3
Kemaj Dios onechijlij: “Tejua tlaltikpaktlakatl, xkua in amatlajkuilojli, niman kemaj xuiya xtlajtoti iminuan on israelitas.” 2 Niman nejua oniktlapoj nokamak, niman yejua onechkualtij on amatlajkuilojli. 3 Kemaj onechijlij: “Tejua tlaltikpaktlakatl, xtolo in amatlajkuilojli yejuan nimitsmaka, niman ika xixui.” Niman nejua onikuaj on amatlajkuilojli, niman onikmat sanoyej tsopelik ken nekutli.Dios kinauatia Ezequiel kenijki tiotlajtos
4 Kemaj Dios onechijlij: “Tejua tlaltikpaktlatl, xuiya xkinmijliti on israelitas on tlinon nejua nikneki ma kimatikan. 5 Nejua xnimitstitlani kampa tlajtouaj okse tlajtojli yejuan tejua xtikajsikamati, yej san nimitstitlani intech on israelitas. 6 Xnimitstitlani ipan on naciones kampa tejua xtikajsikamati imintlajtol. Pero maski tla nejua ompa nimitstitlaniskia, yejuamej mitskakiskiaj. 7 Pero on israelitas, maski kajsikamatij motlajtol, xkinekiskej mitskakiskej, pampa xkinekij nechkakiskej nejua. Yejuamej sanoyej yoltechikajkej niman tsontekonchikajkej. 8 Pero nejua nikchiuas para tejua no xmoyoltechikaua niman xmotsontekonchikaua para tikinmixnamikis yejuamej, ijkon ken yejuamej noyoltechikauaj para mitsixnamikij. 9 Nejua más nimitstsontekonchikauas ken chikauak on tetl diamante niman ken chikajkej on temej. Yejua ika tej, maka xmomojti ijkuak mitsitaskej ikan tlauejli on yejuan xipanteitanij.”
10 Kemaj no onechijlij: “Tejua tlaltikpaktlakatl, kuajli xkaki nochi tlinon nimitsijlis niman maka kaman tikelkauas. 11 Xuiya xkintati mochanejkauan kampa yejuamej kimpiyaj esclavos, niman tla kinekij mitskakiskej noso ka, tejua xkinmijli: 'Ijkin kijtoua toTEKO.' "
12 Kemaj ipoder Dios onechkuiteu. Niman ijkuak iueyilis toTEKO onejkuanij kampa nemiya, nokuitlapan onikak sen tlajtojli ken sen chikauak kokomokalistli, yejuan okijtoj: "Ma tikyekteneuakan toueyiDios ipan iyektiopan." 13 Ijkon okakistik, pampa on nauimej yejuan ken tlaltikpaktlakamej, nochimej notelouayaj se iuan okse ikan inmastlakapaluan. Niman no okakistikej on ruedas yejuan onkatkaj intech yejuamej. Okakistik ken sen chikauak tlakokomokalistli. 14 Ipoder Dios onechkuiteu niman onechkixtij de ompa. Niman nejua oniaj oninajmantiaj niman onikualantiaj, pero on ipoder toTEKO yejuan onkatka nopan, sanoyej kipiyaya fuerza. 15 Niman onajsik ipan on kalpan itoka Tel-abib, itempan on río Quebar, kampa chantiyaj on israelitas yejuan kimpiyayaj esclavos. Ompa iminuan oninen chikome tonajli, niman xnikmatiya tlinon nikchiuas nion tlinon nikijtos.
ToTEKO kitlalia Ezequiel ken sen soldadotlajpixki intech on israelitas
(Ez 33.1-9)
16 Ijkuak yopanok on chikome tonajli, toTEKO onechnots niman onechijlij: 17 “Tejua tlaltikpaktlakatl, nejua yonimitstlalij para tisoldadojtlajpixki yes intech on israelitas. Yejua ika tej, ijkuak tikakis itlaj nimitsijlis, tejua nimantsin tikinmijlis yejuamej para ma kimatstiakan ika nejua ijki nikijtoua. 18 Tla nikijtos ika sen xompayejyeua ika onka mikis ipampa itlajtlakoluan, pero tejua xitlaj tikijlia para ma kajkaua ika xkuajli nouika, tla ijkon, on xompayejyeua mikis ipampa itlajtlakoluan, pero tejua nimitstlajtlakolmakas ipampa imikilis yejua. 19 Pero tla tejua tikijlia on xompayejyeua para ma kajkaua on tlen xkuajli, niman yejua xkineki kajkauas, tla ijkon, yejua mikis, pero tejua xtimikis.
20 'No ijki, tla sen tlakatl yejuan kipiya melajkanemilistli, kajkauas on tlen kuajli kichiuaya, nejua nikchiuas para itlaj xkuajli ipan ma nochiua; niman tla tejua xitlaj tikijlia para ma kajkaua on tlen xkuajli, tla ijkon, on tlakatl mikis. Nejua xnikitas on tlen achtoj kuajli okichiu, niman yejua mikis ipampa yejua itlajtlakol, pero tejua nimitstlajtlakolmakas ipampa imikilis yejua. 21 Pero tla tejua, tikijlia on tlakatl para ma kajkaua on tlinon xkuajli kichiua, niman yejua kajkaua, yejua sanken nemis, pampa okak on tlinon otikijlij, niman tejua timomakixtis.”
ToTEKO kimaka Ezequiel sen tlatlachalistli yejuan okichiu para ma nontsintia
22 Kemaj toTEKO onechmakak okse tlatlachalistli ken notemikpan. Ipan on tlatlachalistli onikmat ipoder toTEKO, niman onechijlij: “Xmokuiteua niman xuiya ipan on ixtlauatl, pampa nejua ompa nimitsnotsas.” 23 Yejua ika, nejua oninokuiteu niman onyaj ipan on ixtlauatl, niman ompa onikitak iueyilis toTEKO, sano ijki ken onikitak ipan on achtoj tlatlachalistli ken notemikpan itempan on río Quebar. Kemaj oninotlakuantelkets niman oninopachoj hasta ipan tlajli. 24 Ijkuak on ipoder Dios ouajlaj nopan, okichiu para ma ninotelketsa. Kemaj toTEKO onechnots niman ijkin onechijlij: “Xuiya mochan niman maka tikisas. 25 Tejua tlaltikpaktlakatl, mitssasaloskej ikan mekatl, niman ijki xtiuelis tikisas para tinemis iminuan on israelitas. 26 No ijki, nejua nikchiuas para monenepil ma pepechiui mokopak niman xnontsintia. Niman ijki, tejua xok uelis tikinmajuas on israelitas pampa yejuamej nion xipan teitanij. 27 Pero ijkuak nejua niknekis nimitsijlis itlaj, nejua nikchiuas para oksejpa xtlajto, niman tikinmijlis: ‘Ijkin kijtoua toTEKO Dios.’ Kemaj tikinmijlis on notemachistil. Akin kinekis kakis, kakis, pero miyekej xkinekiskej kakiskej pampa on israelitas nion xipan teitanij."