On temachistijli de on castigo yejuan uajlas (6.1 – 7.27)
Uajlas tlaxoxotonilistli pampa kinmauistiliaj ídolos
6
ToTEKO oksejpa onechnots niman onechijlij: 2 “Tejua tlaltikpaktlakatl, xontlacha kampaka onkaj itepeuan on tlajli Israel, niman ompaka xontiotlajto ikan notokatsin para xkinmijli on tlinon xkuajli impan nochiuas. 3 Xkinmijli ika ijkin nikijtoua: ‘Xkakikan nemejuamej tepemej de Israel on tlinon nejua nemoTEKO Dios nemechijlia nemejuamej tepemej, nemejuamej tepetsitsimej, nemejuamej ríos niman nemejuamej ixtlauamej: Nejua nikchiuas para nemopan ma uajla nouijsokilistli, niman ijki nikinxoxotonis intiopanuan on ídolos yejuan onokej ipan nemotepetsitsiuan. 4 Nejua nikintetlajtlapanas on tlaixpantin kampa on israelitas tlauentlaliaj niman kampa kitlatiaj kopajli. Niman nikchiuas para on israelitas ma mikikan niman ma xinikan inmixpan iminídolos. 5 On mikatsitsimej israelitas nikinxinis inmixpan iminídolos, niman nikinchajchayauas iminomiyouan inyeualkan on intlaixpanuan. 6 Nochiuiyan kampa yejuamej chantij ipan on país de Israel, nikinxoxotonis on uejueyikalpanmej, niman on intlaixpanuan kampa kinmauistiliaj iminídolos nochi nikinxoxotonilis. Nochi kuajli nikinxoxotonilis on intlaixpanuan, niman on iminídolos nikintetlajtlapanilis. On intlaixpanuan kampa kitlatiaj kopajli, nochi nikinxoxotonilis, niman nikpopolos nochi on tlinon yejuamej yokichijchijkej. 7 Niman ijkuak on israelitas kitaskej ika sanoyej miyekej inchanejkauan yomikej, kimatiskej ika nejua niiminTEKO.8 'Pero nejua nikchiuas para sekimej on israelitas ma nomanauikan de on mikilistli, niman ma nochajchayauakan ipan oksekimej naciones. 9 Niman on yejuan xmikiskej, nechelnamikiskej impan on naciones kampa kimpiyaskej esclavos; kelnamikiskej ken [onikintlajyouiltij a pampa onechtlalkauijkej ijkuak okinmauistilijkej on ídolos. Yejuamej sano yejuamej notlajyelitaskej ipampa on xompayejyeualistli yejuan okichijkej, pampa okichijkej tlen sanoyej tetlajyeloj. 10 Niman ijkuakon, kimatiskej ika nejua niiminTEKO, niman ijkuak onikinmijlij nikincastigaros, xsanenkaj onikijtoj.' ”
11 ToTEKO Dios onechijlij: “Xteititi ika sanoyej timajmana, hasta xmomatetlatsini niman xmokxitlatepini, niman xajmankatsajtsi ipampa on temojtij tlajtlakoltin yejuan okichijkej on israelitas, pampa yejuamej mikiskej ipan nouijsokilistli, ikan mayantli niman ikan kualolistin. 12 On yejuan nemiskej uejka de Jerusalén, mikiskej ikan kualolistin; on yejuan nemiskej nisiu Jerusalén, mikiskej ipan nouijsokilistli; niman on yejuan nokauaskej, mayankamikiskej. Ijki nejua ninotlauelkixtis intech yejuamej. 13 Yejuamej kintaskej miyekej mikatsitsimej intsajlan iminídolos niman inyeualkan on tlaixpantin, impan on tepetsitsimej niman impan on tepemej, niman no, tlatsintlan de nochi on kojtin mayeualtikej kampa kiuentlaliayaj kopajli. Niman ijkuakon kimatiskej ika nejua niiminTEKO Dios. 14 Nejua chikauak nikincastigaros. Niman desde on xalpatlajkan yejuan nokaua kampaka sur, hasta kampa onkaj on ueyikalpan Diblat yejuan nokaua kampaka norte, nochiuiyan nitlaxoxotonis. Nochi on imimpaís niman nochiuiyan kampa chantiua, nikchiuas ma nokuepa ken sen temojtij xalpatlajkan. Niman ijkuakon yejuamej kimatiskej ika nejua niiminTEKO. ”