On tlatlachalistli kampa Ezequiel okitak ken kincastigaroskej on chanejkej Jerusalén (9.1 - 11)
(On yolyemankej xmikiskej)
9
Sakin, onikak yakaj chikauak onechtsajtsilij. Ijkin onechijlij: “¡Ye yejkotokej on yejuan castigaroskej on ueyikalpan Jerusalén, cada se kuajmakuitiu itepos yejuan ika temiktis!”2 Kemaj onikitak oajsikej chikuasemej tlakamej itech on ueyitiopan. Oajsikej itech on ueyitsakuijlotl yejuan onkaj tlakpakopa, kampaka norte. Cada se kuajmakuitiaya itepos. Iminuan yejuamej uajlaya sen tlakatl yejuan tlakemej katka ikan linojtlakentli, niman ipan ixijlan kuajkiya tlinon ika tlajkuilos. Yejuamej okalakkej ikiauak on ueyitiopan, niman onoteltijkej itech on tlaixpan de bronce. 3 Kemaj on petlankatlauijli yejuan kixnextia on Dios de Israel ikan iueyilis, onejkuanij inkuatipan on querubines kampa onkatka, niman oyaj itech ikiauatempan on ueyitiopan. Niman toTEKO okinots on tlakatl yejuan tlakemej katka ikan linojtlakentli, yejuan ipan ixijlan kuajkiya tlinon ika tlajkuilos. 4 Okijlij: “Xuiya imanian in ueyikalpan Jerusalén, niman xtlali sen neskayotl ipan inmixkuateu on yejuan najmanaj niman noyolkokouaj ipampa on tlajtlamach tlen sanoyej tetlajyeloj nochiua ipan in ueyikalpan.”
(On xyolyemankej mikiskej)
5-6 Kemaj onikak ijkin kinmijliaya on oksekimej tlakamej: “Xkuitlapanuikan on tlakatl yejuan tlakemej ikan linojtlakentli niman xkinmiktikan nochimej yejuan xkipiyaj on neskayotl ipan inmixkuateu. Peua xtemiktikan ipan on noueyitiopan; xkinmiktikan ueuentsitsimej, telpokamej, ichpokamej, kokonej niman siuamej. Maka xkinmiknelikan. Pero maka nenkinmiktiskej yejuan kipiyaj on neskayotl ipan inmixkuateu.” Kemaj yejuamej opejkej kinmiktiaj on tlayekankej yejuan nemiyaj ixpan on ueyitiopan.
7 No ijki, toTEKO okinmijlij: “Xkijtlakokan on noueyitiopan; xtemiltikan ikan mikatsitsimej nochi on ikiauakuan.”
Yejuamej tej, ijki okichijkej, niman no, opeu temiktiaj ipan nochi on ueyikalpan. 8 Niman chika yejuamej temiktiayaj, nejua noselti oninokau. Kemaj oninotlakuantelkets niman oninopachoj hasta ipan tlajli, niman ikan miyek ajmantli ijkin oninoueyikatsajtsilij: “Ay noTEKO Dios, ¿pampa sanoyej yomitskualanijkej on chanejkej Jerusalén, tlamis tikinmiktis on achijtsitsimej ichanejkauan Israel niman Judá yejuan nokauaj?”
9 ToTEKO onechnankilij: “On chanejkej Israel niman Judá sanoyej yotlajtlakojkej. Ipan nochi in país sanoyej temiktiaj. Xok onkaj yolmelajkilistli ipan nochi in ueyikalpan. Yejuamej kinemiliaj yoniktlalkauij in país niman xnikita tlinon kichiuaj. 10 Yejua ika tej, nejua nion achijtsin xnikinmiknelis, yej nikincastigaros pampa sanoyej xkuajli ken nouikaj.”
11 Kemaj on tlakatl yejuan tlakemej katka ikan linojtlakentli, yejuan ipan ixijlan kiktiya tlinon ika tlajkuilos, ouajlaj itech toTEKO niman ijkin okijlij: “Yonikchiu nochi on tlinon tejua otinechnauatij.”