ON IKA OME TLAXELOJLI: ON CHANEJKEJ JUDÁ KINMACHISTIAJ TLEN CASTIGO KISELISKEJ
(4.1 – 24.27)
Ezequiel kinmachistia on chanejkej Jerusalén on naui tlatlachalistin kampa okitak ika Dios kincastigaros (4.1 – 5.17)
Tlinon kixnextia on sokitabla
4
Dios okijtoj: "Tejua tlaltikpaktlakatl, xkui sen sokitabla yejuan xe uaki niman xtlali mixpan, niman ompa ipan on sokitabla xkixneskayoti on ueyikalpan Jerusalén. 2 Kemaj ipan on sokitabla, iyeualkan ixneskayo on ueyikalpan Jerusalén, xkinmixneskayoti miyekej soldados niman nochi tlinon ika kuijsokiskej on ueyikalpan. Ma nesi ika on ueyikalpan yokiyejyeualojkej itlauelikniuan. Niman no, ipan on sokitabla xkinmixneskayoti torres niman escaleras de tlajli para on soldados tlejkoskej ipan on tepanchinantli. 3 Kemaj xkui sen lámina de tepostli, niman xtelketsa para ika iuan xmoxelojtia on ueyikalpan, ken itlaj tepanchinantli yeskia. Niman kemaj xmotelketsa ixpan on ueyikalpan ken tikuijsoktiaskia. Yejuan in kixnextis ika on soldados, itlauelikniuan Jerusalén, kiyejyeualoskej on ueyikalpan para kuijsokiskej. Yejua in yes sen temachistijli de on tlen impan nochiuas on israelitas.Tlinon kixnextia on ika Ezequiel nasakaonok
4 'Aman, xmonajsakateka moopochmakopa para tikixnextis ika ichanejkauan Israel kiseliskej castigo impampa intlajtlakoluan. 5 Ijki tinajsakaonos moopochmakopa 390 tonajli. In kijtosneki ika ichanejkauan Israel kiseliskej castigo 390 xipan impampa intlajtlakoluan. Cada tonajli kijtosneki cada xipan ika otlajtlakojkej on ichanejkauan Israel. 6 Ijkuak yopanok on tonaltin, kej xmonajsakateka moyekmakopa 40 tonajli. In kijtosneki ika on chanejkej Judá kiseliskej castigo 40 xipan impampa intlajtlakoluan. Cada tonajli kijtosneki cada xipan ika otlajtlakojkej on ichanejkauan Judá. 7 Kemaj tontlachas ipan ixneskayo on ueyikalpan Jerusalén, ipan on sokitabla, kampa kiyejyeualojtokej itlauelikniuan. Niman ikan sen matepayojli ompaka tonmomatelketsas ikan tlauejli ken sen soldado yejuan nemi listo para tlauijsokis, niman tiktiotlajtojkaijlis on tlinon xkuajli ipan nochiuas. 8 Nejua nimitssasalos ikan mekamej para xtiuelis timokuepas okse lado, hasta kaman tikajxiltis on tonaltin yejuan noneki titlajyouis.
Tlinon kixnextia on memelatsin yejuan xchipauak
9 'Pero achtoj, tikonkuis trigo, cebada, millo, avena, habas niman lentejas. Nochi on, xnelo san sekan ijtik sen kontli niman ika xchijchiua sen memelatsin. In yejua tikuas ipan on 390 tonajli ijkuak tinajsakaonos moopochmakopa. 10 Mojmostla ipan sano yejua hora titlakuas. Ipan se tonajli tikuas se cuarto de kilo on motlakual. 11 Niman no, nochipa ipan yejua horas tatlis. Tikonis san tlajko litro atl ipan se tonajli. 12 On memelatsin tikuas ken tikuaskia sen pan de cebada. Pero on memelatsin tikikxitis ikan inxixalis on tlaltikpaktlakamej kampa nochi tlakatl mitsitstias."
13 Kemaj toTEKO no onechijlij: “Yejua in kixnextis ika in kenin tlakuajli yejuan xchipauak nixpan, yejua kikuaskej on israelitas ipan on países kampa nikinchajchayauas.”
14 Niman nejua ijkin oniknankilij: “NoTEKO Dios, ¿Tlen yej ninijtlakos ikan inxixalis on tlaltikpaktlakamej? Nejua ipan nochi nonemilis xkaman nikua itlaj yejuan xchipauak mixpan. Xkaman nikua inakayo sen yolki yejuan san ijki miki, noso yejuan okimiktijkej on tepeyolkej. Niman no, xkaman nikua itlaj nakatl yejuan xchipauak mixpan.”
15 Kemaj yejua onechijlij: “Tla ijkon, nejua nimitskauilia xkui inxixalis on uakaxtin para maka tikuis inxixalis on tlaltikpaktlakamej, para ika tikikxitis on momemelatsin.”
16 Kemaj no onechijlij: “Xkita tlaltikpaktlakatl, nejua nikchiuas para ma tlami tlakuajli ne Jerusalén. Cada se, san achijtsin kimakaskej, niman nochimej mojkatlakuaskej. On atl no san achijtsin kimakaskej cada se, niman koniskej ikan nemojtijli. 17 Ijkuak kitaskej ika xok kipiyaj atl nion tlakuajli, niman ika nochimej yotejteuakkej, yejuamej sanoyej nomojtiskej. Ijki impan nochiuas impampa intlajtlakoluan.”