(On petlankatlauijli yejuan kixnextia Dios ikan iueyilis, kitlalkauiya on ueyitiopan)
10
Kemaj ipan on tlatlachalistli onikitak tlakpak ipan ajakatl, inkuatipan on ángeles yejuan imintoka querubines, itlaj ken sen trono yejuan tlajtlachaya kenon azultik tetl zafiro. 2 Niman toTEKO ijkin okijlij on tlakatl yejuan tlakemej katka ikan linojtlakentli: “Xkalaki intsajlan on ruedas yejuan onokej tlatsintlan de on querubines, niman xkui se mapichtli on tlixochtli yejuan kauantikaj, yejuan onkaj kampa nemij on querubines, niman xchayaua ipan on ueyikalpan.”
Niman nejua onikitak ika on tlakatl okichiu ken toTEKO okinauatij. 3 Ijkuak on tlakatl okalak intsajlan on ruedas, on querubines nemiyaj kampaka sur de on ueyitiopan, niman sen moxtli okitemiltij on kiauakpitentsin yejuan onkaj itech on ueyitiopan. 4 Ijkuak on petlankatlauijli yejuan kixnextia Dios ikan iueyilis, onejkuanij inkuatipan on querubines niman oyaj itech ikiauatempan on ueyitiopan, on moxtli okitemiltij on ueyitiopan, niman ipan on kiauak otlauilpantik ikan on petlankatlauijli yejuan ixnextilis Dios. 5 On inmastlakapaluan on querubines, onkakistiyaj hasta ipan on ueyikiauak de on ueyitiopan. Kakistiya ken ijkuak tlajtoua on Dios yejuan nochi ueli kichiua.
6 Kemaj toTEKO okinauatij on tlakatl yejuan tlakemej katka ikan linojtlakentli, para ma kikui seki on tlitl yejuan onkatka intsajlan on ruedas yejuan onkatkaj tlatsintlan de on querubines. Niman on tlakatl oyaj, niman onotelkets intsajlan on ruedas. 7-8 Tlatsintlan de cada inmastlakapal on querubines, kipiyayaj ken itlaj ima sen tlaltikpaktlakatl. Se de yejuamej okontilan keski tlixochtli ipan on tlitl yejuan onkatka intsajlan yejuamej, niman okitlalij ipan imauan on tlakatl yejuan tlakemej katka ikan linojtlakentli niman yejua okiselij niman oyaj.
On tlatlachalistli kampa Ezequiel okintak on ruedas niman on querubimes
9 Intech on querubines onikitak onkatka naui rueda, cada rueda onkatka itech cada se de yejuamej. Niman on ruedas petlaniyaj kenon tetl itoka topacio. 10 On naui rueda san se tlachalistli kipiyayaj. Niman cada rueda kipiyaya okse rueda ijtik, yejuan nopalakachouaya okse lado xken on okse. 11 Ijkuak on querubines melajki yayaj, san se lado de on naukan lados, nion xnomalakachouayaj. Yej yayaj melajki kampaka yaya on yejuan kinyekanaya. 12 Ipan intlakayo on querubines niman ipan intlakapan, ipan inmauan niman ipan inmastlakapaluan, tentikatkaj ikan inmixtololojuan. Niman on naui rueda no kipiyayaj inmixtololojuan. 13 Nejua onikak ika on ruedas no kintokayotiayaj “carretas.” 14 Cada se de on querubines naukan xayakyej katka: on achtoj inxayak katka ken de sen okichwakax, on ika ome inxayak katka ken de sen tlaltikpaktlakatl, on ika yeyi inxayak katka ken de sen león, niman on ika naui inxayak katka ken de sen kuaktli. 15 Kemaj on querubines opatlankej ipan ajakatl. Yejuamej in querubines katkaj sano yejuamej on yejuan tlajtlachayaj ken tlaltikpaktlakamej yejuan yonikintaka ipan on tlatlachalistli ken notemikpan ijkuak ninemiya itech on río Quebar. 16 Ijkuak on querubines nejnemiyaj, on ruedas no nejnemiyaj iminuan; ijkuak on querubines peuaya patlaniyaj ipan ajakatl, on ruedas no yayaj ipan ajakatl. 17 Niman ijkuak on querubines noteltiayaj, on ruedas no noteltiayaj; niman ijkuak patlaniyaj ipan ajakatl, on ruedas no yayaj ipan ajakatl, pampa iminespíritu on querubines nemiyaj ipan on ruedas.
18 Kemaj on petlankatlauijli yejuan ixnextilis Dios, onejkuanij itech ikiauatempan on ueyitiopan, niman onotlalij ipan ajakatl, inkuatipan on querubines. 19 Kemaj on querubines okitlapojkej inmastlakapaluan niman opatlankej. Nejua onikitak kenijki onokuitejkej niman kenijki on ruedas oyajkej iminuan. Niman no onikitak kenijki onoteltijkej itech iueyitsakuijlou on iueyitiopan toTEKO, itech on ueyitsakuijlotl yejuan nokaua kampaka ikisayan tonaltsintli. Ijki tej, on petlankatlauijli yejuan kixnextia on Dios de Israel ikan iueyilis, onkatka inkuatipan on querubines. 20 Yejuamej in querubines katkaj sano yejuamej on yejuan tlajtlachayaj ken tlaltikpaktlakamej, yejuan on Dios de Israel onechintitij ipan tlatlachalistli ken notemikpan, itech on río Quebar. Niman ijki tej, nejua onikmat ika yejuamej katkaj querubines. 21 Cada se de on querubines naukan xayakyej katka niman naukan majtlapalej katka. Niman tlatsintlan de cada inmastlakapal on querubines, kipiyayaj ken itlaj ima sen tlaltikpaktlakatl. 22 Niman iminxayakuan no ijki katkaj kenon querubines yejuan yonikintaka ipan on tlatlachalistli ken notemikpan ijkuak ninemiya itech on río Quebar. Cada se san kanika ueliya melajki yaya, no kenon yejuan yonikintaka.