Ye ajsitikaj on tonajli ijkuak onyas tlajyouilistli
7
Kemaj toTEKO onechnots, niman onechijlij: 2 "Tejua tlaltikpaktlakatl, xkinmijli on israelitas ika nejua akin niDios de Israel, ijkin nikinmijlia: Ye yejkotikaj on tonajli ijkuak tlaxoxotoniskej ipan nochi on tlajli Israel. 3 Nejua xnemechtlapojpoluis nemejuamej israelitas, niman niktitlanis notlauel nemopan. Nejua nenmechtlajtlakolmakas pampa sanoyej xkuajli ken nenmouikaj, niman nenmechcastigaros ipampa on tlen sanoyej tetlajyeloj nenkichiuaj. 4 Nejua xnemechiknelis; nemechcastigaros pampa sanoyej xkuajli ken nenmouikaj, niman nenkitlaxtlauaskej on tlen sanoyej tetlajyeloj nenkichiuaj. Niman ijkuakon, nenkimatiskej ika nejua ninemoTEKO.5-6 'Nejua nemoTEKO Dios nikijtoua: Ika tlen melauak nemechijlia, ika yotlan nochi tlen kuajli para nemejuamej. Ye ajsitikaj on tonajli ijkuak sa tlamach tlen xkuajli nemopan nochiuas. Semi ye nentlanisiuijtokej ijkuak nochi tlamis para nemejuamej. 7 Ye ajsitikaj on tonajli ijkuak mechtlaxoxotoniliskej yejuan nenchantij ipan on país Israel. Yoajsik on tiempo, nisiu on tonajli ijkuak xok nenkimatiskej tlinon nenkichiuaskej. Xok onyas on paktli de on iluimej impan on tepemej kampa nenkinmauistiliaj on ídolos. 8 Aman tej, nimantsin ninotlauelkixtis nemoka, hasta kaman nitlauelseuis. Nejua nemechtlajtlakolmakas pampa sanoyej xkuajli ken nenmouikaj, niman nemechcastigaros ipampa on tlen sanoyej tetlajyeloj nenkichiuaj. 9 Nejua xok nemechiknelis; nemechcastigaros pampa sanoyej xkuajli ken onenmouikakej, niman nenkitlaxtlauaskej on tlen sanoyej tetlajyeloj yonenkichijkej. Niman ijkuakon nenkimatiskej ika nejua nemoTEKO, nejua nemechcastigaroua.
10 '¡Yoyejkok on tonajli! ¡Yoajsik on hora ijkuak onyas teyolkuitilistli! ¡On tlaxoxotonilistli ye nikan onkaj! Imimpaís on israelitas yoten ikan xompayejyeualistli niman noueyimatilistli. 11 On tlauelîjlotl yejuan kichiuaj, más kimiyekilia on xompayejyeualistli. Pero on israelitas xuelis nomanauiskej maski kipiyaj iminriquezas noso maski uejueyixtokej. Xuelis itlaj ika nomanauiskej. 12 Yoajsik on tiempo, yoajsik on tonajli. On yejuan tlakouaj xok pakiskej tla semi xpatioj otlakojkej, niman on yejuan tlanemakaj xok najmanaskej tla xpatioj otlanemakakej. Ijkon nochiuas pampa ikan notlauel nikincastigaros nochimej on israelitas ipampa on iminnoueyimatilis. 13 On yejuan itlaj yokinemakak, xokaman chika nemi oksejpa uelis kouas on tlen yokinemakak, nion xuelis oksejpa kinemakas on tlen yokou. Xakaj tej nomanauis; ika onkaj nochimej mikiskej ipampa inxompayejyeualis, niman on tlen yonikijtoj, xnikpatlas.
14 'Maski on insoldadostlayekankauan kimpitsaskej on tlapitsaltin para tlanotsaskej ika ye yaskej ipan nouijsokilistli, nion se soldado notlatlajtlalilis nion yas ipan on nouijsokilistli. Ijki nochiuas pampa nejua ikan notlauel nikincastigaros on israelitas ipampa iminnoueyimatilis. 15 Ijkuakon, on yejuan kisaskej ipan on ueyikalpan Jerusalén, kinmiktiskej ipan nouijsokilistli, niman on yejuan ompa nokauaskej, mikiskej ikan kokolistli niman mayantli. 16 Maski sekimej cholojteuaskej niman onniyanaskej impan on tepemej ken itlaj on uilomej yejuan tejtenaj, nochimej ajmankachokaskej impampa intlajtlakoluan. 17 Pampa nochimej israelitas sanoyej nomojtiskej, makuejkuetlajxiuiskej niman ikxikuekuetlakaskej. 18 Notlakentiskej ikan ajmankatlakentli para kiteititiskej ika sanoyej tlajyouiyaj. Nochi intlalnakayo kinokentis nemojtijli, niman ixtechichiliuiskej ikan ueyi pinaualistli niman nokuatexikaloskej. 19 On imimplata niman iminoro kixiniskej ipan ojtli ken tlajsojli yeskia, pampa kimatiskej ika nion iminoro nion imimplata xuelis kinmanauiskej ipan on tonajli ijkuak nejua akin niiminTEKO nikinuajtitlanilis notlauel. Xkaman uelis napisseuiskej niman xkaman uelis ixuiskej, pampa on oro yejua okichiu para ma uetsikan ipan tlajtlakojli. 20 Impampa on kualtsitsimej inkualneskayouan de oro, yejuamej sanoyej onoueyimatkej, niman inka yejuamej okinchijchijkej on intetlajyelojkauan ídolos. Yejua ika, nejua nikchiuas para nochi on tlajtlamach de oro yejuan kipiyaj, ma kitlajyelitakan niman ma kixinikan ken tlajsojli yeskia. 21 Nikchiuas ma uajlakan on yejuan xchanejkej, niman ma kinmichtekilikan nochi on tlen sanoyej kitlajsojtlaj. Nikchiuas ma uajlakan on yejuan más xompayejyeuamej de in tlaltikpaktli para yejuamej ma kinkuilikan on iminriquezas niman ma kinmijtlakouilikan. 22 Nejua niktlalkauis yejua in país, niman nikinkauilis on xchanejkej ma kichiuakan tlen xchipauak ipan noueyitiopan yejuan nejua sanoyej niktlajsojtlaya. Uajlaskej on tlachtekej niman ompa tlaijtlakoskej ikan tlajtlakojli.
23 'Niman tejua Ezequiel, sa xkimpiya on teposcadenas kampa kinsasâloskej on israelitas niman ika kinuikaskej on israelitas, pampa ipan in país miyekej temiktiaj, niman ipan in ueyikalpan onkaj miyek tlauelîjlotl. 24 Nejua nikchiuas para ma uajlakan on naciones yejuan más xompayejyeuamej, niman ma kinnoyaxkatikan inkaluan on israelitas. Nikchiuas para on yejuan kinemiliaj uejueyixtokej, ma tlami iminnoueyimatilis, niman nikchiuas ma kinmijtlakouilikan imintiopanuan on iminídolos. 25 Ijkuakon israelitas sanoyej kinmojkamiktiskej on intlauelikniuan, kiminiknotlajtlaniliskej para iminuan ma noyotlalikan, pero on intlauelikniuan xkinekiskej iminuan noyoltlaliskej. 26 Sa chika impan nochiuas on tlen sanoyej xkuajli; sa chika kakiskej itlaj xkuajli nochijtikaj. Yejuamej kiniknotlajtlaniliskej on tiotlajtojkej para ma kinmijlikan tlinon tlatlachalistli ken intemikpan okipixkej, pero on tiotlajtojkej xkimatiskej ken kiminnankiliskej. Nion tiopixkej, nion ueuentsitsimej, xuelis kintlakanonotsaskej on israelitas. 27 On rey najmanas niman notlakentis ika on ajmankatlakentli, on uejueyitekiuajkej najmanaskej, niman nochimej on israelitas sanoyej kuekuetlakaskej ikan nemojtijli. Nejua nikincastigaros ken kinmelaua ipampa on ken yejuamej nouikaj, niman nikintlajtlakolmakas ijkon ken yejuamej otetlajtlakolmakakej. Ijki tej, yejuamej kimatiskej ika nejua niiminTEKO.”