On tlatlachalistli ken sen temiktli kampa Ezequiel okitak on tlajtlamach tlen sanoyej tetlajyeloj yejuan kichiuayaj ne Jerusalén (8.1 - 11.25)
On tlatlachalistli kampa Ezequiel okitak iueyilis Dios
8
Ipan on ika makuijli tonajli de on ika chikuasen metstli, ijkuak tikuikayaj chikuasen xipan ika otechajsikej niman otechuikakej ne Babilonia, nejua niyeuatikatka nochan iminuan on tlayekankej de Judá. Kemaj san ijsijkapan, toTEKO Dios nopan okitlalij ipoder, 2 niman onechititij sen tlatlachalistli ken notemikpan, kampa onikitak nemiya yakaj ken sen tlaltikpaktlakatl. Kampa ken ixijlan para tlatsintlan, onikitak nesiya ken itlaj tlitl, niman de ixijlan para tlakpak, onikitak petlaniya kenon tepostli yejuan sanoyej petlanki. 3 On ken tlaltikpaktlakatl okipatlau ken itlaj ima, niman onechkitskij ipan notson. Kemaj iespíritu Dios onechuikak tlakpak ipan ajakatl, ixko on cielo, niman ipan on tlatlachalistli ken notemikpan yejuan Dios nechititijtikatka, onikitak ika iespíritu Dios onechuikak Jerusalén. Niman onechajxiltij itech ikalakiyan on ueyikalpan yejuan nokaua kampaka norte, itech on ueyitsakuijlotl yejuan nokaua tlaijtik, kampa nemi on ídolo yejuan sanoyej kualania toTEKO. 4 Niman ompa onkatka on petlankatlauijli yejuan kixnextia on Dios de Israel ikan iueyilis, ijkon ken yonikitaka ipan on achtoj tlatlachalistli ken notemikpan, ipan on ixtlauatl.On tlatlachalistli kampa Ezequiel okitak on tlen sanoyej xkuajli nochiuaya ipan on ueyitiopan
5 Kemaj Dios onechijlij: “Tejua tlaltikpaktlakatl, xontlacha kampaka norte.” Niman nejua onontlachix kampaka norte. Niman ipan ikalakiyan on ueyikalpan, itech on ueyitsakuijlotl yejuan onkatka nisiu on tlaixpan, onikontak on ídolo yejuan sanoyej kualaniaya toTEKO.
6 Kemaj Dios oksejpa onechijlij: “Tejua tlaltikpaktlakatl, ¿Tikita on tlen sanoyej tetlajyeloj yejuan kichiuaj on israelitas, yejuan ika kichiuaj para nejua ma niktlalkaui noueyitiopan? Pero poliui tikitas okseki tlajtlamach yejuan más xkuajli.”
7 Kemaj yejua onechuikak ikalakiyan on kiauak de on ueyitiopan, niman onikitak ika on tepanchinantli koyonki katka. 8 Kemaj Dios onechijlij: “Tejua tlaltikpaktlakatl, más ueyi xtlapo kampa koyonki on tepanchinantli.”
Niman ijkuak nejua onikchiu on tlen onechnauatij, oniknextito onkaj sen tsakuijlotl yejuan ichtakaonkaj. 9 Kemaj oksejpa onechijlij: “Xkalaki niman tikitas on tlajtlamach tlen sanoyej xkuajli kichiuaj ompa.” 10 Niman nejua onikalak, niman ipan nochi on kech ika ueyak on tepanchinantli, onikitak ompa yokinmixneskayotijkej nochimej on sesentlamantikej yolkej yejuan noteuilanaj niman oksekimej yolkej yejuan xchipajkej ixpan Dios. Niman no okinmixneskayotijkej nochimej on sesentlamantikej ídolos de on israelitas. 11 Ompa nemiyaj 70 uejueyitlayekankej israelitas yejuan kinmauistiliayaj on ídolos. Semej yejuamej katka Jaazanías, ikoneu Safán. Niman cada se kimapixtikatka ipopochkontsin kampa kisaya tilauak ipokyo on kopajli.
12 Kemaj Dios onechijlij: “Tejua tlaltikpaktlakatl, ¿Tikita tlinon kiichtakachiuaj on uejueyitlayekankej israelitas? Cada se nemi kampa kimauistilijtikaj iídolo. Ijkon kichiuaj pampa yejuamej kinemiliaj xnikinta, niman kinemiliaj yoniktlalkauij in país.”
13 Kemaj oksepa onechijlij: “Pero xuajla nouan, poliui tikitas okseki tlajtlamach tlen kichiuaj yejuan más sanoyej xkuajli.”
14 Kemaj onechuikak itech ikalakiyan on iueyitiopan toTEKO, itech on ueyitsakuijlotl yejuan nokaua kampaka norte. Ompa yejyeuatikatkaj keskimej siuamej, niman chokatikatkaj pampa omik on dios Tamuz. 15 Kemaj Dios onechijlij: “Tejua tlaltikpaktlakatl, ¿tikita yejua in? Pero sanken tikitas okseki tlajtlamach yejuan más sanoyej tetlajyeloj.”
16 Kemaj Dios onechuikak ipan ikiauakpitentsin on iueyitiopan. Nisiu ikalakiyan on yektiopan, itlajkotkan on kiauak kampa onkaj on kalixpan niman on tlaixpan, nemiyaj kanaj sempoajli uan makuijli tlakamej. Yejuamej xontlachixtikatkaj itech on yektiopan, yej ontlachixtikatkaj kampaka ikisayan tonaltsintli. On tlakamej notlakuantelketsayaj niman nopachouayaj hasta ipan tlajli para kimauistiliayaj on tonaltsintli kampaka uajkisa.
17 Kemaj toTEKO onechijlij: "¿Tejua tlaltikpaktlakatl, tikita on? In chanejkej nikan Judá, xyolpachiuij san kichiuaj nikan itech noueyitiopan on tlen sanoyej tetlajyeloj, yej no, yokitemiltikej in país ikan tlauelîjlotl. Yejuamej sa ika nemij kichiuaj para ma nikualani, niman kichiuaj para on inxompayejyeualis ma yejko notech ken itlaj yejuan sanoyej molonki. 18 Pero nejua nikintitis ika sanoyej yonikualan. Nion achijtsin xnikinmiknelis. Maski yejuamej chikauak noueyikatsajtsiliskej notech, nejua xnikinkakis."