Tlinon kixnextia on navaja niman on tsontli
5
Kemaj toTEKO onechijlij: "Aman tejua tlaltikpaktlakatl, xkui sen cuchillo yejuan sanoyej tlateki ken itlaj navaja yejuan ika notentsonximaj, niman ika xmokuatexikalo niman xmotentsonxima. Kemaj xkui sen tlatemachiuajli, niman xtemachiua yexkantipan ichkich on motson. 2 Tikxinis se parte de on yexkantipan on motson itlajkotian on ixneskayo on ueyikalpan niman tiktlatis. Ijkon tikixnextis tlen nochiuas ijkuak on ueyitlalpan kuijsokiskej itlauelikniuan. Kemaj, okse parte de on motson, tiktejtekis ikan sen mocuchillo niman tikxixinis iyeualkan ixneskayo on ueyikalpan. Kemaj, xmaili on dibujo de on ueyikalpan ikan moespada. Ijkon tikixnextis ika nikinmiktis ichanejkauan Jerusalén ikan inespadas on intlauelikniuan. Kemaj, on parte yejuan sa ika nochi de on motson, xkajkotokti para on ajakatl ma kichajchayaua. In kixnextis ika nejua nikintojtokas nochiuiyan on chanejkej Jerusalén para nikinmiktis ikan inespadas on intlauelikniuan. 3 Tejua tikauas kanaj keski on tsontli, niman xsalo itempan motlaken. 4 Kemaj xkui okse keski on tsontli, niman xkonchapani tliko para ma tlatla. In kixnextis ika ompa kisas tlitl yejuan kintlatis nochimej on israelitas.On tlinon kijtosneki on tlatlachalistin yejuan okintak Ezequiel
5 'Nejua nemoTEKO Dios nikijtoua: On ixneskayotl yejuan paon tikpiya, kixneskayotia Jerusalén. Nejua oniktlalij intlajkotian on naciones niman on uejueyitlalpanmej. 6 Pero on xompayejyejkej ne Jerusalén xokinekej okitlakamatkej noleyes niman notlanauatiluan. Yejuamej hasta más yotlajtlakojkej xken on oksekimej kalpanmej niman on naciones yejuan onokej inyeualkan, pampa xokintlakamatkej noleyes niman notlanauatiluan.
7 'Yejua ika, nejua nemoTEKO Dios nikijtoua: Nemejuamej israelitas más yonentlajtlakojkej xken on chanejkej ipan on naciones yejuan onokej nemoyeualkan. Xonenkintlakamatkej notlanauatiluan, niman hasta intlanauatiluan on kalpanmej yejuan onokej nemoyeualkan, no xnenkintlakamatij. 8 Yejua ika, nejua nemoTEKO Dios nikijtoua: Nejua no ninokuepas nemotlauelikniu nemejuamej chanejkej Jerusalén, niman nemechcastigaros inmixpan nochimej on naciones. 9 Pampa nenkinmauistiliaj on tetlajyelojkej ídolos, nemechcastigaros ken xkaman nemechcastigarouaya niman ken xokaman ijki nemechcastigaros. 10 On tatajtin kinkuaskej inkoneuan, niman on tekoneuan kinkuaskej on intajuan pampa xonyas okse tlakuajli para kikuaskej. Nejua nemechcastigaros, niman yejuan xmikiskej, nikinchajchayauas imanian in tlaltikpaktli.
11 'Nejua nemoTEKO Dios, ijkon ken melauak ninemi, ijkin ninotlajtolmaka: pampa nemejuamej yonenkijtlakojkej noueyitiopan ikan on nemotetlajyelojkauan ídolos, niman ipampa okseki tlajtlamach yejuan sanoyej xkuajli tlen nenkichiuaj, nejua no sanoyej nemechtlajyouiltis, niman xnemechiknelis. 12 Se parte de on yexkantipan de nemejuamej, nenmikiskej ne Jerusalén ikan kokolistli niman ikan mayantli. Okse parte de on yexkantipan, mechmiktiskej nemotlauelikniuan iyeualkan itepanchinan Jerusalén. Niman on sa ika nochi parte yejuan nokauaskej, nikinchajchayauas imanian in tlaltikpaktli. Nejua nikintojtokas para nikinmiktis. 13 Ijki tej, ninotlauelkixtis impan yejuamej; impan nitlauelseuis niman xok nikualantias. Niman ijkuak impan yoninotlauelkixtij, kimatiskej ika nejua nemoTEKO nejua onikinnots ikan tlauejli pampa sanoyej nikintlajsojtlaya. 14 Tejua Jerusalén, kuajli nimitsxoxotonis, niman nimitskauas ken sen teolochojli. Niman nochimej on chanejkej impan on naciones yejuan onokej moyeualkan, mitspijpinauiskej ijkuak motech panoskej. 15 Nochimej mitsuijuikaltiskej niman tlamach mitsteneuiliskej tlen xkuajli. Niman on naciones yejuan mitsyejyeualojtokej, motech kitaskej ken temojtij nitecastigaroua ijkuak nejua ninotlauelkixtis motech niman chikauak nimitscastigaros. ¡Nejua nemoTEKO, ijki yonikijtoj! 16 Nejua nikchiuas para nenmopan ma uajla on mayantli yejuan mechtlajyouiltis. On mayantli yes ken itlaj on flechas yejuan ika nemechmojmotlas para ika nemechmiktis. Melauak tej, nejua nikchiuas para ma mechmiktikan niman para makasa xpiyakan tlakuajli. 17 No ijki, nejua nikchiuas para nenmopan ma uajla on mayantli, on kokolistli niman on mikilistli, niman no, para ma uajlakan on yolkej tekuanimej yejuan kinmiktiskej nemokoneuan. Niman nikchiuas para miyekej de nemejuamej ma mechmiktikan ipan nouijsokilistli. ¡Nejua nemoTEKO, ijki yonikijtoj nemopan nochiuas!"