nemij nochimej on yejuan uejueyitlayekankej katkaj, yejuan chanejkej katkaj kampaka norte de Israel niman yejuan chanejkej katkaj ipan on ueyikalpan Sidón. Yejuamej sanoyej uejueyixtikatkaj, niman ipampa iminueyi poder, oksekimej sanoyej kinmakajsiyaj, pero aman no yotemotoj kampa nemij on yejuan omikkej ipan nouijsokilistli; aman yej nemij ipan pinaualistli. Yejuamej xonechneltokakej nejua akin niDios, niman ne kampa tlaltoktokej xok kiseliaj tlakaitalistli intsajlan on yejuan okinmiktijkej ipan nouijsokilistli, yejuan no nemij ipan intlalkon.
31 'Niman ijkuak on rey de Egipto mikis, niman ne miktlan kintas nochimej on oksekimej naciones, noyoltlalis pampa kitas ika xsan yejua omik iuan nochimej on isoldados. 32 Maski nejua onikchiu para nochiuiyan sanoyej ma kimakajsikan ijkuak yejua nemiya ipan in tlaltikpaktli, yejua iuan nochimej isoldados kintlaltôkaskej intsajlan on xompayejyeuamej yejuan omikkej ipan nouijsokilistli, yejuan xonechneltokakej nejua akin niDios. ¡Nejua akin niiTEKO Dios Israel, ijki nikijtoua nochiuas!"